ކުއަލަ ލަމްޕޫރު (24 މެއި) މެލޭޝިއާގެ ވެރިރަށް ކުއަލަ ލަމްޕޫރުގައި ލައިޓް ރެއިލް ޓްރާންސިޓް (އެލްއާރުޓީ) ގެ ދެރޭލު ޖެހި ނުރައްކާތެރި އެކްސިޑެންޓެއް ހިނގައި ގިނަ ބަޔަކަށް އަނިޔާވެއްޖެ އެވެ.

މި އެކްސިޑެންޓް ހިނގާފައިވަނީ ހޯމަ ދުވަހު ކުއަލަ ލަމްޕޫރުގެ ބިމުއަޑިން އަޅާފައިވާ ކެލަނަ ޖާޔާ ރޭލު ދަގަނޑުގައި ދަތުރު ކުރަމުން ދަނިކޮށް ދެ ރޭލު ޖެހިގެންނެވެ. އެކްސިޑެންޓްގައި 213 މީހަކަށް އެކިވަރުގެ އަނިޔާ ލިބިފައިވާއިރު އޭގެތެރެއިން 47 މީހަކަށް ސީރިއަސް އަނިޔާތަކެއް ލިބިފައިވާ ކަމަށް އެ ގައުމުގެ ޓްރާންސްޕޯޓް މިނިސްޓްރީ އިން ބުނެފައިވެ އެވެ. ނަމަވެސް އެއްވެސް މީހަކު މަރުވެފައި ނުވާކަމަށް ވެސް އެ އިދާރާއިން ބުނެ އެވެ.

އެކްސިޑެންޓްވި ދެރޭލުގެ ތެރެއިން އެއްރޭލަކީ ޑްރައިވަރަކާ ނުލާ ދުއްވާ އޮޓޯމޭޓަޑް ރޭލަކަށް ވީއިރު އަނެއް ރޭލަކީ ޑްރައިވެރެއްގެ އެހީއާއެކު ދުއްވާ ރޭލެކެވެ. އެއްރޭލު ދުއްވާފައި ދިޔައީ ހުސްކޮށް ކަމަށް ވިޔަސް އަނެއް ރޭލުގައި ގިނަ އަދަދަކަށް ފަސިންޖަރުން ތިއްބެވެ. އެކްސިޑެންޓް ހިނގަން މެދުވެރިވީ ޑްރައިވަރާއެކު ދުއްވަމުން ދިޔަ ރޭލުގެ ޑްރައިވަރާއި ކޮންޓްރޯލް ސެންޓަރާއި ދެމެދު ދިޔަ މުއާސަލާތުގެ މައްސަލަ އަކުންނެވެ.

މި އެކްސިޑެންޓާއެކު މެލޭޝިއާގެ ބޮޑު ވަޒީރު މުޙްޔިއްދީން ޔާސީން ވަނީ ހާދިސާގެ ފުރިހަމަ ތަހުގީގެއް ކުރުމަށް ޓްރާންސްޕޯޓް މިނިސްޓްރީ އަށާއި ރޭލު އޮޕަރޭޓަރަށް އަމުރު ނެރުއްވާފަ އެވެ.

ކެލަނަ ޖާޔާ އަކީ މެލޭޝިއާގައި ފުރަތަމަ އުފެދުނު އޮޓޯމޭޓަޑް މެޓްރޯ ސިސްޓަމް އެވެ. 37 ސްޓޭޝަން ހިމެނޭ މި ސިސްޓަމް އަކީ އެ ގައުމުގެ އެންމެ ބާރުބޮޑު ދަތުރުފަތުރު ކުރުމުގެ ނިޒާމެވެ.—ސްޓްރެއިޓް ޓައިމްސް