މޮސްކޯ (21 ޖުލައި) - ޔޫރަޕިއަން ޔޫނިއަން (އީޔޫ)އިން ރަޝިއާއަށް އަޅާފައިވާ ދަތިކުރުމުގެ ފިޔަވަޅުތައް ލުއިކުރަން އުޅޭ ކަމަށް ހަބަރު ފެތުރިފައިވަނިކޮށް އެ ޖަމާއަތުން އަނެއްކާ ވެސް ފިޔަވަޅުތައް ވަރުގަދަކުރަން ނިންމައިފި އެވެ.

އީޔޫއިން މި ނިންމުން ނިންމާފައިވަނީ ރަޝިއާގެ ރަން އެކްސްޕޯޓްތައް ހުއްޓުވަން ތާއީދުކޮށް އެ ޖަމާއަތުގެ 27 މެމްބަރު ގައުމުން ވޯޓު ދީފައިވަނިކޮށެވެ.

އީޔޫގެ ރިޔާސަތު މިވަގުތު ބަލަހައްޓަމުން ގެންދާ ކްޒެޗް ރިޕަބްލިކްއިން ބުނީ އީޔޫގެ މި ފިޔަވަޅުތައް ވާނީ އެ ޖަމާއަތާއެކު މަސައްކަތް ކުރާ ޖީ 7ގެ ގައުމުތަކާއެކު އަޅާ ފިޔަވަޅުތަކެއް ކަމަށެވެ.

ދަތިކުރުމުގެ ފިޔަވަޅުތައް ލުއިކުރާނެ ކަމުގެ އަޑުތައް ފެތުރުނު ނަމަވެސް އީޔޫއިން އެކަން ރަސްމީކޮށް އިއުލާން ކޮށްފައި ނުވާއިރު ރަޝިއާގެ ރަން އެކްސްޕޯޓްތައް ހުއްޓުވަން އީޔޫއިން އައީ މަސައްކަތް ކުރަމުންނެވެ.

ދުނިޔޭގެ އެންމެ ވަރުގަދަ އިގްތިސާދުތައް ކަމަށްވާ ޖީ7 ގެ މެމްބަރު ގައުމުތަކުން ވަނީ މިދިޔަ މަހު ބޭއްވި ޖީ 7 ބައްދަލުވުމުގައި މިކަމަށް އެއްބަސްވެފަ އެވެ.

ރަޝިއާއަށް އަޅާ ދަތިކުރުމުގެ ފިޔަވަޅުތަކުގެ އިތުރުން އީޔޫއިން ވަނީ ޔޫފްރެއިންއަށް 500 މިލިއަން ޔޫރޯގެ އަސްކަރީ އެހީއެއް ވެސް ދީފަ އެވެ. -- އަލް އަރަބިއްޔާ