ކުރިއަށް އޮތް ފަސް އަހަރަށް އިލެކްޝަން ކޮމިޝަނުން އެކުލަވާލާފައިވާ ސްޓްރެޓެޖިކް ޕްލޭން އިފްތިތާހް ކޮށްފި އެވެ.

މި ޕްލޭން އިފްތިތާހް ކޮށްދެއްވީ އެކަމަށްޓަކައި ބޭއްވި ރަސްމިއްޔާތުގައި ނައިބު ރައީސް ފައިސަލް ނަސީމް އެވެ.

އިލެކްޝަންސް ކޮމިޝަންގެ ކުރިއައް އޮތް ފަސް އަހަރު ދުވަހުގެ ސްޓްރެޓެޖިކް ޕްލޭންއަކީ ކޮމިޝަންގެ އިސްތިރާޖީ އެޖެންޑާއާއި ކޮމިޝަންގެ ތަސައްވުރަށް ވާސިލްވުމަށްޓަކައި ގެނަން ކަނޑައަޅާފައި ބަދަލުތަކާއި ހާސިލްކުރަން ބޭނުންވާ ނަތީޖާތަކުގެ މަގުޗާޓު އެކުލަވާލާފައިވާ ޕްލޭންއެކެވެ. މި މަގު ޗާޓުގައި ޚިދުމަތްތައް މިހާރުގެ ޓެކްނޮލަޖީގެ ވަސީލަތްތަކާއެކު ފަސޭހަ އަދި އަވަސް ނިޒާމަކުން ދިނުމަށް ވަނީ ރާވާފަ އެވެ.

ސްޓްރެޓެޖިކް ޕްލޭން އިފްތިތާޙް ކުރުމަށް ބޭއްވި ރަސްމިއޔާތުގައި ވަނީ އެ ކޮމިޝަންގެ ތަފާސްހިސާބުތައް ފެންނަ ޕޯޓަލްއެއްވެސް އިފްތިތާހްކޮށްފަ އެވެ. މިގޮތުން www.data.elections.gov.mv މި ޕޯޓަލްއިން މި ތަފާސްހިސާބުތައް ފެންނަން ހުންނާނެ ކަމަށް އެ ކޮމިޝަނުން ބުންޏެވެ.

އިލެކްޝަން ކޮމިޝަނުން އެކުލަވާލާފައިވާ ސްޓްރެޓެޖިކް ޕްލޭން އިފްތިތާހް ކުރުމަށް ބޭއްވި ރަސްމިއްޔާތުގެ ތެރެއިން.. ފޮޓޯ: ރައީސް އޮފީސް

މި ރަސްމިއްޔާތުގައި ވަނީ އިލްކްޝަންސް ކޮމިޝަނަށް އެކި ގޮތްގޮތުން ޚިދުމަތްކޮށްދެއްވި މީހުންނަށް އެކަމުގެ އަގުވަޒަންކޮށް ހަނދާނީ ފިލާ ދެއްވާފަ އެވެ.