ސައޫދީ އަރަބިއާގެ އިގްތިސާދު ތެލަށް ބަރޯސާ ވެފައި އޮތް އޮތުން ކުޑަކުރަން އެ ގައުމުގެ ސަރުކާރުން މަސައްކަތް ކުރަމުން އައި ނަމަވެސް އެއީ ތެލުން ހޯދަމުން އައި މަންފާ ހުއްޓުވާނެ ކަމަކަށްވުމަށް އެ ގައުމުގެ ސަރުކާރުން ޖާގައެއް ނުދެ އެވެ.

އެކަމުގެ އެންމެ ބޮޑު ހެއްކަކީ ޕެޓްރޯލިއަމް އުފައްދާ ތެޔޮ ވަޅެއް 150،000 އަކަ މީޓަރުގެ ރިސޯޓް ތީމް ޕާކަކަށް ހެދުމަށް އެގައުމުގެ ސަރުކާރުން އިއުލާން ކޮށްފައިވާ ޕްލޭނެވެ. މިއީ އެ ގައުމުގެ ފަތުރުވެރިކަމަށް ލިބޭނެ އިތުރު ކުރިއެރުމެއް ކަމަށް ސަރުކާރުން ގަބޫލު ކުރެ އެވެ.

ސައޫދީ އަރަބިއާގެ ޕަބްލިކް އިންވެސްޓްމަންޓް ފަންޑުން ހަރަދު ކޮށްގެން ހަދާ މި ރިސޯޓު ޕާކުގައި ތިން ހޮޓަލާއި 11 ރެސްޓޯރެންޓްގެ އިތުރުން ގުޅާލެވިފައިވާ އެކި ޕްލެޓްފޯތްތަކުގައި ތަފާތު ރޯލާ ކޯސްޓާ ރައިޑްތައް ހިމެނޭނެ އެވެ.

މުޅިން ތަފާތު ކޮންސެޕްޓަކަށް އިމާރާތްކުރާ މި ރިސޯޓް ޕާކަކީ ސައޫދީ އަރަބިއާގެ ފަތުރުވެރިކަމަށް ބޮޑު އިންގިލާބެއް ގެނުވާނެ ޕާކެއް ކަމަށާއި އެ ޕާކްގެ ޕްރޮމޯޝަނަލް ވީޑިއޯތައް ވަނީ މިމަހުގެ ކުރީކޮޅު އާއްމު ކޮށްފަ އެވެ.

މި ރިސޯޓު ޕާކަކީ ހާއްސަކޮށް އަރަބިއަން ގަލްފްގެ ފަތުރުވެރިންގެ މެދުގައި މަގްބޫލް މަންޒިލަކަަށް ވާނެ ކަމަށާއި ނަމަވެސް ދުނިޔޭގެ އެކި ކަނޮކޮޅުތަކުގެ ފަތުރުވެރިން ގަޔާވާ ފަދަ ހިދުމަތްތައް އެތަނުން ލިބެން ހުންނާނެ ކަމަށް ސަރުކާރުން ބުނެ އެވެ.

މިއީ ސައޫދީ އަރަބިއާގެ 2030ގެ ތަސައްވުރުގެ ދަށުން އިމާރާތް ކުރުމަށް ރާވާފައިވާ ވަރަށް މުހިއްމު ތަނެކެވެ. އެގޮތުން މި ޕާކަކީ އެ ގައުމުގެ އިގްތިސާދު ކުރިއެރުވުމަށް ހުޅުވޭނެ ފަހި ދޮރެކެވެ.

އިސްލާމީ ފަތުރުވެރިކަމުން ބޮޑު އާމްދަނީއެއް ހޯދަމުން އަންނަ ސައޫދީ އަރަބިއާއިން ދަނީ އެނޫން ބާވަތްތަކުގެ ފަތުރުވެރިކަން ކުރިއެރުވުމަށް ވެސް ގިނަ މަސައްކަތް ތަކެއް ކުރަމުންނެވެ.