ރާއްޖެއަށް އެންމެ ބޮޑު ނަފާއެއްލިބޭ އެއްދާއިރާއަކީ ފަތުރުވެރިކަމުގެ ދާއިރާކަމަށާއި، އެހެން ނަމަވެސް މިދާއިރާގެ މަތީ ފަންތީގައި ދިވެހިން ތިބީ ނިސްބަތުން މަދުންކަމުގައި ފާހަގަކުރައްވައި، ފަތުރުވެރިކަމުގެ ދާއިރާގެ މަތީ ފަންތީގެ މަގާމުތަކަށް މީހުން ތަމްރީނުކުރުމަށް ހާއްސަ ސަމާލުކަމެއް ދިނުމަށް ރާއްޖޭގެ މަތީ ތައުލީމު ފޯރުކޮށްދޭ އިދާރާތަކަށް ނައިބު ރައީސް ފައިސަލް ނަސީމް ގޮވާލައްވައިފި އެވެ.

އެމަނިކުފާނު މިކަމަށް ގޮވާލައްވާފައިވަނީ ރޭ ވިލާ ކޮލެޖުގެ "ސްޓޫޑަންޓް އެޗީވްމަންޓް އެވޯޑްސް" ހަފުލާ ޝަރަފުވެރިކޮށްދެއްވައި ދެއްކެވި ވާހަކަފުޅުގަ އެވެ.

ވިލާ ކޮލެޖުގެ ކިޔުއައި ކެމްޕަސްގައި ކުރިއަށްދިޔަ މި ހަފުލާގައި ނައިބު ރައީސް ވަނީ މި ސަރުކާރުން ތައުލީމީ ދާއިރާއަށް ދެއްވާ އަހަންމިއްޔަތުގެ މައްޗަށް އަލިއަޅުއްވާލައްވާފަ އެވެ. އެގޮތުން މި ސަރުކާރުން އެންމެ ބޮޑު ހޭދައެއް ކުރަނީ ތައުލީމީ، ހުނަރުވެރި ފަންނީ ދަރިން އުފެއްދުމަށްކަމުގައި އެމަނިކުފާނު ވިދާޅުވި އެވެ.

މި މޭރުމުން ނައިބް ރައީސްގެ ވާހަކަފުޅު ކުރިއަށްގެންދަވަމުން އެމަނިކުފާނު ވަނީ ސަރުކާރުން މިހާ ބޮޑު ހޭދައެއް ތައުލީމީ ދާއިރާއަށް ކުރުމުގެ ބޭނުން ވަރަށް ތަފްސީލުކޮށް ވިދާޅުވެ ދެއްވާފަ އެވެ. އެގޮތުން އެމަނިކުފާނު ވިދާޅުވީ ސަރުކާރުން ތައުލީމީ ދާއިރާއަށް މިހާ ބޮޑު ސަމާލުކަމެއް ދެނީ ގައުމެއް ބިނާވެ ކުރިއަރައިދަނީ ތައުލީމީ ގާބިލު އުފެއްދުންތެރި ޖީލެއް އުފެދިގެންކަންކަމަށް ވާތީ ކަމަށެވެ.

ރޭގެ ހަފުލާގައި ވާހަކަފުޅު ދައްކަވަމުން ނައިބް ރައީސް ފައިސަލް ވަނީ މި ސަރުކާރުން ތަރައްގީގެ އެއްވެސް މަސައްކަތެއް ނުހިނގާ އެއްވެސް ރަށެއްނެތްކަން ފާހަގަކުރައްވާފަ އެވެ. އެހެންކަމުން މި މަޝްރޫއުތައް ހިންގުމަށާއި، ރާއްޖޭގައި ތަރައްގީކުރާ އިދާރާތަކުގައި މަސައްކަތްކުރުމަށް ޓެކްނިކަލް ދާއިރާތަކުން ޒުވާނުން މަތީ ތައުލީމު ހާސިލުކުރުމަށް އެމަނިކުފާނު ބާރުއެޅުއްވެވި އެވެ. އަދި މިކަމުގެ ނަތީޖާއެއްގެ ގޮތުން މުޅި ރާއްޖެއަށް ކުރިއެރުން ލިބިގެންދާނެކަމުގައި އެމަނިކުފާނު ފާހަގަކުރެއްވި އެވެ.

މި ހަފުލާގައި ނައިބު ރައީސް ވަނީ ވިލާ ކޮލެޖުގެ 14 އަހަރުގެ ކާމިޔާބީ ފާހަގަކުރައްވާފަ އެވެ. އަދި އެމަނިކުފާނު ވަނީ ވިލާ ކޮލެޖުން ކުރައްވާ ބުރަ އަދި މަތިވެރި މަސައްކަތަށް ތައުރީފުކުރައްވާ އެކޮލެޖުގެ ހުރިހާ ފަރާތްތަކަށް ޝުކުރުއަދާކުރައްވާފަ އެވެ. އަދި ރޭ އެވޯޑް ހާސިލްކުރެއްވި ފަރާތްތަކަށް އެމަނިކުފާނު ވަނީ އިހްލާސްތެރިކަމާއެކު މަރުހަބާ ދަންނަވާފަ އެވެ.

ރޭހެ ހަފުލާގައި ވާހަކަފުޅު ދައްކަވަމުން ނައިބު ރައީސް ވަނީ މީހުން ބަލައިގަންނަ ފަދަ ކާމިޔާބެއް ހާސިލުވާނީ ނުހަނު ބުރަ މަސައްކަތުންކަމަށާއި އަދި އެތައް ފަރާތެއްގެ މަދަދާއި އެހީތެރިކަމުންކަމުގައި ފާހަގަކުރައްވާފަ އެވެ. އަދި މީހުންގެ ނުރަނގަޅު ވާހަކަ ދެއްކުން ހުއްޓާލައި މީހުން ހޯދާ ކާމިޔާބީތަކުގެ ވާހަކަ ދެއްކުމަށް އެމަނިކުފާނު ވަނީ ބާރުއަޅުއްވާފަ އެވެ. ހަމަ އެއާއެކު އެމަނިކުފާނު ވަނީ މަސައްކަތުގެ މާހައުލުގައްޔާއި މުޖުތަމަޢުގައި އުޅޭއިރު މީހުންނަށް އިޙްތިރާމުކުރުމަށާއި، އެހެން މީހުން ކުރާ މަސައްކަތް ބަލައިގަތުމަށާއި އެކަކު އަނެކަކަށް އެހީތެރިވެ އޯގާތެރިކަން އިސްކުރުމަށް ބާރުއަޅުއްވާފަ އެވެ.

ސްޓޫޑަންޓް އެޗީވްމަންޓް އެވޯޑް ދިނުމުގެ ހަފުލާގައި ނައިބް ރައީސް ފައިސަލް ވަނީ "ގާސިމް އިބްރާހިމް އެވޯޑް ފޮރ އެކްސެލެންސް" ހާސިލުކުރެއްވި ބައެއް ދަރިވަރުންނަށް މި އެވޯޑް ހަވާލުކޮށްދެއްވާފަ އެވެ.