ކުޑަ އާބާދީއެއް އޮންނަ ބ.ގޮއިދޫގައި ކެންސަރު ބަލި ޖެހޭ މިންވަރު އިތުރުވާ ސަބަބު ހޯދަން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދިރާސާކުރަން ފަށާފައިވާ ކަމަށް އެގްރިކަލްޗާ މިނިސްޓަރު މަރިޔަމް މާރިޔާ މިއަދު ވިދާޅުވެއްޖެ އެވެ.

އާބާދީގައި 500 އެއްހާ މީހުން ދިރިއުޅޭ ދަނޑުވެރި ރަށެއް ކަމަށްވާ ގޮއިދޫގައި ކެންސަރު ބަލި ޖެހޭ މީހުން އިތުރުވާތީ އެކަމުގެ ކަންބޮޑުވުން ވަނީ ސަރުކާރަށް ހުށަހަޅާފަ އެވެ.

އެގޮތުން، ދަނޑުވެރި ރަށެއްކަމަށްވާ ގޮއިދޫގައި ކެންސަރު ބަލި އާންމުވުމުގެ ކަންބޮޑުވުމާއެކު އެކަމުގެ ސަބަބު ދިރާސާކޮށްދިނުމަށާއި، އެ ރަށުގެ ދަނޑުތަކުގައި ޕެސްޓިސައިޑް ބޭނުންކުރާ ގޮތް ބެލުމަށް އިންސްޕެކްޝަނެއް ހިންގައި ދިނުމަށް މިދިޔަ ޑިސެންބަރު މަހު އާންމު ރައްޔިތަކު ވަނީ އެދިފަ އެވެ.

އެ ރަށުގެ ރައްޔިތަކު ސަރުކާރުގެ ކަމާ ގުޅުންހުރި އިދާރާތަކަށް ފޮނުވި ސިޓީގައި ބުނެފައިވަނީ މިދިޔަ ފަސް އަހަރު ތެރޭގައި ގޮއިދޫގެ ނުވަ މީހަކަށް ކެންސަރު ޖެހި، ތިން މީހަކު މަރުވެފައިވާކަމަށެވެ. އަދި އެ ރަށުގެ ގިނަ ދަނޑުތަކުގައި ހައްދާ ތަރުކާރީއާއި މޭވާއަކީ އިންސާނުންގެ ފުރާނައަށް ނުރައްކާ މިންވަރަށް 'ޕެސްޓިސައިޑްސް' ހުންނަ ތަކެތި ކަމަށް ބުނެ، އެކަން ބަލައި ދިނުމަށް އެދިފައި ވެއެވެ.

މިއަދު ނޫސްވެރިންނަށް މައުލޫމާތު ދެއްވަމުން މާރިޔާ ވިދާޅުވީ، ގޮއިދޫގައި ކެންސަރު އާންމުވާ ސަބަބު ހޯދަން އެމްއެފްޑީއޭއިން މިހާރު ޓެސްޓުތައް ހަދައި، ދިރާސާތައް ހަދަމުން އަންނަ ކަމަށެވެ.

ދަނޑުތަކުގައި ބޭނުންކުރާ ބޭސް ނުވަތަ ޕެސްޓިސައިޑާ ގުޅޭގޮތުން މާރިޔާ ވިދާޅުވީ، ކަމާ ގުޅުން ހުރި ގާނޫނެއް އޮތް ނަމަވެސް މިހާތަނަށް ސިޔާސަތެއް ހަދައިފައިނުވާ ކަމަށެވެ. ނަމަވެސް މިދިޔަ އަހަރު މި ސަރުކާރުން ވަނީ ޕެސްޓިސައިޑް ބޭނުންކުރުމާ ގުޅޭ ސިޔާސަތެއް ހެދުމުގެ މަސައްކަތް ފަށައިފައި ކަމަށް އޭނާ ވިދާޅު ވިއެވެ.

ވަރަށް އަވަހަށް އެ ޕޮލިސީ ތަންފީޒުވެގެން ދާނެކަމަށް އުންމީދު ކުރައްވާ ކަމަށް މިނިސްޓަރު ވިދާޅުވި އެވެ.