ރ. ވާދޫގައި މީދާ މުބާރާތް ބޭއްވުމާ ދެކޮޅަށް އެ ރަށުގެ ބައެއް ޒުވާނުން މުޒާހަރާކޮށްފި އެވެ.

ރޭގެ މުޒާހަރާކުރިއިރު ވާދޫ ޒުވާނުން ވަނީ އެ ރަށު ކައުންސިލް އިދާރާގެ ކުރިމަތީގައި މީދާ ހިފުމުގެ މުބާރާތާ ދެކޮޅަށް އަޑުއުފުލާފަ އެވެ.

ވާދޫގެ ޒުވާނުން މިފަދައިން މުޒާހަރާކުރީ އެރަށު ކައުންސިލުން ފުޓްސަލް މުބާރާތް ނުބާއްވައި، މީދާ ހިފުމުގެ މުބާރާތެއް ބާއްވަން އުޅޭ ކަމަށް ބުނެ އެވެ.

އެ ރަށުގައި ފުޓްސަލް މުބާރާތެއް ބޭއްވުމަށް ރަށުގެ ޒުވާނުން ކައުންސިލަށް ވަރަށް ކުރިއްސުރެ ވެސް އެދިފައިވާނެ ކަމަށާއި، އެހެންނަމަވެސް އެކަމަށް ބަޖެޓް ނެތް ކަމަށް ބުނެ އެ މުބާރާތް ނުބާއްވަން ކައުންސިލުން ނިންމުމާ ގުޅިގެން ރަށުގެ ޒުވާނުން ވަނީ ކަންބޮޑުވުން ފާޅުކޮށްފަ އެވެ.

އެ ރަށުގައި މީދާ ހިފުމުގެ މުބާރާތެއް ބާއްވަން ހަމަޖެހިފައިވާއިރު، އެރަށު ކައުންސިލުން ވަނީ މިމަހުގެ 25 ވަނަ ދުވަހުން ފެށިގެން އަންނަ މަހުގެ ފަސް ވަނަ ދުވަހާ ހަމައަށް އެމުބާރާތް ކުރިއަށް ގެންދިއުމަށް ނިންމާފަ އެވެ.

އެގޮތުން މުބާރާތުން އެއްވަނަ އަށް ހޮވޭ ފަރާތަކަށް 3،000 ރުފިޔާ އާއި، ދެވަނައަށް ހޮވޭ ފަރާތަކަށް 2،000 ރުފިޔާ، އަދި ތިންވަނަ އަށް ހޮވޭ ފަރާތަކަށް 1،000 ރުފިޔާ ދިނުމަށް ހަމަޖެހިފައިވާ ކަމަށް ވެސް އެ ކައުންސިލުން ވަނީ ބުނެފަ އެވެ.