އަންނަ ސެޕްޓެމްބަރު މަހު އޮންނަ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރާނެ ކެނޑިޑޭޓަކު ހޮވުމަށް ބާއްވާ ރިިޔާސީ ޕްރައިމަރީގެ ވޯޓުލުން ފަށައިފި އެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ އެ ޕާޓިގެ އެންމެ އިސްލީޑަރު އަދި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި، އެމްޑީޕީގެ ރައީސް މުޙައްމަދު ނަޝީދެވެ. މިއީ އެޕާޓީގެ ތާރީޚުގައި ވެސް ބާއްވާ އެންމެ ވާދަވެރި ރިޔާސީ ޕްރައިމަރީ އެވެ.

މި ޕްރައިމަރީގެ ވޯޓުލުން ފަށާފައި ވަނީ ހެނދުނު 9:00 ގަ އެވެ. ވޯޓުލުން ހަވީރު 5 ޖެހުމާ ހަމައަށް ކުރިއަށްދާނެ އެވެ.

މި އިންތިޚާބުގައި 200 އަށް ވުރެ ގިނަ ވޯޓު ފޮށި މާލެއާއި އަތޮޅުތަކުގައި ބަހައްޓާފައިވެ އެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާފައިވާއިރު، އަތޮޅު ތެރޭގައި 194 ވޯޓު ފޮށި ބަހައްޓާފައިވެ އެވެ.

އެ ޕާޓީން ޢާންމުކޮށްފައިވާ ވޯޓާސް ލިސްޓުގައިވާ ގޮތުން 57،255 މީހުންނަށް މި އިންތިޚާބުގައި ވޯޓު ލެވޭނެ އެވެ. އެ ޕާޓީގެ ދަފުތަރުގައި އެންމެ ގިނައީ އައްޑޫ މީހުންނެވެ. އެއީ 7،832 ނުވަތަ ޖުމްލަ މެމްބަރުންގެ %14 އެވެ. ދެވަނަ އަށް އެންމެ ގިނައީ މާލޭ މީހުންނެވެ. އެއީ 6، 727 މީހުން ނުވަތަ ޖުމްލަ މެމްބަރުންގެ %12 އެވެ.

ރިޔާސީ ޕްރައިމަރީގެ ކެމްޕެއިންގައިި ރައީސް ސޯލިހާއި ރައީސް ނަޝީދު ވެސް ވަނީ ވަރަށް ވާދަވެރި އަދި ފޯރިގަދަ ކެމްޕެއިނެއް ކުރިއަށް ގެންދިޔަ އެވެ.