އީރާނާ ދެކޮޅަށް ކުރާ ހަނގުރާމަ 4 ނުވަތަ 5 ހަފުތާއަށް ދެމިގެންދާނެ ކަމަށް ލަފާކުރެވޭ ކަމަށާއި، ނަމަވެސް އެއަށްވުރެ މާ ގިނަ ދުވަހު ހަނގުރާމަ ކުރިއަށް ގެންދިއުމުގެ ގާބިލުކަން އެމެރިކާގެ އަސްކަރިއްޔާގައި އެބަހުރި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހޯމަ ދުވަހު ވައިޓް ހައުސްގައި ވާހަކަފުޅު ދައްކަވަމުން ޓްރަމްޕް ވަނީ އިޒްރޭލާއި ގުޅިގެން އީރާނާ ދެކޮޅަށް ހަނގުރާމައަށް ދާންޖެހުނު ސަބަބުތައް ހާމަކުރައްވާފަ އެވެ. އެގޮތުން އީރާނަކީ އެމެރިކާއަށް އޮތް "ބޮޑު ނުރައްކަލެއް" ކަމަށް ސިފަކުރެއްވި އެވެ. އަދި މިދިޔަ އަހަރުގެ ޖޫން މަހު އެމެރިކާއިން އިރާނަށް ދިން ހަމަލާތަކުގެ ސަބަބުން އެ ގައުމުގެ ނިއުކްލިއާ ޕްރޮގްރާމް އެއްކޮށް ނައްތާލެވިފައިވާ ކަމަށް ވެސް ޓްރަމްޕް އަނެއްކާވެސް ތަކުރާރު ކުރެއްވި އެވެ.

މީގެ އިތުރުން އިރާނުގެ ބެލިސްޓިކް މިސައިލް ޕްރޮގްރާމް ހަލުވިކަމާއެކު ކުރިއަރަމުންދާ ކަމަށާއި، މިއީ އެމެރިކާއަށާއި އެހެން ގައުމުތަކުގައި ތިބި އެމެރިކާގެ ސިފައިންނަށް އޮތް ވަރަށް ބޮޑު ނުރައްކަލެއް ކަމަށް ޓްރަމްޕް ވިދާޅުވި އެވެ.

"އީރާނުގައި މިހާރުވެސް ޔޫރަޕަށާއި އަދި އެކި ސަރަހައްދުތަކުގައި ހުރި އަޅުގަނޑުމެންގެ އަސްކަރީ މަރުކަޒުތަކަށް ހަމަލާދެވޭ ފަދަ މިސައިލް އެބަހުރި. އަދި ވަރަށް އަވަހަށް އަޅުގަނޑުމެންގެ ރީތި އެމެރިކާއާ ހަމައަށް ފޯރާވަރުގެ މިސައިލް އެ ގައުމަށް ލިބުނީސް" ޓްރަމްޕް ވިދާޅުވި އެވެ. ފާހަގަކޮށްލެވޭ ގޮތުގައި، މިދިޔަ ހޮނިހިރު ދުވަހު ދިން ހަމަލާތަކާ ގުޅިގެން ޓްރަމްޕްގެ ސަރުކާރުން މިފަދަ ތުހުމަތުތައް ތަކުރާރުކުރަމުން ދިޔަ ނަމަވެސް، އެކަމުގެ އެއްވެސް ހެއްކެއް މިހާތަނަށް ދައްކާފައެއް ނުވެއެވެ.

މި ވާހަކަތަކުން ފާހަގަވެގެންދިޔައީ، އީރާނުން އެމެރިކާއަށް ވަގުތުން ކުރިމަތިވެދާނެ ނުރައްކަލެއް އޮތް ކަމަށް ވިދާޅުވުމުގެ ބަދަލުގައި، އީރާނަކީ ދުރު މުސްތަގުބަލެއްގައި ކުރިމަތިވެދާނެ ނުރައްކަލެއްގެ ގޮތުގައި ޓްރަމްޕް ސިފަކުރެއްވި ކަމެވެ.

ދުރު ރާސްތާގެ މިސައިލާއި ނިއުކްލިއާ ހަތިޔާރު ލިބިފައިވާ އީރާނަކީ މެދުއިރުމައްޗަށާއި އެމެރިކާގެ ރައްޔިތުންނަށް ކެތްނުކުރެވޭނެ ފަދަ ނުރައްކަލަކަށް ވާނެ ކަމަށް ވެސް ޓްރަމްޕް ވިދާޅުވި އެވެ.

އެމެރިކާގެ ގާނޫނުތަކާއި ބައިނަލްއަގުވާމީ ގާނޫނުތައް ބުނާގޮތުން، ބޭރު ގައުމަކަށް ހަމަލާދެވޭނީ އެ ގައުމަކުން ވަގުތުން ކުރިމަތިވެދާނެ ނުރައްކަލެއް އޮތް ނަމަ އެކަން ހުއްޓުވުމަށެވެ. އަދި އެމެރިކާގެ ގާނޫނުއަސާސީ ބުނާގޮތުން ހަނގުރާމަ އިއުލާނު ކުރުމުގެ ބާރު އޮންނަނީ ކޮންގްރެސްއަށެވެ. ރައީސަށް އަމިއްލަފުޅަށް ފިޔަވަޅު އެޅުއްވޭނީ ވަގުތުން ކުރިމަތިވާ ނުރައްކަލެއް ހުއްޓުވުމަށެވެ.

އެމެރިކާއާއި އިޒްރޭލުން ހަމަލާތައް ފެށިފަހުން ޓްރަމްޕް ވަނީ ދެ ވީޑިއޯ މެސެޖެއް ނެރުއްވާފަ އެވެ. އިއްޔެ ނެރުއްވި މެސެޖެއްގައި އޭނާ ވިދާޅުވީ އީރާނުން ވަނީ "ތަހުޒީބީ އިންސާނިއްޔަތާ ދެކޮޅަށް ހަނގުރާމަ" ފަށާފައި ކަމަށެވެ.

މެދުއިރުމަތީގައި ތިބި އެމެރިކާގެ ސިފައިންގެ ތެރެއިން ތިން މީހަކު މަރުވެފައިވާކަން ޕެންޓަގަންއިން ކަށަވަރުކޮށްދީފައިވާއިރު، ކުރިއަށް އޮތް ތަނުގައި އިތުރު ސިފައިން މަރުވުމަކީ އެކަށީގެންވާ ކަމެއް ކަމަށް ވެސް ޓްރަމްޕް ވިދާޅުވި އެވެ.

މިހާތަނަށް ލިބިފައިވާ މައުލޫމާތަށް ބަލާއިރު، އީރާނުގެ ރައްދު ހަމަލާތަކުގައި އެކި ގައުމުތަކުން މީހުން ވަނީ މަރުވެފަ އެވެ. އެގޮތުން އީރާނުން 555 މީހުން، ލުބުނާނުން 13 މީހުން، އިޒްރޭލުން 10 މީހުން، ޔޫއޭއީން 3 މީހުން، އަދި އިރާގުން 2 މީހުން މަރުވެފައި ވެއެވެ. މީގެ އިތުރުން އޮމާން، ބަހްރައިން އަދި ކުވައިތުން ވެސް ކޮންމެ ގައުމަކުން މީހަކު މަރުވެފައިވާ ކަމަށް ރިޕޯޓްކޮށްފައި ވެއެވެ.

ހޯމަ ދުވަހު އެމެރިކާގެ ހަތަރުވަނަ ސިފައިންގެ މީހަކު މަރުވިކަން ޕެންޓަގަންއިން ކަށަވަރުކޮށްދިންތާ ކުޑަވަގުތުކޮޅެއްގެ ތެރޭގައި ޓްރަމްޕް ވިދާޅުވީ، މި އޮޕަރޭޝަން ނިމޭނެ ސީދާ ތާރީޚެއް ބުނަން ނޭނގޭ ކަމަށެވެ. ނަމަވެސް ފެށުނުއިރު ލަފާކުރީ 4 ނުވަތަ 5 ހަފުތާ ކަމަށާއި، އެއަށްވުރެ މާ ގިނަ ދުވަހު ކުރިއަށް ގެންދިއުމުގެ ގާބިލުކަން އެބަހުރި ކަމަށް ވިދާޅުވި އެވެ.

އަދި އީރާނުގެ އަސްކަރީ ވެރިން "ނައްތާލުމަށް" އަސްކަރިއްޔާއިން ފުރަތަމަ ލަފާކުރީ ހަތަރު ހަފުތާ ކަމަށް ވެސް ޓްރަމްޕް ވިދާޅުވިއެވެ. މިހާތަނަށް އީރާނުގެ ރޫހާނީ މީޑިއާ އަލީ ޚާމަނާއީ އާއި، ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ އިސް ވެރިން ހިމެނޭހެން އެތައް އިސް އޮފިޝަލުންނެއް އެމެރިކާއާއި އިޒްރޭލުގެ ހަމަލާތަކުގައި މަރުވެފައިވާކަން ވަނީ ކަށަވަރުވެފަ އެވެ. މިކަމާ ގުޅިގެން ޓްރަމްޕް ވިދާޅުވީ، ތާވަލުކުރި ވަރަށްވުރެ މާ ބާރަށް ކަންކަން ކުރިއަށްދާ ކަމަށެވެ.

'އެމެރިކާ ފަސްޓް' ހަނގުރާމައެއް؟

ޓްރަމްޕް މި ވާހަކަތައް ދެއްކެވީ ޕެންޓަގަންގެ ވެރިޔާ ޕީޓް ހެގްސެތު ނޫސްވެރިންނާ ބައްދަލުކުރެއްވިތާ ކުޑަވަގުތުކޮޅެއް ފަހުންނެވެ. ހެގްސެތު ވަނީ ޓްރަމްޕްގެ "މޭކް އެމެރިކާ ގްރޭޓް އެގެއިން" (މާގާ) ހަރަކާތުގެ މީހުން، ދިގުލީ ހަނގުރާމައަކަށް އެމެރިކާ ވަދެދާނެތީ ކުރާ ކަންބޮޑުވުންތަކަށް ޖަވާބުދެއްވާފަ އެވެ.

ޓްރަމްޕްގެ ރިޔާސީ ކެމްޕޭނުގައި، ބޭރު ގައުމުތަކުގެ ކަންކަމުގެ ތެރެއަށް އެމެރިކާއިން ވަނުން ހުއްޓާލައި، އެމެރިކާގެ އެތެރޭގެ ކަންކަމަށް އިސްކަންދޭނެ ކަމަށް ވައުދުވެވަޑައިގެންފައި ވެއެވެ.

"މިއީ އިރާގު ހަނގުރާމައެއް ނޫން. މިއީ ނިމުމެއް ނެތް ކަމެއް ނޫން،" ހެގްސެތު ވިދާޅުވި އެވެ. އޭނާ ސިފަކުރެއްވި ގޮތުގައި މިއީ ވަރަށް ސާފު، ހަރުދަނާ އަދި ނަތީޖާ ނެރޭނެ މިޝަނެކެވެ. އޭގެ ބޭނުމަކީ މިސައިލްގެ ނުރައްކަލާއި، އީރާނުގެ ކަނޑުގެ ސިފައިން ނައްތާލައި، ނިއުކްލިއާ ހަތިޔާރު އުފެއްދުން ހުއްޓުވުމެވެ.

އަދި އިޒްރޭލުގެ ވެސް ސާފު މަގްސަދުތަކެއް ހުރި ކަމަށާއި، އިޒްރޭލަކީ އެމެރިކާގެ ގާބިލު ބައިވެރިއެއް ކަމަށް އޭނާ ވިދާޅުވި އެވެ. ނަމަވެސް އިޒްރޭލުގެ މަގްސަދަކީ ކޮބައިކަމެއް އޭނާ ހާމައެއް ނުކުރައްވައެވެ. އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަކީ އީރާނުގެ ސަރުކާރު ވައްޓާލުމަށް ވަކާލާތުކުރައްވާ ބޭފުޅެކެވެ.

ހެގްސެތު އިތުރަށް ވިދާޅުވީ، މި ހަނގުރާމަ ކުރިއަށް ގެންދާނީ އެމެރިކާއިން ބޭނުންވާ ގޮތަށް، އެންމެ ފުރިހަމަ ބާރާއެކު، ހަނގުރާމައިގެ ހަރުކަށި އުސޫލުތަކަކާ ނުލައި، އަދި ގައުމު ބިނާކުރުމުގެ ނަމުގައި ތާށިވެގެން ނުދާނެ ފަދަ ގޮތަކަށް ކަމަށެވެ.