ކުރީގެ ނައިބު ރައީސް އަހުމަދު އަދީބު އަދީބުގެ މައްޗަށް އުފުލި ހަތް ދައުވާގެ ހުކުމް ބާތިލުކުރި ކްރިމިނިލް ކޯޓުގެ ގާޒީ އިސްމާއިލް ރަޝީދު މަގާމުން ވަކި ކުރުމުގެ މައްސަލަ ދިރާސާކޮށް ގޮތެއް ނިންމަން މަޖިލީހުގެ ޖުޑީޝަރީ ކޮމެޓީއަށް ފޮނުވާފައިވަނިކޮށް އޭނާ މަގާމުން އިސްތިއުފާ ދެއްވައިފި އެވެ.

އިސްމާއިލް ރަޝީދާ ގުޅޭގޮތުން ބެލި މައްސަލައަށް ފަހު ޖޭއެސްސީން ބުނީ ކުރީގެ ނައިބު ރައީސް އަހުމަދު އަދީބު އަދީބުގެ މައްޗަށް އުފުލި ހަތް ދައުވާގެ މައްސަލާގައި ގާޒީ އިސްމާއީލް ރަޝީދު އަމަލުކޮށްފައި ވަނީ ޖިނާއީ އިޖްރާތުގެ ގާނޫނުގެ 13 ވަނަ ބާބުގައި ބަޔާން ކޮށްފައިވާ އިޖްރާއަތްތަކާއި ފާޅުކަން ބޮޑު ގޮތެއްގައި ފަރުވާލެއް ނެތި ކަނޑައެޅިގެން ހިލާފަށް ކަމަށެވެ. އެމްއެމްޕީއާރްސީ ކޮރަޕްޝަނާ ގުޅިގެން އަދީބަށް ކުރި ހުރިހާ ދައުވާތަށް ބާތިލަކަމަށް ކަނޑައަޅައި ގާޒީ އިސްމާއީލް ރަޝީދު ވަނީ އަދީބު މިނިވަންކޮށްފަ އެވެ.

ޖުލައި 12، 2020 ގައި އަދީބުގެ މައްޗަށް އުފުލުނު އުފުލުނު ދައުވާތަކާއި ގުޅިގެން ހުކުމް ކޮށްފައިވާއިރު އެ ދުވަހު ކުރި ހުކުމަކީ ފެބްރުއަރީ 22، 2020 ވަނަ ދުވަހުން ފެށިގެން ތައްޔާރުވެފައިވާ ހުކުމެއްކަން ތަހުގީގަށް ހޯދުމުގެ ޕެންޑްރައިވްގައިވާ މައުލޫމާތުން އެނގޭ ކަމަށް ވެސް ޖޭއެސްސީން ވަނީ ބުނެފަ އެވެ.

އޭގެ އިތުރުން ޖޭއެސްސީން ބުނީ، ތަހުގީގަށް ހޯދުނު ޕެންޑްރައިވްގައި "އިޖްރާއީ ގޮތުން ނިންމާ ނިންމުން" މި ސުރުހީގެ ދަށުން ތައްޔާރު ކޮށްފައިވާ ލިޔުމުގައިވާ ނުކުތާތަކާއި ހުކުމްގައިވާ ނުކުތާތަކަކީ އެއް ނުކުތާތަކެއް ކަމަށެވެ. ޕެންޑްރައިވްގައި އެ ނިންމުން ލިޔެ ސޭވްކޮށްފައި ވަނީ ފެބްރުއަރީ 22 ގައެވެ. އަދި ޕެންޑްރައިވްގައި ސޭވްކޮށްފައިވާ "އިޖްރާއީ ގޮތުން ނިންމާ ނިންމުން" މި ސުރުހީގެ ދަށުން ތައްޔާރުކޮށްފައިވާ ލިޔުން ސޭވްކޮ ށްފައިވާ ނަމަކީ "trip finale v2" ކަމަށާ މި ނަމަކީ އާންމު ގޮތެއްގައި މި ބާވަތުގެ ފައިލެއް ފަނޑިޔާރަކު ސޭވް ކުރާނެ ނަމެއްކަން ސަބަބުވެރި އިންސާނެއްގެ ވިސްނުމުން ވިސްނާއިރު ގަބޫލު ނުކުރެވޭ ކަމަށް ޖޭއެސްސީއިން ވަނީ ބުނެފަ އެވެ.

އެ ނަމަކީ އަދީބުގެ މައްސަލައާ ގުޅުން ނެތް އާދަޔާ ހިލާފު ނަމެއް ކަން ފާހަގަވާތީ އާއި ގާޒީ އިސްމާއީލް ރަޝީދު ބޭނުން ކުރުމަށް ކޮމްޕިއުޓަރު ސިސްޓަމް ކްރިމިނަލް ކޯޓުގައި ހުންނައިރު ކޯޓްގައި ހިނގާ މައްސަލަތަކެއްގެ ލިޔެކިޔުންތައް ޕެންޑްރައިވްއެއްގައި ގެންގުޅުމާއި އަދި ވަކިން ހާއްސަކޮށް ވަކި މައްސަލަތަކެއްގެ ލިޔެކިޔުންތައް އެކަނި އެ ޕެންޑްރައިވްގައި ހުރުމާއި މައްސަލަތަކެއްގެ ދައުވާ ހުށައެޅުމާ ހަމައަށް ވެސް ނުދަނީސް އެ މައްސަލަތައް ނިންމާނެ ގޮތުގެ ފައިލް އެ ޕެންޑްރައިވްގައި ތައްޔާރުވަމުން ދިއުމަކީ ފަނޑިޔާރުގެ އަމަލުުތަކާމެދު ސުވާލު އުފެދޭނެ ކަމެއް ގޮތުގައި ޖޭއެސްސީން ވަނީ ސިފަކޮށްފަ އެވެ.

ޖޭއެސްސީީން ގަބޫލުކުރާ ގޮތުގައި އަދީބުގެ މައްސަލަތަކުގައި ގާޒީ އިސްމާއީލް ރަޝީދު ހުކުމްކޮށްފައި ވަނީ އެއްވެސް ފަރާތެއްގެ ނުފޫޒެއް ނެތި މިނިވަންކަމާ މުސްތަގިއްލު ކަމާއެކު ނޫނެވެ އެހެންކަމުން ގާޒީ އިސްމާއީލް ރަޝީދު ފަނޑިޔާރުންގެ ގާނޫނާއި ފަނޑިޔާރުންގެ ސުލޫކީ މިންގަނޑާ ކަނޑައެޅިގެން ހިލާފުވެފައި ވާތީ އިސްމާއީލް ރަޝީދު މަގާމުން ވަކިކުރަން ހުށަޙެޅީ ކަމަށް ޖޭއެސްސީން ވަނީ ބުނެފަ އެވެ.

މަގާމުން އިސްތިއުފާ ދެއްވާކަން ހާމަކުރައްވާ އިސްމާއީލް ރަޝީދު ފޮނުއްވެވި ސިޓީގައި ޖޭއެސްސީގެ ތުހުމަތުތަށް ދޮގުކުރެ އެވެ. އަދި މަގާމުން ވަކިކުރަން މަޖިލީހަށް މައްސަލަ ފޮނުވާފަައިވަނީ ޖަވާބުދާރީވުމަށް އެއްވެސް ފުރުސަތެއް ނުދެއްވާ ކަމަށްވެސް އޭނާ ވިދާޅުވި އެވެ.

"ޕެންޑްރައިވް އަކުން ފެނުނު ފައިލެއްގެ މައްސަލާގައި އަޅުގަނޑު ވަކިކުރަން ނިންމިއިރު އެ ޕެންޑްރައިވް އަކީ އަޅުގަނޑުގެ ޕެންޑްރައިވް އެއް ނޫން. ޕެންޑްރައިވްއާ ގުޅޭ ގޮތުން އަޅުގަނޑާއި ސުވާލެއްވެސް ކުރެވިފައެއް ނުވޭ. ގައިރު ހާޒިރުގައި ފެނުނު ޕެންޑްރައިވް އަކުން ފެންނަ ފައިލްއަކާއި މެދު އަޅުގަނޑު ޒިންމާވުމަކީ ހަމަ ބުއްދި ގަބޫލުކުރާނެ ހަމައެއް ނޫން" ގާޒީ އިސްމާއީލް ރަޝީދު ވިދާޅުވި އެވެ.

އިސްތިއުފާގެ ސިޓީގައި ޖޭއެސްސީގެ ނިންމުން ގާޒީ އިސްމާއީލް ރަޝީދު ސިފަކޮށްފައި ވަނީ އިންސާފެއް ނެތް ޒާތީ ނިންމުމެއްގެ ގޮތުގަ އެވެ. އަދި ވިދާޅުވެފައިވަނީ މިހާތަނަަށް މަސައްކަތް ކޮށްފައިވާނީ ގާނޫނުއަސާސީ އާއި އިސްލާމީ ޝަރީއަތަކީ އަސާސްކަމުގައި ބަލައިގެން އިންސާފާއި ހަމަހަމަ ގޮތުގައި ކަމަށް އޭނާ ވިދާޅުވެފައިވެ އެވެ. އަދި ވަކި ފަރުދަކަށް ގާނޫނުން ބޭރުން ނުހައްގު ފައިދާ އެއް ހޯދާދީ އިންސާފުން ބޭރުން އެއްވެސް ކަމެއް ކޮށްފައި ނުވާނެ ކަމަށް ވެސް ގާޒީ ވިދާޅުވެފައިވެ އެވެ.