އިކޮނޮމިކް މިނިސްޓަރު ފައްޔާޒު އިސްމާއިލް މަގާމުން އެކަހެރިވެވަޑައިގަތުމަށް ދެންނެވުމަށް އެމްޑީޕީގެ ޗެއާޕާސަން ހަސަން ލަތީފަށް އެ ޕާޓީގެ ރައީސް، ކުރީގެ ރައީސް މުހައްމަދު ނަޝީދު އެދިވަޑައިގެންފި އެވެ.

އިނގިރޭސިވިލާތުގައި މިވަގުތު ހުންނެވި ރައީސް ނަޝީދު ވަނީ މިދިޔަ މަހުގެ ތެރޭގައި އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގެ ތެރޭގައި މިނިސްޓަރު ފައްޔާޒަށް ކޮރަޕްޝަންގެ ތުހުމަތުކުރައްވައިފަ އެވެ. އެއީ ސަރުކާރުގެ ބައެއް މަޝްރޫއުތައް ހަވާލުކުރުމާ ގުޅުވައިގެންނެވެ. ޕާޓީ ތެރޭގައި "ބްރޯ ހެދިގެން" ފައްޔާޒަށް ނޫޅުއްވޭނެ ކަމަށް ވެސް ނަޝީދު އެ ގްރޫޕް ތެރޭގައި ވިދާޅުވެފައިވެ އެވެ. އެ ދުވަސްވަރު މަޖިލީހުގެ ތެރެއިން ފަައްޔާޒުގެ އިތުބާރު ނެތްކަމުގެ މައްސަލަ ކުރިއަށްގެންދަން ވެސް ނަޝީދު މަސައްކަތް ފެއްޓެވި އެވެ. ނަމަވެސް، އެމްޑީޕީގެ ޕީޖީގެ ތެރެއިން ބޭނުންވާ އަދަދަށް ތާއީދު ނުލިބުމުން އެ މަސައްކަތް އޭރު އޮތީ ހުއްޓިފަ އެވެ.

ރައީސް ނަޝީދު މިއަދު އެމްޑީޕީގެ ޗެއާޕާސަން ހަސަން ލަތީފަށް ފޮނުއްވި ސިޓީއެއްގައި ވިދާޅުވީ، ފައްޔާޒު މަގާމުން އެކަހެރިވެވަޑައިގަންނަވަން ޖެހޭ ކަމަށް އެމްޑީޕީގެ ރައީސްގެ ހައިސިއްޔަތުން ދެކެވަޑައިގަންނަވާ ކަމަށެވެ. އެއީ ޕާޓީއަށް ލިބިދާނެ ގެއްލުމަކަށްޓަކައި ކަމަށް ވެސް އެމަނިކުފާނު ވިދާޅުވި އެވެ. އަދި އެއީ ޒާތީ ކަމެއް ނޫން ކަމަށް ވެސް ނަޝީދު ވިދާޅުވެފައިވެ އެވެ.

"މިނިސްޓަ އޮފް އިކޮނޮމިކް ޑިވެލޮޕްމަންޓް ކޮރަޕްޝަންގެ އަމަލެއް ހިންގެވިތޯ ނުވަތަ ނޫންތޯ ޖިނާއީ މިންވަރަށް ބެލުމަކީ ސިޔާސީ ކަމެއް ނޫނެވެ. ޕާޓީން އަޅުގަނޑާ ހަވާލުވެފައި ވަނީ ސިޔާސީ މަސައްކަތެވެ. އަޅުގަނޑު ފާހަގަ މިކުރަނީ ސިޔާސީ ނަޒަރުން ދެކޭ ނަމަ މިނިސްޓަ ފައްޔާޒަކީ ޕާޓީގެ ޒިންމާއެކެވެ. އެގޮތުން މިނިސްޓަ އަމިއްލަފުޅަށް އެކަހެރިވެވަޑައިގަތުމަށް އަޅުގަނޑު އިލްތިމާސް ދަންނަވަމެވެ،" ނަޝީދު ވިދާޅުވި އެވެ.

ރައީސް ނަޝީދު ވިދާޅުވެފައި ވަނީ އެ މަނިކުފާނާއި އެމްޑީޕީގެ އެއްވެސް މެމްބަރަކާ އަދި އެހެން އެއްވެސް ފަރާތަކާވެސް އެއްވެސް އިރެއްގައި ޒާތީ މައްސަލައެއް ނޯންނާނެ ކަމަށެވެ. އަދި އެވާހަކަ އެގޮތަށް ދަންނަވަނީ އެއްވެސް މިނިސްޓަރަކާ ވެސް ޒާތީ މައްސަލައެއް އޮވެގެނެއް ނޫން ކަމަށް ވެސް ނަޝީދު ވިދާޅުވެފައިވެ އެވެ.

"އަޅުގަނޑު ނުކުމެ މިހުރީ ވޯޓުގެ އަދަދެއް ހޯދުމަކަށް ނޫނެވެ. އަޅުގަނޑު މަސައްކަތް ކުރަނީ އެމްޑީޕީގެ ޒަމާންވީ ތަސައްވަރު ހަގީގަތަކަށް ހެދުމަށެވެ. އެމްޑީޕީގެ ހުރިހާ މެމްބަރުން ވެސް އަޅުގަނޑު މި ދެންނެވި ނުކުތާއަށް ވިސްނާލެއްވުމަށް އަޅުގަނޑު އެދެމެވެ،" ނަޝީދު ވިދާޅުވި އެވެ.

ފައްޔާޒު މަގާމުން އެކަހެރިވުމަށް ދެންނެވުމަށް ނަޝީދު ވިދާޅުވި ނަމަވެސް އޭނާ ވިދާޅުވެފައި ވަނީ އެކަން އަންގަވާނީ ރައީސް އިބްރާހިމް މުހައްމަދު ސޯލިހު ކަމަށެވެ.