މިދިޔަ ފެބްރުއަރީ މަހު ހަޔާ އެޑިޔުކޭޝަން މިނިސްޓްރީން ހުޅުވާލި ސްޓޫޑަންޓް ލޯން ސްކީމަށް ކުރިމަތިލި ދަރިވަރުންގެ ތެރެއިން ލޯން ލިބޭ ދަރިވަރުންގެ ލިސްޓު އާންމުކުރުން ފަސްކޮށްފި އެވެ.

އެ މިނިސްޓްރީން މިއަދު ބުނީ، ލިސްޓު ފަސްކުރަން ނިންމީ ކޮވިޑް-19 ގެ ސަބަބުން ކަމަށެވެ. އަދި މުވައްޒަފުން ގޭގައި ތިބެގެން މަސައްކަތްކުރުމަށް ސަރުކާރުން ހަމަޖައްސަވާފައިވާތީ އާއި މި މަސައްކަތް ކުރާ ބައެއް މުވައްޒަފުންނަށް ވެސް ކޮވިޑަށް ޕޮޒިޓިވްވެފައި ވާތީ ދަރިވަރުންނަށް ޖަވާބު ދިނުމަށް އިތުރު ވަގުތު ބޭނުންވާ ކަމަށް ހަޔާ އެޑިއުކޭޝަނުން ވަނީ ބުނެފަ އެވެ.

މަތީ ތައުލީމާ ލޯނު ލިބުނު ދަރިވަރުންގެ ލިސްޓު އެންމެ ފުރަތަމަ އާއްމުކުރަން ނިންމީ މިމަހުގެ 10 ވަނަ ދުވަހު އެވެ. ނަމަވެސް ލޯން ސްކީމްގެ ދާއިމީ ނަތީޖާ އިއުލާނު ކުރާނީ މިމަހުގެ 20 ވަނަ ދުވަހު ކަމަށް މިނިސްޓްރީން ބުނެ އެވެ. ލޯން ސްކީމްގެ ދަށުން 770 ފުރުސަތު ހުޅުވާލި އެވެ. މިއީ މިހާތަނަށް އެންމެ ގިނައިން ލޯންގެ ފުރުސަތު ހުޅުވާލި ފަހަރު ވެސް މެއެވެ. މިދިޔަ އަހަރު ހުޅުވާލީ 550 ފުރުސަތެވެ.

ހަޔާ އެޑިޔުކޭޝަން މިނިސްޓަރު ޑރ. އިބްރާހިމް ހަސަން މީގެ ކުރިން ވިދާޅުވެފައިވަނީ މިފަހަރު ލޯން ދިނުމުގައި ކޮންމެހެން ދަރިވަރުގެ "މެރިޓް" އަށް ނުބަލާނެ ކަމަށެވެ. އޭނާ ވިދާޅުވީ މިފަހަރުގެ ލޯން ސްކީމްގައި މިހާރު ކިޔަވަމުންދާ ދަރިވަރުންނަށް 471 ފުރުސަތާއެކު އަލަށް ކިޔަވާ ދަރިވަރުންނަށް 299 ފުުރުސަތު ހިމަނާފައިވާނެ ކަމަށެވެ.