އަލް އަބްރާރް އުމްރާ ގުރޫޕުގެ ހަވާލުގައި އުމްރާއަށް ފުރުމަށް ރޭ ހަމަޖެހުނު މީހުންގެ ތެރެއިން ނުފުރުނު 28 މީހަކަށް ހައްޖު ކޯޕަރޭޝަނުން ޖާގަ ހަމަޖައްސައިދީފައިވާ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު ހަމްދާން ޝަކީލް މިއަދު ވިދާޅުވެއްޖެ އެވެ.

އަލް އަބްރާރު ގްރޫޕުން 110 މީހަކު އުމްރާއަށް ގެންދަން ފައިސާ ނަގާ ހުރިހާ އިންތިޒާމުތަކެއް ހަމަޖެއްސުމަށް ފަހު، ފަހު ވަގުތު ދަތުރު ކެންސަލްކުރި މައްސަލަ ފުލުހުން ދަނީ ބަލަމުންނެވެ. މި ދަތުރުގައި 110 މީހުން ފުރަން އޮތް އިރު، އޭގެން ކޮންމެ މީހަކު ވަނީ 45،000 ރުފިޔާ ދައްކާފަ އެވެ.

އުމްރާއަށް ދިއުމަށް އެ ގުރޫޕަށް ފައިސާ ދެއްކި މީހުންނަށް އުމްރާ އަށް ނުފުރުނު މައްސަލައެއް ފެންމަތިވީ ރޭގަ އެވެ. އެ މައްސަލާގައި ބަޔަކު ވަނީ އެ ޖަމާއަތުގެ އޮފީސް ހުންނަ ސަރަހައްދަށް ރޭ އެއްވެ ކަންބޮޑުވުން ވެސް ފާޅުކޮށްފަ އެވެ.

ހަމްދާން އެކްސްގައި ކުރެއްވި ޕޯސްޓެއްގައި ވިދާޅުވީ މި ރޯދަމަހު އުމްރާގެ އަޅުކަމަށް ގެންދާނެ ކަމަށް ބުނެ އެ ގުރޫޕުން ގިނަ ބައެއްގެ އަތުން ފައިސާ ނެގުމަށް ފަހު އުމްރާގެ އިންތިޒާމުތައް ހަމަޖައްސާފައި ނުވާ ކަމަށެވެ.

އޭގެ ތެރެއިން ގިނަ ބައެއްގެ އެދުމުގެ މަތިން، ހައްޖު ކޯޕަރޭޝަނުގައި ޖާގަ އޮތް މިންވަރަކުން 28 މީހުންނަށް ޖާގަ ދީފައިވާނެ ކަމަށް ވެސް އޭނާ ވިދާޅުވި އެވެ. އެ 28 މީހުން މިހާރު ޖިއްދާ އަށް ދަތުރު ކުރަމުންދާ ކަމަށް އޭނާ ވިދާޅުވި އެވެ.

އުމްރާއަށް ދިއުމަށް އަލް އަބްރާރް ޖަމާއަތަށް ފައިސާ ދެއްކި މީހުންގެ ތެރެއިން އެ ގުރޫޕުގެ އޮފީހަށް ދިޔަ މީހުން ބުނެފައިވާ ގޮތުގައި އުމްރާ އަށް ފުރުމުގެ ކުރިން އެ ދުވަހުގެ ހެނދުނު ދަބަސްތައް ގެންދިއުމަށް އެންގި އެވެ. އެކަމަކު ފަހުން އެންގީ އެއާޕޯޓަށް ދަމުން ދަބަސް ގެންދިއުމަށް ކަމަށް ފައިސާ ދެއްކި މީހަކު ބުނެފައިވެ އެވެ.

އެ ތަނުން އެކަކު ބުނި ގޮތުގައި އެ އެންގުމަށް ފަހު، ގްރޫޕުން ވަނީ ކުއްލި ބައްދަލުވުމެއް ބާއްވައިފަ އެވެ. އުމްރާ ދަތުރު ކެންސަލް ކުރިކަން އެ ބައްދަލުވުމުގައި އަންގައި ސަބަބެއް ކަމަށް ބުނީ، މިހާރު މެދުއިރުމަތީގައި ހިނގަމުންދާ ހަނގުރާމަ އަށް މި މަހުގެ 26 ގެ ފަހުން ވެސް ވާނެ ގޮތެއް ނޭނގޭތީ ކަމަށެވެ. އެ މީހުން ތުހުމަތުކުރާ ގޮތުގައި ރޯދަ އުމްރާ އަށް މީހުން ގެންދިއުމުގެ ހުއްދަ އާއި ވިސާ އާއި ހޮޓަލަށް ވެސް ފައިސާ ދައްކައިފައެއް ނެތެވެ.

އެ މައްސަލާގައި އެ ކުންފުނީގެ އޮފީސް ދޮށަށް އެއްވި މީހުން ވަނީ އެ މީހުންގެ ރިފަންޑު ދިނުމަށް އާދޭސްކޮށްފަ އެވެ. އެހެންވެ ޓިކެޓް ފައިސާ ފިޔަވައި އެހެން ހުރިހާ ހަރަދަކަށް ރިފަންޑު ދިނުމުގެ މަސައްކަތް ރޭގައި ކޮށްފައިވެ އެވެ.

އިކޮނޮމިކް މިނިސްޓްރީގެ ބިޒްނަސް ރަޖިސްޓްރޭޝަން ޕޯޓަލުގައިވާ ގޮތުން އަލް އަބްރާރް ގްރޫޕުގެ ހިއްސާދާރުންގެ ގޮތުގައި ތިން މީހަކު އެބަ ތިއްބެވެ. އެއީ އަހުމަދު އައްފާން ޝާފީ އާއި އާދަމް ބިންޔާމިން އަދި ޔޫސުފް ސިދްގީ އެވެ.