އެމެރިކާއާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައިގެ މަސްރަހަށް އިންވެސްޓަރުން ސަމާލުކަން ދެމުންދާއިރު، މިއަދު އޭޝިއާގެ ހިއްސާގެ ބާޒާރުތައް ވިދިވިދިގެން ތިންވަނަ ދުވަހަކަށް ވަނީ ދަށަށް ގޮސްފަ އެވެ.

ހަމަނުޖެހުންތަކާއެކު ދުނިޔޭގެ ބާޒާރުގައި ތެލުގެ އަގު އަދިވެސް ދަނީ އުފުލެމުންނެވެ.

ބާޒާރުގެ އޮއިވަރު ހުރިގޮތުން، ދެކުނު ކޮރެއާގެ ކޮސްޕީ އިންޑެކްސްގެ އަގު 6 އިންސައްތަ ދަށަށް ދިޔަ އެވެ. މީގެ އިތުރުން ޖަޕާނުގެ ނިކެއި 225 އިންޑެކްސް 3 އިންސައްތައަށް ވުރެ ބޮޑަށް ދަށަށް ދިޔައިރު، އޮސްޓްރޭލިއާގެ އޭ.އެސް.އެކްސް 200 އިންޑެކްސް ވަނީ 1.8 އިންސައްތަ ދަށަށް ގޮސްފަ އެވެ.

ވޭތުވެދިޔަ ދެ ދުވަހު ތެލުގެ އަގު ބޮޑުވަމުން ދިޔުމަށްފަހު، އޭޝިއާގެ މުއާމަލާތްތަކުގައި ބްރެންޓް ކްރޫޑް ތެލުގެ އަގު ވަނީ ގާތްގަނޑަކަށް 1.5 އިންސައްތަ އުފުލިފަ އެވެ.

މެދުއިރުމަތީގެ ހަމަނުޖެހުންތަކާ ގުޅިގެން މާލީ ބާޒާރުތަކަށް ބޮޑު ލޮޅުމެއް އަރާފައިވާއިރު، ކަނޑުދަތުރުފަތުރުގެ މުހިންމު ސަރަހައްދެއް ކަމަށްވާ ހޯމޫޒް ކަނޑުއޮޅި ކައިރިން ބައެއް އުޅަނދުފަހަރަށް ހަމަލާދިނުމާ ގުޅިގެން ދުނިޔޭގެ ހަކަތައިގެ އަގުތައް ވަނީ މި ހަފުތާގައި އިންތިހާއަށް އުފުލިފަ އެވެ. ދުނިޔޭގެ ތެލާއި ގޭހުގެ ގާތްގަނޑަކަށް ފަސްބައިކުޅަ އެއްބައި އާންމުކޮށް އުފުލަނީ އީރާނާއި ޔޫއޭއީއާ ދެމެދު އޮންނަ މި ހަނި ކަނޑުއޮޅިންނެވެ. ނަމަވެސް، އީރާނުން ކަނޑުއޮޅި ބަންދުކޮށް ދަތުރުފަތުރު މަނާކުރުމާ ގުޅިގެން، އެ ސަރަހައްދުގެ ދަތުރުފަތުރުތައް މިހާރު ވަނީ ގާތްގަނޑަކަށް މުޅިން ހުއްޓިފަ އެވެ.

ހަނގުރާމައިގެ ސަބަބުން ކުރިމަތިވެފައިވާ ހަކަތައިގެ ދަތިކަން ހައްލުކުރުމަށްޓަކައި، ބޭނުންވެއްޖެ ހާލަތެއްގައި އެ ސަރަހައްދުގެ އުޅަނދުފަހަރަށް އެމެރިކާގެ ކަނޑުގެ ސިފައިން ހިމާޔަތް ދޭނެ ކަމަށް ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވި އެވެ. އަދި ދުނިޔެއަށް ބޭނުންވާ ހަކަތަ މެދުނުކެނޑި ފޯރުކޮށްދިނުމަށްޓަކައި، އެ ސަރަހައްދުގައި ދަތުރުކުރާ ހުރިހާ ކުންފުނިތަކަށް ހެޔޮ އަގުގައި އިންޝުއަރެންސްގެ ހިދުމަތް ވޮޝިންޓަނުން ފޯރުކޮށްދޭނެ ކަމަށްވެސް އޭނާ ވިދާޅުވި އެވެ.

މިދިޔަ ހޮނިހިރު ދުވަހުން ފެށިގެން އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކަށްފަހު، ހިއްސާގެ ބާޒާރުތައް ވަނީ ވަރަށް ބޮޑަށް ދަށަށް ގޮސްފަ އެވެ. މީގެ ރައްދުގައި އީރާނުން މެދުއިރުމަތީގެ އެކި ސަރަހައްދުތަކަށް ދެމުންދާ ހަމަލާތަކުގެ ސަބަބުން ކަނޑުދަތުރުފަތުރަށާއި ވައިގެ ދަތުރުފަތުރަށް ވަނީ ބޮޑެތި ބުރޫތަކެއް އަރާފަ އެވެ.

މި ހަމަނުޖެހުންތަކުގެ ނޭދެވޭ އަސަރު އެންމެ ބޮޑަށް ކުރަނީ ބޭރު ގައުމުތަކަށް މުދާ އެކްސްޕޯޓް ކުރުމަށް ބަރޯސާވާ ޖަޕާނާއި ދެކުނު ކޮރެއާ ފަދަ ގައުމުތަކަށެވެ. ސަބަބަކީ ބައިނަލްއަގުވާމީ ސިޔާސީ މަސްރަހަށް އަންނަ މިފަދަ ލޮޅުންތަކުގެ ސަބަބުން މުދާ އުފުލުމަށް ހުރަސް އެޅި، އެ ގައުމުތަކުގެ އިގްތިސާދަށް ބޮޑެތި ގެއްލުންތަކެއް ލިބޭތީ އެވެ.