ވަޒީފާތަކަށް ފުރުސަތު ދިނުމުގައި އައްޑޫ ސިޓީއަށް ނިސްބަތްވާ ފަރާތްތަކަށް އިސްކަންދިނުމަށް އައްޑޫ ސިޓީ ކައުންސިލުން ރައީސުލްޖުމްހޫރިއްޔާގެ ނައިބު ފައިސަލް ނަސީމަށް ހުށައަޅައިފި އެވެ.

މިގޮތަށް ހުށައަޅާފައިވަނީ ނައިބު ރައީސް އައްޑުއަށް ކުރެއްވި ޒިޔާރަތުގައި ކައުންސިލް މެމްރުންނާއެކު ބޭއްވި ބައްދަލުވުމުގަ އެވެ. ކައުންސިލުން ބުނެފައި ވަނީ ސަރުކާރުން އައްޑޫގައި ކުރިޔަށްގެންދާ އުމްރާނީ ތަރައްގީގެ މަޝްރޫޢުތަކުގެ ތެރެއިން އުފެދިގެން އަންނައިރު ސިޓީއަށް ނިސްބަތްވާ ރައްޔިތުންނަށް ވަޒީފާގެ ފުރުސަތުތައް ހަމަޖައްސައިދިނުމަށް އެދޭ ކަމަށެވެ.

ސިޓީ ކައުންސިލްގެ ކަންބޮޑުވުންތައް ވެސް ވަނީ ނައިބު ރައީސާ ހިއްސާ ކޮށްފަ އެވެ.

އައްޑޫ ސިޓީ ކައުންސިލަރުން ވަނީ ރައްޔިތުންނަށް ހިދުމަތް ދިނުމުގައި އެކި ދާއިރާތަކުން ކުރިމަތިވެފައިވާ ގޮންޖެހުންތަކާއި ދަތިތައް ނައިބު ރައީސާ ހިއްސާކުރައްވައިފަ އެވެ. އެ ބޭފުޅުން ފާހަގަކުރެއްވި ބައެއް ކަންކަމުގެ ތެރޭގައި އިންސާނީ ވަސީލަތްތަކާއި ބަޖެޓުގެ ދަތިކަން ހިމެނެ އެވެ.

ފައިސަލް ދެއްކެވި ވާހަކަފުޅުގައި، ލާމަރުކަޒީ ނިޒާމާއެކު ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތައް ބަދަލުވެގެންދާނީ ރައްޔިތުންނާއި ގާތުން ދެވޭ ޚިދުމަތްތަކަކަށް ކަމުގައި ވިދާޅުވި އެވެ. އަދި ޞިއްޙީ ދާއިރާ އިތުރަށް ހަރުދަނާ ކުރުމަށް ކުރެވެންހުރި ކަންތައްތައް ފާހަގަކޮށް އެކަންކަމާބެހޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވެ އެވެ.

ނައިބު ރައީސް އައްޑުއަށް ކުރައްވަމުންގެންދަވާ މި ދަތުރުފުޅުގައި އައްޑޫގެ ބައެއް މުއައްސަސާތަކަށާއި، އެ އަތޮޅުގައި ހިންގާ ތަރައްގީގެ ބައެއް މަޝްރޫޢުތައް ވަނީ ބައްލަވާލައްވާފަ އެވެ. އެގޮތުން ސ. ހުޅުމީދޫގައި ތަރައްގީކުރާ ޑިޓޮކްސިފިކޭޝަން ސެންޓަރަށް ޒިޔާރަތްކުރައްވައި އެތަނުގެ މަސައްކަތް ކުރިއަށްދާ ގޮތް ވެސް ބައްލަވާލެއްވި އެވެ.