ސްކޫލް ދަރިވަރުންތަކަކަށް އިމްތިހާނުގައި ބޮލީވުޑްގެ މަޝްހޫރު ފަންނާނެއް ކަމަށްވާ ކަރީނާ ކަޕޫރްގެ ދަރިންގެ ނަން ބުނުމަށް އެހި މައްސަލަ ފެންމަތިވެއްޖެ އެވެ.

މަދްޔާ ޕްރަދޭޝް ނަމަކަށް ކިޔާ ޕްރައިވެޓް ސްކޫލެއްގައި ދަރިވަރުންނަށް އިމްތިހާނުގައި ކަރީނާގެ ދަރިންގެ ނަން ބުނުމަށް އަހާފައި ވަނީ ޖެނެރަލް ނޮލެޖްގެ ސުވާލު ޕޭޕަރެއްގަ އެވެ.

އެގޮތުން އެސުވާލު ޕޭޕަރުގައި ކަރީނާ ކަޕޫރް އާއި ސައިފް އަލީ ޚާންއަށް ލިބިފައިވާ ދަރިންގެ ފުރިހަމަ ނަން ބުނުމަށް ދަރިވަރުން ކައިރީގައި އަހާފައިވެ އެވެ. މި ސުވާލު ކަރުދާސް ދީފައި ވަނީ ގްރޭޑް ހައެއްގެ ދަރިވަރުންނަށެވެ.

ނަމަވެސް މިއީ އިމްތިހާނެއްގައި ކުޑަކުދިންނަށް އެންމެ އެހުން ބުއްދިވެރި ސުވާލެއް ކަމަކަށް ގިނަ ބަޔަކަށް ގަބޫލެއް ނުކުރެވެ އެވެ. އަދި ޕޭޕަރުގެ ކޮޕީތައް މިހާރު ދަނީ ސޯޝަލް މީޑިޔާގައި ދައުރުވަމުންނެވެ.

އޭގެ އިތުރުން މިފަދަ ސުވާލުތައް އެހުމާއި ގުޅިގެން، ސްކޫލްގައި ކިޔަވާ ދަރިވަރުންގެ ބެލެނިވެރިން ވަނީ ސްކޫލާއި ދެކޮޅަށް ފިޔަވަޅު އެޅުމަށް ވެސް ގޮވާލާފަ އެވެ.