ޖުމްހޫރީ ޕާޓީން މި އަހަރުގެ ރިޔާސީ އިންތިހާބާ މެދު ގޮތެއް ނިންމާނީ އަންނަ މަހު ކަމަށް އެ ޕާޓީން ބުނެފި އެވެ.

ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީީ (ޖޭޕީ) ގެ ގައުމީ ޖަލްސާ މާޗު މަސް ނިމުމުގެ ކުރިން ބާއްވަން މަސައްކަތް ކުރާ ކަމަށް އިއްޔެ ބުނެފައިވެ އެވެ.

ޖުމްހޫރީ ޕާޓީގެ އަސާސީ ގަވައިދު ބުނާގޮތުން ޕާޓީގެ ހުރިހާ މެމްބަރުން ތަމްސީލުކުރެވޭ ގޮތަށް ބާއްވާ ގައުމީ މަޖިލިސް ރިޔާސީ އިންތިޚާބު އޮންނަ އަހަރުގެ މާޗު މަސް ނިމުމުގެ ކުރިން ބާއްވަން ޖެހެ އެވެ. ނަމަވެސް ޕާޓީގެ ކައުންސިލުން ނިންމައިފި ނަމަ ގައުމީ ޖަލްސާ އެއަށް ވުރެ އަވަސްކުރަން ނުވަތަ ފަސްކުރުމަކަށް ވެސް ޖޭޕީގެ އަސާސީ ގަވައިދު ހުރަހެއް ނާޅަ އެވެ.

ޖޭޕީގެ ސެކެރެޓަރީ ޖެނަރަލް އަލީ އާރިފް ވިދާޅުވީ ގައުމީ މަޖިލިހާ ގުޅޭގޮތުން މަޝްވަރާކުރުމަށް ވަރަށް އަވަހަށް އެޕާޓީގެ ކައުންސިލްގެ ބައްދަލުވުމެއް ބާއްވާނެ ކަމަށެވެ. އަދި ގައުމީ ޖަލްސާއަށް ވާންޖެހޭ ހުރިހާ އިދާރީ ތައްޔާރީތަކެއް ނިމިފައިވާ ކަމަށް ވެސް އޭނާ ވިދާޅުވި އެވެ.

ސިޔާސީ ޕާޓީތަކުގެ ދަފްތަރުގައިވާ ގޮތުން ތިންވަނަ އަށް އެންމެ މެމްބަރުން ގިނައީ ޖުމްހޫރީ ޕާޓީގައެވެ. އެޕާޓީގެ މެމްބަރުންގެ އަދަދީ 17،913 އެވެ.

ޖޭޕީގެ އަސާސީ ގަވާއިދުގައިވާ ގޮތުން ޕާޓީގެ ރިޔާސީ ކެންޑިޑޭޓަކީ ޕާޓީގެ ލީޑަރު ކަމަށް އޮވެ އެވެ. އެ ޕާޓީގެ ލީޑަރު ގާސިމް އިބްރާހިމް ވަނީ 2008 އަދި 2013 ގެ ރިޔާސީ އިންތިހާބުގައި ވާދަ ކުރައްވައިފަ އެވެ.

ގާސިމް ވަނީ 2008 ގެ ރިޔާސީ އިންތިހާބުގައި 27،000 އަށް ވުރެ ގިނަ ވޯޓު ހޯއްދަވައިފަ އެވެ. އަދި 2013 ވަނަ އަހަރު ބޭއްވި ރިޔާސީ އިންތިހާބުގައި 50،000 އަށް ވުރެ ގިނަ ވޯޓު ހޯއްދެވި އެވެ. އެކަމަކު، މިއިން އެއްވެސް ރިޔާސީ އިންތިހާބެއްގައި ދެވަނަ ބުރަށް ދެވޭ ވަރަށް ގާސިމަށް ވޯޓު ހޯއްދެވިފައެއް ނުވެ އެވެ.