ކްރިމިނަލް ކޯޓުގެ ގާޒީ އިސްމާއީލް ރަޝީުދުގެ ސުލޫކީ މައްސަލަ ބެލީ އަމަލުކުރަން ޖެހޭ އިޖުރާއަތްތަކާ އެއްގޮތަށް ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފި އެވެ.

ކުރީގެ ނައިބު ރައީސް އަހުމަދު އަދީބު އަދީބުގެ މައްޗަށް އުފުލި ހަތް ދައުވާގެ ހުކުމް ބާތިލުކުރި ކްރިމިނިލް ކޯޓުގެ ގާޒީ އަކީ އިސްމާއިލް އެވެ. އެމްއެމްޕީއާރްސީ ކޮރަޕްޝަނާ ގުޅިގެން އަދީބަށް ކުރި ހުރިހާ ދައުވާތަށް ބާތިލަކަމަށް ކަނޑައަޅައި ގާޒީ އިސްމާއީލް ރަޝީދު ވަނީ އަދީބު މިނިވަންކޮށްފަ އެވެ.

އެ ހުކުމުގެ މައްސަލަ ބެލުމަށްފަހު ޖޭއެސްސީން މީގެ ކުރިން ބުނެފައިވަނީ ކުރީގެ ނައިބު ރައީސް އަދީބުގެ މައްޗަށް އުފުލި ހަތް ދައުވާގެ މައްސަލާގައި އިސްމާއީލް އަމަލުކޮށްފައި ވަނީ ޖިނާއީ އިޖްރާތުގެ ގާނޫނުގެ 13 ވަނަ ބާބުގައި ބަޔާން ކޮށްފައިވާ އިޖްރާއަތްތަކާއި ފާޅުކަން ބޮޑު ގޮތެއްގައި ފަރުވާލެއް ނެތި ކަނޑައެޅިގެން ހިލާފަށް ކަމަށެވެ.

ޖުލައި 12، 2020 ގައި އަދީބުގެ މައްޗަށް އުފުލުނު އުފުލުނު ދައުވާތަކާއި ގުޅިގެން ހުކުމް ކޮށްފައިވާއިރު އެ ދުވަހު ކުރި ހުކުމަކީ ފެބްރުއަރީ 22، 2020 ވަނަ ދުވަހުން ފެށިގެން ތައްޔާރުވެފައިވާ ހުކުމެއްކަން ތަހުގީގަށް ހޯދުމުގެ ޕެންޑްރައިވްގައިވާ މައުލޫމާތުން އެނގޭ އޭރު ޖޭއެސްސީއިން ވަނީ ބުނެފަ އެވެ.

އޭގެ އިތުރުން އޭރު ޖޭއެސްސީއިން ބުނެފައި ވަނީ، ތަހުގީގަށް ހޯދުނު ޕެންޑްރައިވްގައި "އިޖްރާއީ ގޮތުން ނިންމާ ނިންމުން" މި ސުރުހީގެ ދަށުން ތައްޔާރު ކޮށްފައިވާ ލިޔުމުގައިވާ ނުކުތާތަކާއި ހުކުމްގައިވާ ނުކުތާތަކަކީ އެއް ނުކުތާތަކެއް ކަމަށެވެ. ޕެންޑްރައިވްގައި އެ ނިންމުން ލިޔެ ސޭވްކޮށްފައި ވަނީ ފެބްރުއަރީ 22 ގައެވެ. އަދި ޕެންޑްރައިވްގައި ސޭވްކޮށްފައިވާ "އިޖްރާއީ ގޮތުން ނިންމާ ނިންމުން" މި ސުރުހީގެ ދަށުން ތައްޔާރުކޮށްފައިވާ ލިޔުން ސޭވްކޮ ށްފައިވާ ނަމަކީ "trip finale v2" ކަމަށާ މި ނަމަކީ އާންމު ގޮތެއްގައި މި ބާވަތުގެ ފައިލެއް ފަނޑިޔާރަކު ސޭވް ކުރާނެ ނަމެއްކަން ސަބަބުވެރި އިންސާނެއްގެ ވިސްނުމުން ވިސްނާއިރު ގަބޫލު ނުކުރެވޭ ކަމަށް ޖޭއެސްސީއިން ވަނީ ބުނެފަ އެވެ.

https://hurihaa.mv/4948

ތަހުގީގަށް ހޯދުނު މައުލޫމާތު އާއްމުކުރުމުން އިސްމާއިމް ވަނީ އޭގެ އެއް ދުވަސް ފަހުން އިސްތިއުފާ ދެއްވައިފަ އެވެ. އިސްތިއުފާ ދެއްވިކަން އަންގާ ނެރުނު ބަޔާނުގައި އޭނާ ވިދާޅުވީ، މަގާމުން ވަކިކުރަން މަޖިލީހަށް ފުނުވިއިރު އޭނާއަށް ޖަވާބުދާރީ ވާނެ ފުރުސަތު ދީފާއިނުުވާ ކަމަށެވެ.

"ޕެންޑްރައިވް އަކުން ފެނުނު ފައިލެއްގެ މައްސަލާގައި އަޅުގަނޑު ވަކިކުރަން ނިންމިއިރު އެ ޕެންޑްރައިވް އަކީ އަޅުގަނޑުގެ ޕެންޑްރައިވް އެއް ނޫން. ޕެންޑްރައިވްއާ ގުޅޭ ގޮތުން އަޅުގަނޑާއި ސުވާލެއްވެސް ކުރެވިފައެއް ނުވޭ. ގައިރު ހާޒިރުގައި ފެނުނު ޕެންޑްރައިވް އަކުން ފެންނަ ފައިލްއަކާއި މެދު އަޅުގަނޑު ޒިންމާވުމަކީ ހަމަ ބުއްދި ގަބޫލުކުރާނެ ހަމައެއް ނޫން" ގާޒީ އިސްމާއީލް ރަޝީދު ވިދާޅުވި އެވެ.

އިސްތިއުފާގެ ސިޓީގައި ޖޭއެސްސީގެ ނިންމުން އިސްމާއީލް ސިފަކޮށްފައި ވަނީ އިންސާފެއް ނެތް ޒާތީ ނިންމުމެއްގެ ގޮތުގަ އެވެ. އަދި ވިދާޅުވެފައި ވަނީ މިހާތަނަަށް މަސައްކަތް ކޮށްފައިވާނީ ގާނޫނުއަސާސީ އާއި އިސްލާމީ ޝަރީއަތަކީ އަސާސްކަމުގައި ބަލައިގެން އިންސާފާއި ހަމަހަމަ ގޮތުގައި ކަމަށް އޭނާ ވިދާޅުވެފައިވެ އެވެ.

އިސްމާއީލްގެ އެ ތުހުމަތުތަކަށް ރައްދު ދެއްވާ މިއަދު ޖޭއެސްސީއިން ބުނީ، ކްރިމިނަލް ކޯޓުގެ ކުރީގެ ގާޒީ އިސްމާއީލުގެ މައްސަލަ އެ ކޮމިޝަނުން ބަލަން ނިންމާފައި ވަނީ މިދިޔަ އަހަރުގެ ޖުލައި 15 ވަނަ ދުވަހު ކަމަށެވެ. ހަމަ އެދުވަހު މައްސަލަ ބަލަން ނިންމާފައިވާ ކަމަށާއި ތަހުގީގު ކުރަނީ ކޮން މައްސަލައެއް ކަން ބަޔާންކޮށް އިސްމާއީލް ރަޝީދަށް ސިޓީއެއް ފޮނުވި ކަމަށާއި އަދި މިދިޔަ އަހަރުގެ ޖުލައި 18 ވަނަ ދުވަހު އިސްމާއީލު އެ ކޮމިޝަނަށް ހާޒިރުކޮށް ބަޔާން ނަގައިފައި ވާނެ ކަމަށާއި ތަހުގީގު ކުރިއަށް ގެންގޮސްފައި ވަނީ ދިފާއީ ވަކީލަކާ އެކުގައި ކަމަށެވެ.

އިތުރަށް ބުނީ، އިސްމާއީލުގެ އެ މައްސަލަ ނިންމައި މިއަހަރުގެ ފެބްރުއަރީ 25 ވަނަ ދުވަހު ތަހުގީގީ ރިޕޯޓު ހަވާލުކޮށް، އެ ރިޕޯޓަށް ލިޔުމުން ޖަވާބު ދިނުމަށް އިސްމާއީލް ރަޝީދަށް އެންގެވި ކަމަށެވެ. ނަމަވެސް ލިޔުމުން ޖަވާބު ދޭން އަންގާފައިވާ މުއްދަތު ހަމަވިއިރު ވެސް ޖަވާބުދާރީ ވެފައި ނުވާ ކަމަށާއި، ތަހުގީގީ ރިޕޯޓާ ގުޅޭ ގޮތުން އިތުރަށް ވާހަކަ ދައްކަވަން ބޭނުން ނުވާ ކަމަށް އީމެއިލެއް މެދުވެރިކޮށް އިސްމާއީލް ވިދާޅުވިކަށް ޖޭއެސްސީއިން ވަނީ ބުނެފަ އެވެ.

އީމެއިލް މެދުވެރިކޮށް އިސްމާއީލް އިތުރަށް ބުނެފައި ވަނީވަނީ ތަގުގީގަށް ދީފައިވާ ބަޔާނަށް ރިއާޔަތްކޮށް އަވަހަށް މައްސަލަ ނިންމަވައި ދިނުން ކަމުގައި ވެސް ޖޭއެސްސީ އިން ބުނެ އެވެ. ޖޭއެސްސީ އިން އިތުރަށް ބުނީ އިސްމާއީލުގެ މައްސަލައިގައި ތަހުގީގީ މަރުހަލާފައި ގާނޫނުން ލިބިދީފައިވާ ހުރިހާ ފުރުސަތެއް އެމަނިކުފާނަށް ދީފައިވާނެ ކަމަށާއި އެއްވެސް އިޖުރާއަތަކާއި ހިލާފު ވެފައި ނުވާނެ ކަމަށެވެ.