ބޮލީވުޑްގެ މަޝްހޫރު ބަތަލާ އައިޝްވާރިޔާ ރާއީ ކުރިއަށް އޮތް ހިސްޓޯރިކަލް ފިކްޝަން ފިލްމު "ޕޮނިޔިން ސެލްވަން" އަންނަ އަހަރު ރިލީޒު ކުރުމަށް ނިންމައިފި އެވެ.

ރީތީގެ ރާނީ އައިޝްވާރިޔާ ފިލުމެއް ނުކުޅޭތާ ފަސް އަހަރު ފަހުން ކުޅުނު ފުރަތަމަ ފިލްމުގެ މަސައްކަތް ބާރަށް ކުރިއަށްދާއިރު، އަންނަ އަހަރުގެ މެދުތެރޭގައި މިފިލްމު ނެރުމަށް ހަމަޖެހިފައިވާ ކަމަށް ޕްރޮޑަކްޝަން ޓީމުން ވަނީ ބުނެފަ އެވެ.

މިހާރު އެ ފިލްމްގެ ޝޫޓިން ނިންމިފައިވާކަން ޕްރޮޑަކްޝަން ޓީމުން ވަނީ އިއުލާންކޮށްފަ އެވެ. ހަމަ އެހެންމެ އައިޝްވާރިޔާ ވަނީ އޭނާގެ އިންސްޓަގްރާމްގައި މި ފިލްމްގެ ޕޯސްޓަރު ހިއްސާކޮށްފަ އެވެ.

https://www.instagram.com/p/CT_Ml3QIPxf/

އިންޑިއާގެ އެންމެ ކާމިޔާބު ޑައިރެކްޓަރުންގެ ތެރޭގައި ހިމެނޭ މަތީ ރަތުނަމް ދެ ބަޔަކަށް ގެނެސްދޭ ފިލްމުގައި އައިޝްވާރިއާ ފެންނާނީ ޑަބަލް ރޯލަކުންނެވެ. އަންނަ އަހަރު ރިލީޒްކުރަން ހަމަޖެހިފައިވާ "ޕޮނިޔިން ސެލްވަން 1" ގެ ކާސްޓްގައި މައިގަނޑު ގޮތެއްގައި ހިމެނެނީ އިންޑިއާގެ ދެކުނު ފިލްމު އިންޑަސްޓްރީގެ ތަރިންނެވެ.

ފިލްމުގެ ބަތަލަކީ ވިކްރަމް އެވެ. އިތުރު ކާސްޓުންގެ ތެރޭގައި ތުރިޝާ، ކާތީ، ޖަޔަމް ރަވީ، ވިކްރަމް ޕްރަބޫ، ޕްރަކާޝް ޖާ، ޖަޔަރާމް އަދި ޝޮބީތާ ދުލިޕާލާ ހިމެނެ އެވެ.

މިއީ ކުރީގެ މަޝްހޫރު ލިޔުންޔެރިޔާ ކަލްކީ ކްރިޝްނަމުރުތީ "ޕޮނިޔިން ސެލްވަން" ގެ ނަމުގައި 1955 ގައި ގެނެސްދިން ވާހަކައަށް ބިނާކޮށް ގެނެސްދޭ ފިލުމެކެވެ.

އައިޝްވާރިޔާ އެންމެ ފަހުން ފެނިގެން ގޮސްފައިވަނީ ކަރަން ޖޯހަރްގެ 2016 ގެ "އޭ ދިލް ހެ މުޝްކިލް" އެވެ.