ބޮޑުތަކުރުފާނު މަގު ކުޅިވަރު އެކުވެނި ކައިރިން ބަހަކާއި ކާރެއް ޖެހި ހިނގި ނުރައްކާތެރި އެކްސިޑެންޓްގައި ޒަހަމްވި މީހުންގެ ތެރެއިން އައިސީޔޫގައި ފަރުވާދެމުންދިޔަ ހަތަރު މީހުންގެ ތެރެއިން އެކަކު ވޯޑަށް ބަދަލުކޮށްފައިވާ ކަމަށް އައިޖީއެމްއެޗުން މިއަދު ބުނެފި އެވެ.

ހޯމަދުވަހު އިރުއޮއްސުނު ވަގުތު ހިނގި ނުރައްކާތެރި އެކްސިޑެންޓުގައި ޒަހަމްވި މީހުންގެ 23 އަހަރުގެ އަންހެން ކުއްޖަކު ވަނީ އެކްސިޑެންޓް ހިނގިތާ މާގިނައިރެއް ނުވަނީސް މަރުވެފަ އެވެ. އަދި ޒަހަމްވި އިތުރު ހަތަރު މީހަކަށް އައިސީޔޫގައި ފަރުވާދިނެވެ.

އައިޖީއެމްއެޗުން ބުނީ އައިސީޔޫގައި ތިބި 4 މީހުންގެ ތެރެއިން އެކަކުގެ ހާލު ރަނގަޅުވަމުން އަންނާތީ އޭނާ ވޯޑަށް ބަދަލުކޮށްފައިވާ ކަމަށެވެ. ނަމަވެސް ދެން ތިބި ތިން މީހުންނަށް އަދިވެސް ފަރުވާ ދެމުން އަންނަނީ އައިސީޔޫގައި ކަމަށް އެ ހޮސްޕިޓަލުން ބުނެ އެވެ.

ފުލުހުން ބުނީ މިހާތަނަށް ބެލިބެލުމުން މި އެކްސިޑެންޓު ހިނގާފައިވަނީ ބޮޑުތަކުރުފާނު މަގުން އެކުވެނި ކައިރިން ދުއްވާފައި ދިޔަ ކާރު އެމަގުން ދުއްވާފައި ދިޔަ އެހެން ކާރެއްގައި ޖެހި، ކޮންޓްރޯލް ނުވެ ގޮސް، އެމަގުން ދުއްވާފައި ދިޔަ ބަހެއްގައި ޖެހިގެން ކަމަށެވެ. އަދި މި މައްސަލަ އިތުރަށް ތަހުގީގުކުރަމުންދާ ކަމަށް ބުނި ނަމަވެސް އެކްސިޑެންޓާ ބެހޭ އިތުރު އެއްވެސް މައުލޫމާތެއް ހާމައެއް ނުކުރެ އެވެ.