ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން ހުރި ބިމުގައި އާ މިސްކިތެއް އަޅަން ނިންމުމުން އެކަމާ ދެކޮޅަށް އަޑު އުފުލަން ފަށައިފި އެވެ.

ބަންޑާރަ މިސްކިތް ޒަމާނީ ފެންވަރަށް ތަރައްގީކުރުމުގެ މަސައްކަތް ރޯދައިގެ ފަހުން ފަށާނެ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވަނީ މިއަދު ވިދާޅުވެފަ އެވެ. އަދި އެ މަސައްކަތްކުރަނީ ދީލަތި ފަރާތެއްގެ އެހީގައި ކަމަށް ޝަހީމް ވިދާޅުވި އެވެ.

100 އަހަރުވީ ބަންޑާރަ މިސްކިތް ތަޅާލުމާ ދެކޮޅަށް ސޯޝަލް މީޑިއާގައި ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.

އެކަމާ ގުޅިގެން ކުރީގެ ހެރިޓޭޖް މިނިސްޓަރު ޔުމްނާ މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ ބަންޑާރަ މިސްކިތަކީ 98 އަހަރުވެފައިވާ މާލޭގެ މުހިއްމު ދީނީ، ތާރީހީ އަދި ސަގާފީ ބިނާއެއް ކަމަށެވެ. ރާއްޖޭގެ އެފަދަ ތާރީހީ ބިނާތަކާއި ސަގާފީ ތަރިކަ ރައްކާތެރިކުރުމަށް ސަގާފީ ތަރިކަ ގާނޫނެއް ހަދައި ތަސްދީގުކޮށްފައިވާ ކަމަށް ޔުމްނާ ވިދާޅުވި އެވެ.

ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން ވިދާޅުވީ ބަންޑާރަ މިސްކިތަކީ ގާތްގަނޑަކަށް 100 އަހަރުވެފައިވާ މިސްކިތަކަށްވާއިރު އެތަނަކީ މާލޭގައި މިހާރު ހުރި ތާރީހީ ބިނާއެކޭ ބުނެވިދާނެ ހައެއްކަ ބިނާގެ ތެރޭގައި ހިމެނޭ ތަނެއް ކަމަށެވެ.

ތާރީހު ދިރާސާ ކުރައްވާ ބޭފުޅެއް ކަމަށްވާ ނާޖިހު ދީދީ އެކްސްގައި ވިދާޅުވީ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމަކީ ކޮށްގެންވާނެ ކަމެއް ނޫން ކަމަށެވެ. ރާއްޖޭގެ ތާރީހާ ގުޅިފައިވާ އަދި މިހާރު 98 އަހަރުވެފައިވާ ތަނެއް ނައްތާލުމަކީ ތާރީހަށް ދެވޭނެ އިއާދަނުކުރެވޭނެ ގެއްލުމެއް ކަމަށް އޭނާ ވިދާޅުވި އެވެ.

ކަންބޮޑުވުންތަކާ ގުޅިގެން މިނިސްޓަރު ޝަހީމް ވިދާޅުވީ ރާއްޖޭގެ އާސާރީ މިސްކިތްތަކިގެ ލިސްޓެއް އޮންނަ ކަމަށާއި ބަންޑާރަ މިސްކިތަކީ އާސާރީ ތަނެއްގެ ގޮތުގައި ކަނޑައަޅާފައި ނެތް ކަމަށެވެ.