އަންހެން ފަނޑިޔާރުންނަށް މެޓާނިޓީ ލީވް ލިބޭ ގޮތަށް ގާނޫނަށް އިސްލާހު ގެންނަން ނިންމައިފި އެވެ.

ޖޭއެސްސީން ނެރުރު ބަޔާނެއްގައި މީގެ ކުރިން ވަނީ އަންހެން ފަނޑިޔާރުންނަށް މެޓާނިޓީ ލީވް އާއި ފިރިހެން ފަނޑިޔާރުންނަށް ޕެޓާނިޓީލީވް ދިނުމަށް ހަމަޖެއްސުމަށް ކަމާ ބެހޭ ފަރާތްތަކަށް އެދޭނެ ކަމަށް ބުނެފަ އެވެ.

މިގޮތުން މިއަދު ޖޭއެސްސީން ވަނީ އަންހެން ފަނޑިޔާރުންނަށް މެޓާނިޓީ ލީވް ލިބޭ ގޮތް ހަދަން ގާނޫނަށް ބަދަލު ގެންނަން އެ ކޮމިޝަނުން އެޓާނީ ޖެނެރަލްގެ އޮފީހުގައި އެދިފައިވާ ކަމަށް ބުނެފަ އެވެ.

މިގޮތުން އޭޖީ އޮފީހުގެ މީޑިއާ އޮފިޝަލަކު ވަނީ ފަނޑިޔާރުންގެ ގާނޫނަށް އިސްލާހު ހުށަހަޅަން ބިލު ހުށަހަޅާ އިރު އަންހެން ފަނޑިޔާރުންނަށް މެޓާނިޓީ ލީވް ލިބޭ ގޮތަށް ބިލުގައި ހިމަނާފައިވާނެ ކަމަށް ވިދާޅުވެފަ އެވެ.

"ފަނޑިޔާރުންގެ ގާނޫނަށް އިސްލާހު ހުށަހަޅާފައިވާ ބިލުގައި އަންހެން ފަނޑިޔާރުންނަށް މެޓާނިޓީ ލީވް ދިނުން ހިމެނޭނެ،" އޮފިޝަލު ވިދާޅުވި އެވެ.

ފަނޑިޔާރުންގެ ގާނޫނަށް އިސްލާހު ގެނައުން ސަރުކާރުގެ ލެޖިސްލޭޓިވް އެޖެންޑާގައި ހިމެނުނު ނަމަވެސް މަޖިލީހުގެ މި ދައުރުގައި އެ ބިލު ހުށަނާޅާނެ ކަމަށް އޭޖީން ވަނީ ބުނެފަ އެވެ. އަދި މި މައްސަލައަކީ މީގެ ކުރިން ވެސް އިސްލާހުކުރަން ހުށަހަޅާފައިވާ މައްސަލައެކެވެ. މިގޮތުން މިފަދައިން އަންހެން ފަނޑިޔާރުންނަށް މެޓާނިޓީ ލީވް ނުލިބޭ މައްސަލަ މީގެ ކުރިން ވެސް ފަނޑިޔާރުންގެ މަހާސިންތާތަކުގައި ވަނީ ފެންމަތިވެފަ އެވެ.