އިންޑިއާގެ ޕޮޕާ މިއުޒިކްގެ ރަސްގެފާނުގެ ގޮތުގައި ނަން މަޝްހޫރު ވެފައިވާ ބައްޕީ ލެހެރީ މަރުވެއްޖެ އެވެ.

އުމުރުން 69 އަހަރުގެ ލެހެރީ މަރުވެފައިވަނީ މުމްބާއީގެ ހޮސްޕިޓަލެއްގައި ސްލީޕް އެޕްނިއާއަށް ފަރުވާ ހޯދަމުން ދަނިކޮށް އިއްޔެ ހެނދުނުގެ ވަގުތެއްގަ އެވެ. އެ ހޮސްޕިޓަލުން ނަރުނު ބަޔާނެއްގައި ބުނެފައިވަނީ ލެހެރީ ދިޔައީ ފުއްޕާމޭގެ އިންފެކްޝަނަކަށްވެސް ފަރުވާ ކުރަމުން ކަމަށާއި މިދިޔަ އަހަރު އޭނާއަށް ކޮވިޑް ވެސް ޖެހިފައިވާ ކަމަށެވެ.

ބައްޕީއަކީ 1980އާއި 1990ގެ އަހަރުތަކުގައި ބޮލީވުޑްގައި ފާހަގަ ކޮށްލެވޭ ލަވަތަކެއް ހަދާދީފައިވާ ފަންނާނެކެވެ. އޭނާގެ ލަވަތަކުގެ ތެރޭގައި "ޑިސްކޯ ޑާންސާ"، "ޗަލްތޭ ޗަލްތޭ" އަދި "ޝަރާބީ" ފަދަ ކާމިޔާބު ލަވަތައް ހިމެނެ އެވެ. އޭނާގެ ކެރިއަރުގައި ބައްޕީ ވަނީ ގިނަ ފިލްމުތަކަކަށް މިއުޒިކް ހަދާދީފަ އެވެ.

ލެހެރީ މަރުވުމާއެކު އިންޑިއާގެ ސަރުކާރުގެ ބޭފުޅުންނާއި މިއުޒިކް އަދި ފިލްމް އިންޑަސްޓްރީގެ ގިނަ ބަޔަކު ވަނީ ސޯޝަލް މީޑިއާގައި ޝުއޫރު ފާޅުކޮށްފަ އެވެ.

އެގޮތުން ބޮޑުވަޒީރު ނަރެންދްރަ މޯދީ ކުރެއްވި ޓްވީޓެއްގައި ވިދާޅުވީ ލެހެރީ ވަކިވެ ދިއުމަކީ މިއުޒކް ދާއިރާއަށް ލިބުނު ބޮޑު ގެއްލުމެއް ކަމަށާއި އޭނާގެ މަސައްކަތްތަކަކީ ޒަމާންތަކަކަށް ދެމިހުންނާނެ މަސައްކަތްތަކެއް ކަމުގަ އެވެ.

މިއުޒިކްގެ އިތުރުން ލެހެރީ ފާހަގަ ކުރެވެނީ ރަން ގަހަނާއަށް ލޯބިކުރާ ފަރާތެއްގެ ގޮތުގަ އެވެ. ލެހެރީގެ އާއްމު ފެނިލުންތަކުގައި އޭނާގެ ކަރުގައާއި އަތުގައި ރަން ގަހަނާ އަޅާފައި ހުރެ އެވެ.

ލެހެރީ މަރުވި އިރު އޭނާގެ އަނތްބަކާއި ދެ ދަރިން ތިބެ އެވެ. އެއީ އަންހެން ކުއްޖަކާއި ފިރިހެން ކުއްޖެކެވެ.