ބޮލީވުޑްގެ މަޝްހޫރު ތަރި ރަންވީރު ސިންހް ބޮލީވުޑަށް ކޮށްދިން ހިދުމަތްތައް ފާހަގަ ކުރުމުގެ ގޮތުން އޭނާއަށް ބައިނަލްއަގްވާމީ އެވޯޑެއް ދޭން ހަމަޖައްސައިފި އެވެ.

މެދުއިރުމަތީގެ ފިލްމު ފެސްޓިވަލެއް ކަމަށްވާ "ދަ ރެޑް ސީ ފިލްމް ފެސްޓިވަލް"ގައި ރަންވީރަށް އެވޯޑު ލިބެނީ ސިނަމާއަށް ކޮށްދީފައިވާ އަގުހުރި ހިދުމަތްތަކުގެ އަގުވަޒަން ކުރުމަށެވެ.

މި ހިނގާ ނޮވެމްބަރު މަހުގެ 30 ވަނަ ދުވަހުން ފެށިގެން ސައުދީ އަރަބިއާގައި ކުރިއަށްދާ ރެޑް ސީ ފިލްމް ފެސްޓިވަލްގައި ރަންވީރުގެ އިތުރުން ވެސް ބައިނަލްއެގްވާމީ އެހެން ތަރިންނަށް ޝަރަފު އަރުވަ އެވެ.

މިކަމާ ގުޅިގެން ވާހަކަ ދައްކަމުން ރެޑް ސީ ފިލްމު ފައުންޑޭޝަންގެ ރައީސް މުހައްމަދު އަލް ތުރްކީ ވިދާޅުވީ ރަންވީރަކީ ހިންދީ ސިނަމާގެ މޫނު ކަމަށެވެ.

ރަންވީރުގެ އިތުރުން އެ އެވޯޑުގައި އިނާމު ލިބޭ އެހެން ތަރިންގެ ތެރޭގައި ޑިއާން ކްރޫގާއާއި އަބްދުﷲ އަލް ސަދާން ފަދަ ފަރާތްތައް ހިމެނެ އެވެ.