ހުޅުމާލެ ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑިފައިވަނީ، މަގު ހެދުމުގެ މަސައްކަތުގެ ތެރެއިން ކޮންނަނިކޮށް ހައި ވޯލްޓޭޖް ކޭބަލަކަށް ގެއްލުން ލިބިގެން ކަމަށް ސްޓެލްކޯއިން ބުނެފި އެވެ.

ހުޅުމާލެ ދެވަނަ ފިޔަވަހިން ކުއްލިއަކަށް ކަރަންޓު ކެނޑުނީ 2:25 ހާއިރު އެވެ.

ސްޓެލްކޯ އިން ބުނީ މިހާރު ދަނީ ކޭބަލް މަރާމާތުކޮށް، ވީ އެންމެ އަވަހަކަށް ހިދުމަތް އަލުން ފޯރުކޮށްދިނުމުގެ މަސައްކަތް ކުރަމުން ކަމަށެވެ.

ކަރަންޓުގެ ހިދުމަތް މެދުކެނޑިފައިވާ ސަރަހައްދުތަކަކީ:

  • ހިޔާ ޓަވަރު 5، 6
  • 7 ވިނަރެސްގެ 10 ޓަވަރު
  • އަމާން ދޯދި 12، 13، 14، 15 އަދި 16
  • އަމާން އުދަރެސް 5 އަދި 6
  • އެމްޕީއެލް ޓަވަރުތައް

މިމަހުގެ 12 ވަނަ ދުވަހު ވެސް ހުޅުމާލޭގެ ދެވަނަ ފިޔަވަހީގެ ބައެއް ޓަވަރުތަކުން ކަރަންޓު ކެނޑިގެން ކަނު އަނދިރީގައި އެތައް ގަޑިއިރެއް ހޭދަކުރަން ޖެހުނެވެ. އެ ދުވަހު އެ ސަރަހައްދުން ކަރަންޓު ކެނޑުނީ ކަރަންޓު ދޭން އަޅާފައިވާ މައި ކޭބަލަކަށް ގެއްލުންވުމުން ކަމަށް ސްޓެލްކޯއިން ބުނެ އެވެ.