ހުޅުމާލޭގައި އަމިއްލަ ފަރާތަކުން އިމާރާތްކޮށްފައިވާ މުހައްމަދު ގާސިމް ޕްރީ ސްކޫލް ނައިބު ރައީސް ފައިސަލް ނަސީމް، ހުޅުއްވައިދެއްވައިފި އެވެ.

މުހައްމަދު ގާސިމް ޕްރީ ސްކޫލް ހުޅުވުމަށް މިއަދު ހެނދުނު އެ ސްކޫލްގައި ބޭއްވެވި ރަސްމިއްޔާތުގައި ވާހަކަފުޅުދައްކަވަމުން ނައިބު ރައީސް ވިދާޅުވީ، މި ސްކޫލު ހުޅުމާލޭ ރައްޔިތުންނަށް މިލިބުނީ އެކަށޭނަ ވަގުތެއްގައި ކަމަށެވެ. އަދި ތަނަވަސްކަމުގެ އަހުލުވެރިންނަށް މުޖުތަމައަށް ފައިދާހުރި ހެޔޮ ކަމެއްކޮށްދެވެން ފުރުސަތު އޮތް ކޮންމެ ހާލަތެއްގައި އެކަމެއް އެންމެ އެކަށޭނަގޮތަކަށް ކޮއްދެއްވުމަށާއި، މިއީ ދުނިޔެއާއި އާޚިރަތުގައި ވެސް އޭގެ ސަވާބާއި ދަރުމަ އެމީހަކަށް ލިބޭނެ ކަމެއް ކަމަށް ފައިސަލް ވިދާޅުވި އެވެ.

ނައިބު ރައީސް ވަނީ ހާއްސަކޮށް ހުޅުމާލޭގެ ދެވަނަ ފިޔަވަހީގައިވާ ހިޔާ ފްލެޓްތަކުގައި މީހުން ދިރިއުޅެން ފަށާފައިވާއިރު މީހުން އާބާދުވާ މިންވަރާ ބަލާފައި އެކަށީގެންވާ ވަރަށް ސްކޫލްތައް ބިނާކޮށްފައި ނެތުމުން އެތަކެއް ދަތިތަކާ ރައްޔިތުން ކުރިމަތިލާން ޖެހިފައިވާކަން ފާހަގަ ކުރައްވައިފަ އެވެ. ސަރުކާރުން މިހާރު ވެސް ދަނީ ހުޅުމާލޭގައި ދެ ސްކޫލެއް ބިނާކުރުމުގެ މަސައްކަތްކުރަމުން ކަމުގައި އެމަނިކުފާނު ވިދާޅުވި އެވެ. މީގެ އިތުރުން ވެސް އެމަނިކުފާނު ވަނީ މި ސަރުކާރުން ތައުލީމީ ދާއިރާ ތަރައްޤީކުރުމަށް ވަރަށްބޮޑު އިސްކަމެއް ދެއްވާކަމުގައި ވިދާޅުވެ، މި ސަރުކާރުން އެންމެ ބޮޑު ހޭދައެއްވެސް ކުރަނީ ތައުލީމީ ދާއިރާއަށްކަން ފާހަގަކުރައްވާފަ އެވެ.

އެ މަނިކުފާނު ވަނީ އަލީ ފިރާގު އޭނާގެ ބައްޕަ އަލްމަރްޙޫމް މުހައްމަދު ގާސިމުގެ ހަނދާނުގައި ޢިމާރާތްކޮށް ސަރުކާރަށް ހަދިޔާކޮށްފައިވާ 10 ކްލާސްރޫމާއި، ހޯލު އަދި އިދާރީ ހިންގުމަށް ބޭނުންވާ ކޮޓަރިތައް ހިމަނައިގެން ބިނާކޮށްފައިވާ ސްކޫލަށްޓަކައި އެ އާއިލާއަށް ޝުކުރުއަދާކުރައްވައިފަ އެވެ.

ތަޢުލީމުގެ ގާނޫނު އޯގަސްޓް 10، 2021 ގައި ތަންފީޒުކުރެއްވުމާއި ގުޅިގެން ޕްރީސްކޫލް ތައުލީމަކީ ސަރުކާރުން ހިލޭ ފޯރުކޮށްދޭނެ ޖެހޭ ތަޢުލީމީ މަރުހަލާއެއްގެގޮތުގައި ވަނީ ހަމަޖެހިފަ އެވެ. އަދި، ޕްރީ ސްކޫލް ތަޢުލީމަކީ މަޖުބޫރު ތައުލީމެއްގެ ގޮތުގައި ކަނަޑައެޅިފައިވާއިރު އެ ގާނޫނުގެ ދަށުން ޕްރީ ސްކޫލް ތައުލީމު ރާއްޖޭގައި ދިރިއުޅޭ ކޮންމެ ދިވެހި ކުއްޖަކަށް ހިލޭ ފޯރުކޮށްދޭންޖެހެ އެވެ.