އުމުރުން 80 އަހަރުވެ މުސްކުޅި ވަންދެން ވެސް ބޮލީވުޑްގެ މަސައްކަތްތަކުގައި އުޅޭނެ ކަމަށް ބޮލީވުޑްގެ ކާމިޔާބު ތަރި ރާނީ މުކަރްޖީ ބުނެފި އެވެ.

ރާނީ މިހެން ބުނެފައިވަނީ މިހާރު ކުރިއަށްދާ އިންޓަނޭޝަނަލް ފިލްމް ފެސްޓިވަލް އޮފް އިންޑިއާގެ ތެރެއިން ބޭއްވި މާސްޓާ ކްލާހެއްގައި ވާހަކަ ދައްކަމުންނެވެ.

ބޮލީވުޑްގައި އުމުރުން ދުވަސްވީ މީހުންނަށް ކުރެވޭ ތަފާތު ކުރުންތަކާ ބެހޭ ގޮތުން ވާހަކަ ދައްކަމުން ރާނީ އިތުރަށް ބުނީ އުމުރަކީ ހަމައެކަނި ނަމްބަރެއް ކަމަށާއި އުމުރަށް ބަލައިގެން މަސައްކަތް ކުރުމަކީ މަސައްކަތަށް ކުރެވޭ ބޭއިންސާފެއް ކަމަށެވެ.

ބޮލީވުޑްގެ ބައެއް ތަރިން އުމުރުން ހަގު ރޯލުތަކަށް އިސްކަން ދޭކަން ފާހަގަ ކުރަމުން ރާނީ ވަނީ އެއީ އޭނާ ގަބޫލުކުރާ ކަމެއް ނޫން ކަމަށާއި ރަނގަޅު ސްކްރިޕްޓެއް ނަމަ އުމުރަކީ މާ މުހިއްމު އެއްޗެއް ނޫން ކަމަށް ބުނެފަ އެވެ.

މިހާރު 40ގެ އަހަރުތައް ގުނަމުން އަންނަ ރާނީއަކީ ބޮލީވުޑްގައި އެކި ކަހަލަ ފިލްމުތައް ކުޅެ ތަޖުރިބާ ހޯދާފައިވާ ފަންނާނެކެވެ. އެގޮތުން އޭނާ ވަނީ ލޯބީގެ ފިލްމުތަކާއި ތްރިލާގެ އިތުރުން އެހެނިހެން ފިލްމުތައް ވެސް ކުޅެފަ އެވެ.

ރާނީއަކީ އޭނާގެ ނަމުގައި ބޮލީވުޑްގެ ކާމިޔާބު ފިލްމު ފްރެންޗައިޒްއެއް އޮތް ހަމައެކަނި އަންހެން ތަރި އެވެ. "މަރްދާނީ"އަކީ ރާނީގެ ވަރަށް ތަފާތު ކާމިޔާބު މަސައްކަތެކެވެ.