ދުނިޔޭގެ އެންމެ މަގުބޫލު އެއް ޓީވީ ސީރީޒް ކަމަށްވާ "ގޭމް އޮފް ތްރޯންސް"ގައި "މަދަރް އޮފް ޑްރެގަންސް" ނުވަތަ ޑެނޭރިސް ޓާގޭރިއަންގެ ރޯލުން ފެނިގެންދިޔަ މަޝްހޫރު ބަތަލާ އެމީލިއާ ކްލާކް އެ ސީރީޒްގެ ކޮންމެ އެޕިސޯޑަކަށް ލިބުނު މުސާރައާ ބެހޭގޮތުން ދެކެވޭ ވާހަކަތަކުގެ ހަގީގަތް ހާމަކޮށްފި އެވެ.

ދާދި ފަހުން ދިން އިންޓަވިއުއެއްގައި، ސީރީޒްގެ ކުރީކޮޅުގެ ސީޒަންތަކުގައި އޭނާއަށް ކޮންމެ އެޕިސޯޑަކަށް 300,000 އެމެރިކާ ޑޮލަރު (ގާތްގަނޑަކަށް 4.6 މިލިއަން ދިވެހި ރުފިޔާ) ލިބުނު ކަމަށް މީޑިއާ ތަކުގައި ފެތުރިފައިވާ އަޑުތަކާ ގުޅޭގޮތުން ސުވާލު ކުރުމުން އެމީލިއާ ވަނީ އެއީ ކަނޑައެޅިގެން ދޮގެއް ކަމަށް ބުނެފަ އެވެ.

އެމީލިއާ ސާފު ކޮށްދިން ގޮތުގައި، ސީރީޒްގެ ފުރަތަމަ ކޮޅު އޭނާއަށް ލިބުނީ އެއަށްވުރެ މާ ކުޑަ މުސާރަ އެކެވެ.

"އަހަރެން ބޭނުން މި ވާހަކަ ސާފުކޮށްދޭން. އަހަރެންނަށް ފުރަތަމަ ސީޒަންތަކުގައި އެޕިސޯޑަކަށް 300,000 ޑޮލަރެއް ނުލިބޭ. އެއީ މުޅިން ދޮގު ވާހަކައެއް. އެ ދުވަސްވަރު އަހަރެމެންނަކީ އަދި ކެރިއަރު ފެށި މަދު ބަޔަކަށްވުމުން، މުސާރަވެސް ހުރީ އެ ފެންވަރުގައި،" އެމީލިއާ ބުންޏެވެ.

ނަމަވެސް ސީރީޒްގެ ފަހު ސީޒަންތަކަށް (ހާއްސަކޮށް 7 އަދި 8 ވަނަ ސީޒަނަށް) ދިޔައިރު ޝޯގެ މަގުބޫލުކަން އިންތިހާއަށް ބޮޑުވެ، އެމީލިއާ އާއި ޝޯގެ އެހެން މައިގަނޑު ތަރިން (ކިޓް ހެރިންގްޓަން، ލީނާ ހީޑީ، އަދި ޕީޓާ ޑިންކްލޭޖް ފަދަ ތަރިން) ވަނީ އެޕިސޯޑަކަށް 500,000 ޑޮލަރަށްވުރެ ގިނައިން މުސާރައިގެ ގޮތުގައި ހޯދާފަ އެވެ.

މީޑިއާ ތަކުން ކުރީގެ ސީޒަންތަކުގެ މުސާރަ އޮޅުވާލާފައިވާތީ އެމީލިއާ ބޭނުންވީ ހޮލީވުޑްގައި އޭނާ ކުރި ބުރަ މަސައްކަތާއި ކަންކަން ހަގީގަތުގައި ހިނގި ގޮތް ފޭނުންނަށް ރަނގަޅަށް ހާމަ ކޮށްދޭށެވެ.