އިޒްރޭލާއި އެމެރިކާއިން އީރާނުގެ އެކި ސަރަހައްދުތަކަށް ވައިގެ މަގުން ވަރުގަދަ ހަމަލާތަކެއް ދެމުންދާއިރު، އީރާނުގެ މުޅި ގައުމުން އިންޓަނެޓްގެ ހިދުމަތް މެދުކެނޑިފައި އޮންނަތާ ހަތް ދުވަސް ވެއްފައިވާ ކަމަށް މީޑިއާ ރިޕޯޓުތަކުން ބުނެފި އެވެ.

އިންޓަނެޓްގެ ހިދުމަތް މޮނިޓަ ކުރާ ނެޓްބްލޮކްސްއިން ހާމަކުރި ގޮތުގައި، ފާއިތުވި 168 ގަޑިއިރު ނުވަތަ ހަތް ދުވަހަށްވުރެ ގިނަ ދުވަސް ވަންދެން އީރާނުގެ ރައްޔިތުންނަށް ދުނިޔޭގެ އިންޓަނެޓްގެ ހިދުމަތެއް ނުލިބެ އެވެ.

މި ބްލެކްއައުޓަކީ އީރާނުގެ ކަމާބެހޭ ފަރާތްތަކުން ގަސްދުގައި އަޅާފައިވާ ފިޔަވަޅެއް ކަމަށް ބެލެވެ އެވެ. މީގެ ބޭނުމަކީ މައުލޫމާތު ފެތުރުން ހަމައެކަނި ދައުލަތުގެ މީޑިއާތަކާއި ސަރުކާރުން ކޮންޓްރޯލްކުރާ މެސެޖިން ހިދުމަތްތަކަށް ހަނިކުރުމެވެ. މީގެ ސަބަބުން އާންމު ރައްޔިތުންނަށް ބޭރު ދުނިޔެއާ މުއާމަލާތް ކުރުމުގައި ބޮޑެތި ހުރަސްތަކެއް ވަނީ ކުރިމަތިވެފަ އެވެ.

ނެޓްބްލޮކްސްއިން ބުނާ ގޮތުގައި، ހަމަލާތަކަށްފަހު މަދު ގަޑިއިރުތަކެއްގެ ތެރޭގައި އިންޓަނެޓްގެ ހިދުމަތް ވަނީ ކުރިން ހުރި މިންވަރަށްވުރެ 1 އިންސައްތައަށް ވުރެ ދަށަށް ގޮސްފަ އެވެ. އަދި މިއަދާ ހަމައަށްވެސް އިންޓަނެޓްގެ ހާލަތު ހުރީ އެ ފެންވަރުގަ އެވެ. މިއީ ކުރިންވެސް އީރާނުގައި އިންޓަނެޓް ހިދުމަތް ވަރަށް ބޮޑަށް ހަނިކޮށްފައި އޮތް ދަނޑިވަޅެއްގައި ދިމާވި ކަމެކެވެ.

މި ބްލެކްއައުޓްގެ ތެރޭގައިވެސް ސަރުކާރުގެ އިސް އޮފިޝަލުންނާއި ދައުލަތުގެ މީޑިއާތަކަށް އިންޓަނެޓްގެ ހިދުމަތް ލިބެމުންދާކަން ވަނީ ފާހަގަކުރެވިފަ އެވެ. މިއީ ހަނގުރާމައިގެ މި ނާޒުކު ދަނޑިވަޅުގައި މައުލޫމާތު ކޮންޓްރޯލް ކުރުމަށް ސަރުކާރުން ބޭނުންކުރާ އުކުޅެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެ އެވެ.

އީރާނުގެ އިންޓަނެޓް ކަނެކްޓިވިޓީ އެއްކޮށް ދަށަށް ދިޔައީ ފެބްރުއަރީ 28 ވަނަ ދުވަހު ތެހެރާންގެ މެދުތެރޭގެ ސަރަހައްދުތަކަށް ބޮން އެޅިތާ މަދު މިނެޓްކޮޅެއްގެ ތެރޭގަ އެވެ. އެ ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އާއި، އޭނާގެ އާއިލާގެ ބައެއް މެންބަރުންނާއި އަދި އަސްކަރިއްޔާގެ އިސް ކޮމާންޑަރުންތަކެއް ވަނީ އަވަހާރަވެފަ އެވެ.