ހައިކޯޓުގެ ފަނޑިޔާރު ކަމަށް ކްރިމިނަލް ކޯޓުގެ ގާޒީ ދީބާނާޒް ފަހުމީ ކުރިމަތިލައްވައިފި އެވެ.

ކްރިމިނަލް ކޯޓުގެ ގާޒީ ކަމަށް ދީބާނާޒް އައްޔަންކޮށްފައި ވަނީ 2020 ވަނަ އަހަރުގެ ސެޕްޓެމްބަރު މަހުގެ ދެ ވަނަ ދުވަހު އެވެ. އޭގެކުރިން އޭނާ ވަނީ ޑެޕިއުޓީ ޕްރޮސިކިއުޓާ ޖެނެރަލްގެ މަގާމް ވެސް ފުރުއްވާފަ އެވެ.

އޭނާގެ އިތުރުން ކުރީގެ ޑެޕިއުޓީ ޕްރޮސިކިއުޓާ ޖެނެރަލް މަރިޔަމް ނިހާޔަތު ވެސް ވަނީ ހައިކޯޓުގެ ފަނޑިޔާރު ކަމަށް ކުރިމަތިލައްވާފަ އެވެ. އޭނާ އަކީ ކުރިން ސިވިލް ކޯޓުގެ ގާޒީކަން ކުރައްވާފައިވާ ބޭފުޅެކެވެ.

އެ ދެ ބޭފުޅުންގެ އިތުރުން ހައިކޯޓުގެ ފަނޑިޔާރު ކަމަށް ދެން ކުރިމަތިލެއްވީ ސިވިލް ކޯޓުގެ ގާޒީ ޒުބައިރު މުހައްމަދާއި ހަމަ އެ ކޯޓުގެ ގާޒީ ޙާފިޒާ ޢަބްދުއްސައްތާރު އާއި ޓެކްސް އެޕީލް ޓްރައިިބިއުނަލްގެ ކުރީގެ މެންބަރު ޢާއިޝަތު ޢަޒުފާ ޢަބްދުލްޣަފޫރާއި, ޕީޖީ އޮފީހުގެ ކުރީގެ ވަކީލް ޝުކުރުالله ޝަކީލް އާއި ފ. ބިލެއްދޫ, މޯނިންގްވިލާ, މުހައްމަދު ސަލީމްގެ އިތުރުން ނައިފަރު ކޯޓުގެ މެޖިސްޓްރޭޓް މުހައްމަދު މޫސާ އެވެ.

އެ ބޭފުޅުން ކުރިމަތިލެއްވީ ހައިކޯޓަށް ދެ ފަނޑިޔާރުން ހޯދުމަށް ކުރި އިއުލާނާ ގުޅިގެންނެވެ. ހައިކޯޓަށް ދެ ފަނޑިޔާރުން ހޯދުމަށް އިއުލާނު ކުރީ އެ ކޯޓުގެ ފަނޑިޔާރު އަބްދުއްރައޫފް އިބްރާހީމް އިސްތިއުފާ ދެއްވުމުންނާއި އަބްދުﷲ ހަމީދު, ފަނޑިޔާރުކަމުން ވަކިކުރަން ރައްޔިތުންގެ މަޖިލީހުން ފާސްކުރުމުންނެވެ.