ކޮވިޑްގެ ބަލިމަޑުކަމާއި ގުޅިގެން އަޅާފައިވާ ފިޔަވަޅުތަކާއެކު މިއަހަރު ވެސް ޙައްޖުގެ އަޅުކަން އަދާކުރުމަށް ފުރުސަތު ލިބުނީ އެންމެ ދިވެއްސަކަށެވެ. އެއީ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އެޝިއާ ޑިރެކްޓަރެއްގެ ގޮތުގައި ރާއްޖޭގެ ފަރާތުން ހުންނެވި އަހުމަދު ސަރީރު އެވެ.

ރާއްޖެއިން އދ. ކަނޑައެޅުއްވި ސަފީރުކަމާއި ދިވެހި ޚާރިޖިއްޔާގެ ފޮރިން ސެކްރެޓަރީގެ މަގާމު ވެސް ފުރުއްވާފައިވާ ސަރީރު ގެންދަވަނީ މި އަހަރުގެ ހައްޖުގެ އަޅުކަމުގައި ބައިވެރިވެޑައިގަންނަވަމުންނެވެ.

މިއީ ފަހުގެ ތާރީޚެއްގައި އެންމެ ދިވެއްސެއް ހައްޖުގެ އަޅުކަން އަދާކުރާ ފުރަތަމަ ފަހަރު އެވެ.

މިދިޔަ އަހަރު 1،000 މީހުންނާއެކު ކުރިއަށް ގެންދިޔަ ހައްޖުގެ އަޅުކަމުގައި ފަސް ދިވެއްސަކަށް ބައިވެރިވުމުގެ ނަސީބު ލިބުނެވެ. އޭގެ ތެރޭގައި ހިމެނުނީ ސައުދީގައި ކިޔަވަމުން އަންނަ ދަރިވަރުންނާއި އެ ގައުމުގައި މަސައްކަތް ކުރަމުން އައި ބައެއް ދިވެހިންނެވެ.

މިއަހަރުގެ ހައްޖުގެ އަޅުކަން އަދާކުރުމަށް ސައުދީ ހުއްދަ ދީފައި މިވަނީ މަދު ބަޔަކަށެވެ. އެގޮތުން މިއަހަރު ހުއްދަ ދީފައިވަނީ ސައުދީގައި ދިރިއުޅޭ މީހުންގެ ތެރެއިން 60،000 މީހުންނަށެވެ. އެއީ އެ ގައުމުގެ ރައްޔިތުންނާއި ސައުދީގައި ދިރިއުޅޭ އެހެން ގައުމުތަކުގެ ރައްޔިތުން ހިމެނޭ ގޮތަށެވެ. އެގޮތުން 150 ގައުމުގެ ރައްޔިތުންނަށް ފުރުސަތު ދީފައިވެ އެވެ.

މި އަހަރުގެ ޙައްޖުގައި ބައިވެރިވުމުގެ ފުރުސަތު ސައުދީން ދީފައި ވަނީ އުމުރުން 18 އަހަރާއި 61 އަހަރާ ދެމެދުގެ މީހުންނަށެވެ. އަދި އެ މީހުންނަކީ ވެކްސިންގެ ދެ ޑޯޒް ފުރިހަމަކޮށްފައިވާ މީހުންނެވެ. އަދި މި ބައިވެރިންނަކީ ދާއިމީ ބައްޔަކަށް ބޭސްނުކުރާ އަދި ފުއްފާމޭގެ ބަލިތައް ނުހުންނަ މީހުންނެވެ.