ސައުދީ އަރަބިއްޔާގެ ވެރިރަށް ރިޔާޟްގައި ހުންނަ އެމެރިކާގެ އެމްބަސީއަށް ދެ ޑްރޯން ހަމަލާއެއް އަމާޒުވެ، އެމްބަސީ ހިމެނޭ ސަރަހައްދުގައި އަލިފާނުގެ ހާދިސާއެއް ހިނގައިފި އެވެ.

މީގެ އިތުރުން ބަޙްރައިންގައި ހުންނަ އެމެރިކާގެ އަސްކަރީ މަރުކަޒަށް ވެސް ހަމަލާދީފައިވާ ކަމަށް އީރާނުން ވަނީ ބުނެފަ އެވެ. މި ހަމަލާތަކަކީ އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކުގެ ބަދަލުހިފުމުގެ ގޮތުން ދިން ހަމަލާތަކެއް ކަމަށް ބެލެ ވެއެވެ.

އަންގާރަ ދުވަހުގެ ފަތިހު ރިޔާދުގައި ހުންނަ އެމެރިކާ އެމްބަސީއަށް ދިން މި ހަމަލާގައި އެ އިމާރާތަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށް ސައުދީ ދިފާއީ ވުޒާރާއިން ނެރުނު ބަޔާނެއްގައި ބުނެފައި ވެއެވެ. އަދި އީރާނުން ދެމުންދާ ބަދަލުހިފުމުގެ ހަމަލާތަކުގެ ތެރެއިން، އިތުރު ޑްރޯންތަކެއް އެ ސަރަހައްދަށް އަމާޒުވަމުންދާ ކަމުގެ ރިޕޯޓްތަކެއް ވެސް ވަނީ ލިބިފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް "ނިއުސްނޭޝަން" މީޑިއާއަށް ދެއްވި ބަސްދީގަތުމެއްގައި ވިދާޅުވީ، އެމްބަސީއަށް ދިން ހަމަލާއާއި އެމެރިކާގެ ސިފައިން މަރުވި މައްސަލައިގައި އެމެރިކާއިން ދޭނެ ރައްދު ވަރަށް އަވަހަށް ފެނިގެންދާނެ ކަމަށެވެ. "ވަރަށް އަވަހަށް އެކަން އެނގޭނެ،" ޓްރަމްޕް ވިދާޅުވި އެވެ.

ރޮއިޓާސް ނޫސް އެޖެންސީން ރިޕޯޓްކޮށްފައިވާ ގޮތުގައި، ބޭރު ގައުމުތަކުގެ އެމްބަސީތައް ހުންނަ ރިޔާދުގައި "ޑިޕްލޮމެޓިކް ކުއާޓާ" ސަރަހައްދުން މި ހަމަލާއަށްފަހު ކަޅު ދުން އަރަމުންދާތަން ވަނީ ފެނިފަ އެވެ. ބައެއް މަސްދަރުތަކުން ބުނާ ގޮތުގައި އެމްބަސީ ސަރަހައްދުން ބާރުގަދަ ގޮވުމެއްގެ އަޑު އިވި، އަލިފާން ރޯވެފައިވާ މަންޒަރު ފެނުނު ނަމަވެސް، ސައުދީ ދިފާއީ ވުޒާރާއިން ބުނެފައިވަނީ އެއީ ވަރަށް ކުޑަ އަލިފާނުގެ ހާދިސާއެއް ކަމަށެވެ.

މި ހަމަލާ ދިން ވަގުތު އެމްބަސީ އިމާރާތުގައި އެއްވެސް މީހަކު ނެތް ކަމަށާއި، މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައި ނުވާ ކަމަށް ރޮއިޓާސްއިން ބުނެ އެވެ. ސައުދީ އަސްކަރިއްޔާއާ ގާތް މަސްދަރަކުން އޭއެފްޕީ ނިއުސް އެޖެންސީއަށް މައުލޫމާތު ދިން ގޮތުގައި، ރިޔާދުގެ ޑިޕްލޮމެޓިކް ސަރަހައްދަށް އަމާޒުކޮށް ފޮނުވާލި ހަތަރު ޑްރޯނެއް ސައުދީގެ ވައިގެ ދިފާއީ ނިޒާމުން ވަނީ ވައްޓާލާފަ އެވެ.

"މިއީ މީގެ ކުރިން ދުވަހަކުވެސް ކަން ހިނގާފައިވާ ގޮތެއް ނޫން"

ވޮޝިންގްޓަނުން ރިޕޯޓްކުރި އަލްޖަޒީރާގެ ނޫސްވެރިޔާ މައިކް ހެނާ ބުނި ގޮތުގައި، ގައުމު ބޮޑު ހަނގުރާމައެއްގެ ތެރޭގައި އޮތް ވަގުތެއްގައި، ރައީސް ޓްރަމްޕް މީޑިއާތަކަށް މައުލޫމާތު ދެއްވަމުން ގެންދަވަނީ ވަރަށް އާދަޔާ ހިލާފު ގޮތަކަށެވެ. އޭނާ ފާހަގަކުރި ގޮތުގައި، ހަމަލާތައް ފެށުނީއްސުރެ ރައީސް ގެންދަވަނީ ވަކިވަކި ނޫސްވެރިންނަށް ފޯނުން ގުޅުއްވައި ކުދިކުދި މައުލޫމާތުކޮޅުތައް ދެއްވަމުންނެވެ. ނަމަވެސް މުޅި ހަނގުރާމައިގެ ހާލަތާ ބެހޭ އެކަށީގެންވާ ތަފްސީލީ މައުލޫމާތެއް އެމެރިކާގެ ރައްޔިތުންނަށް ލިބެމުން ނުދާ ކަމަށް އޭނާ ބުންޏެވެ.

"ހަނގުރާމައެއްގެ ވަގުތުގައި ގައުމެއްގެ ރައީސަކު މިފަދަ ގޮތަކަށް އަމަލުކުރެއްވުމަކީ މީގެ ކުރިން ދުވަހަކުވެސް ފެނިފައިވާ ކަމެއް ނޫން. މިއީ ކުރިއަށް އޮތް ދުވަސްތަކާއި މަސްތަކުގައި އެމެރިކާގެ ރައްޔިތުން ސުވާލު އުފައްދާނެ ކަމެއް،" ހެނާ ބުންޏެވެ.

އަންގާރަ ދުވަހުގެ ކުރީކޮޅު، ރިޔާދު، ޖިއްދާ އަދި ދަހްރާންގައި ތިބި އެމެރިކާގެ ރައްޔިތުން ރައްކާތެރިކަމުގެ ފިޔަވަޅެއްގެ ގޮތުން ތިބި ތަނަކުން ބޭރަށް ނުނިކުމެ މަޑުކުރުމަށް އެމެރިކާ އެމްބަސީން ވަނީ އަންގާފަ އެވެ.

ބަޙްރައިނަށް ދިން ހަމަލާތައް

މީގެ އިތުރުން، އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ވަނީ ބަޙްރައިންގައި ހުންނަ އެމެރިކާގެ ވައިގެ އަސްކަރީ މަރުކަޒަކަށް ހަމަލާދީފައިވާ ކަމަށް ބުނެފަ އެވެ. އީރާނުގެ ރަސްމީ ނިއުސް އެޖެންސީ (އައިއާރުއެންއޭ) އިން ރިޕޯޓްކުރި ގޮތުގައި، ބަޙްރައިންގެ ޝައިޚް އީސާ ސަރަހައްދުގައި ހުންނަ އެމެރިކާގެ މަރުކަޒަށް އީރާނުގެ ކަނޑުގެ ސިފައިން ވަނީ ޑްރޯން އަދި މިސައިލް ހަމަލާތަކެއް ދީފަ އެވެ.

އައިއާރުޖީސީގެ ބަޔާނުގައިވާ ގޮތުން، 20 ޑްރޯން އަދި ތިން މިސައިލް ބޭނުންކޮށްގެން ދިން މި ހަމަލާގައި އެ މަރުކަޒުގެ މައި ކޮމާންޑް ހެޑްކުއާޓާސް ވަނީ ސުންނާފަތިކޮށްލާފައެވެ. ނަމަވެސް މިކަމުގެ އެއްވެސް ހެއްކެއް މިހާތަނަށް ދައްކާފައެއް ނުވެއެވެ.

އީރާނުން މި ހަމަލާތައް ދީފައިވަނީ، މިދިޔަ ހޮނިހިރު ދުވަހުން ފެށިގެން އެމެރިކާއާއި އިޒްރޭލުން އީރާނަށް ދެމުންދާ ހަމަލާތަކުގެ ބަދަލުހިފުމުގެ ގޮތުންނެވެ.