ލަންޑަން (30 އޮކްޓޯބަރު) - އިނގިރޭސި ވިލާތުގެ ރާނީ އެލިޒަބަތު ދެވަނަގެ ސިއްހީ ހާލުކޮޅު ދެރަވެ، ޑޮކަޓަރުންގެ އިރުޝާދުގެ މަތިން މަގާމުގެ ބައެއް ޒިންމާތަކުން އެކަހެރިވެ ވަޑައިގެންފި އެވެ.

އެގޮތުން ކުރިއަށް ދެހަފްތާ ތެރޭގައި ކުރައްވަން ހުރި ރަސްމީ ދަތުރުފުޅުތައް ކެންސަލް ކުރައްވާފައިވާއިރު، އެހެނިހެން އާއްމު ފެނިލުންތައް ވެސް ވަނީ މެދުކަނޑާލައްވާފަ އެވެ. އެހެން ނަމަވެސް މި މުއްދަތުގައި އޮފީހުގެ މަސައްކަތްތައް ކުރިއަށް ގެންދަވާނެ ކަމަށް ބަކިންހަމް ޕެލެސްއިން ބުނެ އެވެ.

މިދިޔަ ހަފްތާ ތެރޭގައި އެކަމަނާގެ ހާލުކޮޅު ދެރަވެ ހޮސްޕިޓަލުގައި އެޑްމިޓް ކޮށްގެން ވެސް ފަރުވާ ދީފައިވެ އެވެ. އެކަމުގެ ސަބަބުން އައިލެންޑްއަށް ކުރައްވަން އޮތް ދަތުރުފުޅު ވަނީ ކެންސަލް ކުރަން ޖެހިފަ އެވެ. މިއީ މިދިޔަ 8 އަހަރު ތެރޭގައި އެލިޒަބަތު ހޮސްޕިޓަލުގައި ރޭ ހޭދަކުރެއްވި ފުރަތަމަ ފަހަރެވެ.

ކުރިއަށް އޮތް ދެހަފްތާއަށް އަރާމު ކުރަން ޑޮކްޓަރުން ލަފާދެއްވާފައި ވާއިރު އެކަމުގެ ސަބަބުން ކޮޕް 26ގެ ބައްދަލުވުމުގައި ބައިވެރިނުވެވޭނެ ކަން ބަކިންހަމް ޕެލެސްއިން ވަނީ އިއުލާން ކޮށްފަ އެވެ.

ސިއްހީ ސަބަބުތަކާ ހުރެ ރަސްމީ ދަތުރުފުޅުތަކާއި ބައްދަލުވުންތަކަށް ހާޒިރުވުން ހުއްޓަވާލެއްވި ނަމަވެސް އެލިޒަބަތު އަންނަނީ ވީޑިއޯ މެދުވެރިކޮށް ބައްދަލުވުންތަކުގައި ބައިވެރިވެ ވަޑައިގަންނަމުންނެވެ. -- އަލް އަރަބިއްޔާ