މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން، ދުނިޔޭގެ ވައިގެ ދަތުރުފަތުރަށް ދިމާވެފައިވާ ބުރޫއެރުންތަކާ ގުޅިގެން، ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ކަމާގުޅޭ ވުޒާރާތަކާއި ސިނާއަތުގެ ބައިވެރިންނާ ގުޅިގެން ހަރުދަނާ ފިޔަވަޅުތަކެއް އަޅަން ފަށައިފި އެވެ.

ދަތުރުތައް މެދުކެނޑުމުގެ ސަބަބުން ފަތުރުވެރިންނަށާއި މި ދާއިރާގައި މަސައްކަތްކުރާ ފަރާތްތަކަށް ކުރިމަތިވަމުންދާ ދަތިތަކަށް ހައްލެއް ހޯދައިދިނުމަށްޓަކައި، ވިޒިޓް މޯލްޑިވްސްއިން އިސްކަންދެނީ ފަތުރުވެރިންގެ ރައްކާތެރިކަން ކަށަވަރުކުރުމަށާއި ރާއްޖޭގެ ފަތުރުވެރިކަމަށް ކުރާ ނޭދެވޭ އަސަރު ކުޑަކުރުމަށެވެ.

މިހާތަނަށް ކުރެވުނު މަސައްކަތްތަކުގެ ތެރެއިން، ވިޒިޓް މޯލްޑިވްސްގެ އެހީތެރިކަމާއެކު ޖަރުމަނުވިލާތާއި ފަރަންސޭސިވިލާތް ހިމެނޭހެން ޖުމްލަ އަށް ރިޕެޓްރިއޭޝަން ފްލައިޓް ވަނީ ބާއްވާފަ އެވެ.

މީގެ އިތުރުން، ވެލާނާ އިންޓަނޭޝަނަލް އެއާޕޯޓުގައި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާއި ޓޫރިޒަމް މިނިސްޓްރީގެ އެހީތެރިކަމާއެކު ހާއްސަ ‘ހެލްޕް ޑެސްކް’ އެއް ވަނީ ގާއިމުކުރެވިފަ އެވެ. މި ޑެސްކު މެދުވެރިކޮށް ދަތުރުވެރިންނަށް ބޭނުންވާ އިރުޝާދާއި އެހީތެރިކަން ދަނީ ފޯރުކޮށްދެމުންނެވެ.

ކުރިމަތިވެފައިވާ މި ހާލަތުން އަރައިގަތުމަށްޓަކައި، ވިޒިޓް މޯލްޑިވްސްއިން ދަނީ އެކި އެއާލައިންތަކާއެކު މަޝްވަރާކޮށް އިތުރު ފްލައިޓްތައް ބޭއްވޭނެ އިންތިޒާމުތައް ހަމަޖައްސަމުންނެވެ. އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެމެހެއްޓުމަށްޓަކައި، ދަތުރުފަތުރަށް މާބޮޑު ބުރޫއެއް އަރާފައިނުވާ އިންޑިއާ، ޗައިނާ އަދި ރަޝިއާ ފަދަ މާކެޓުތަކަށް އަމާޒުކޮށްގެން ހާއްސަ ކެމްޕޭންތަކެއް ހިންގުމަށް ސިނާއަތުގެ ބައިވެރިންނާއެކު ވަނީ މަސައްކަތް ފަށާފަ އެވެ. މިގޮތުން ޓުއާ އޮޕަރޭޓަރުންނާއި އެޖެންޓުންނާ ގުޅިގެން ކުރިއަށްގެންދާ މި ހަރަކާތްތަކަކީ ފަތުރުވެރިކަމުގެ ދާއިރާއަށް ލިބޭ ގެއްލުން ކުޑަކުރުމަށް އެޅޭ މުހިންމު ފިޔަވަޅެކެވެ.

މުސްތަގްބަލަށް ރޭވުމުގެ ގޮތުން، ވިޒިޓް މޯލްޑިވްސްއިން ދަނީ ރާއްޖޭގެ ފަތުރުވެރިކަމަށް ހާއްސަ ‘ކްރައިސިސް ރެސްޕޮންސް ސްޓްރެޓެޖީ’ އެއް އެކުލަވާލަމުންނެވެ. މި މަސައްކަތުގެ ދަށުން، ސިނާއަތުގެ ބައިވެރިންނާ ބައްދަލުކޮށް، މައުލޫމާތު ހިއްސާކުރުމާއި ކުރިމަތިވެފައިވާ ގޮންޖެހުންތަކުން އަރައިގަތުމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރުމަށް ވަނީ ނިންމާފަ އެވެ. ވިޒިޓް މޯލްޑިވްސްގެ އަމާޒަކީ، ހުރިހާ ބައިވެރިންގެ އެއްބާރުލުމާއެކު މި ދަތި ވަގުތުގައިވެސް ރާއްޖޭގެ ފަތުރުވެރިކަން ކުރިއަށްގެންދިއުމެވެ.