ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމަކީ ރައީސް މުހައްމަދު މުއިއްޒުގެ ވައުދު ފޮތުގައި އޮތް ކަމެއް ނޫން ކަމަށް ކުރީގެ ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.

ކ. މާފުށީގައި ބޭއްވި އެމްޑީޕީގެ ކެމްޕޭން ޖަލްސާއެއްގައި ވާހަކަފުޅު ދައްކަވަމުން ސޯލިހު ވިދާޅުވީ ދެ އިންތިހާބު އެއްކޮށްލުމުގެ ވޯޓަކީ ގޮތްނޭނގޭ ވޯޓެއް ކަމަށެވެ.

އެމަނިކުފާނު ވިދާޅުވީ އެ ވޯޓުގެ ސަބަބުން ނުކުންނާނެ ނަތީޖާ ރައްޔިތުންނަށް ސާފުކޮށްނުދެވޭ ކަމަށެވެ.

"ވެރިޔަކު ވެރިކަމަށް މި އަންނަނީ ރައްޔިތުންނަށް ވައުދުތަކެއް ވެ، މެނިފެސްޓޯއެއް އެކުލަވާލައިގެން. މިހާރު ވެރިކަމުގައި މި ހުންނެވި ރައީސް މުއިއްޒުގެ އެ ވައުދު ފޮތުގައި އެކަން އެބައޮތްތޯ؟،" ސޯލިހު ސުވާލު އުފެއްދެވި އެވެ.

މިއީ މަޖިލިސް އިންތިހާބުގެ ތެރޭގައި ވެސް ރައީސް މުއިއްޒު ދެއްކެވި ވާހަކައެއް ނޫންކަން ފާހަގަކުރައްވައި ކުއްލިގޮތަކަށް އެކަން ނުކުރެވިގެން އުޅޭތީ އެމަނިކުފާނު ސުވާލު އުފެއްދެވި އެވެ.

"ފަސް އަހަރު ދުވަހަށް އިންތިހާބު ކުރެއްވި ބޭފުޅުން މި ތިއްބެވީ. އޭގައި ދެއްކިތޯ މި އިންތިހާބު ކުރަނީ ހަތަރު އަހަރާއި ހަ މަސްދުވަހަށޭ. އެ ވާހަކައެއް ވެސް ނެތް. ހަމަ ހިތަށް، ވިސްނުމަށް އައީމައި އެކަން ކޮށްލަން ގެނެސްފައި އެ އޮތީ،" ސޯލިހު ވިދާޅުވި އެވެ.

ފެންނަ ނުފެންނަ ވޯޓުގައި އަހާ ސުވާލު

"ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވާފައިވާ ގާނޫނުއަސާސީ އަށް 8 ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވަން ފެނޭ ހެއްޔެވެ؟"