ހެކި ނެތް ކަމަށް ބުނެ އައްޑޫގައި އެންމެ ފުޅާދާއިރާއެއްގައި ޑްރަގްގެ ވިޔަފާރިކުރާ ނެޓްވޯކްގެ އިސް މީހުން ބަންދުން ދޫކޮށްލަން ޕީޖީ އޮފީހުން ފުލުހުންނަށް އަންގައިފި އެވެ.

ޕީޖީ އޮފީހުން ވަނީ މިކަން ހާމަކުރުމުގެ ގޮތުން މިރޭ ބަޔާނެއް ނެރެފަ އެވެ. އެ ޑްރަގް ނެޓްވޯކުގެ އެންމެ އިސް ލީޑަރު ކަމަށް ތުހުމަތު ކުރެވެނީ ސ. ހިތަދޫ، ކޮންމުލި އަލީ ނަދީމް (މައިލޯ ނަދަމާ) އަށެވެ.

ޢަލީ ނަދީމްގެ އިތުރުން އެ މައްސަލާގައި ހައްޔަރުކުރި މީހުން:

1. ސ. ހިތަދޫ، ވެޔޮފެހެބުރުގެ، އިބްރާހީމް ސިރާޖް

2. ސ. ހިތަދޫ، ދޮރުފޮތިމާގެ، ޙަސަން އަލްފާފު

3. ސ. ހިތަދޫ، ކެކުރިމާގެ، އަމީން މުޙައްމަދު

4. ސ. ހިތަދޫ، ލޮބްސްޓަމް، ސަލާމް ސަޢީދު

5. ސ. ހިތަދޫ، ފަލާޙް، ހާފިޒް ފައުޒީ

6. ދ. ހުޅުދެލި، ޢަންބަރީގެ، ޒަޙްނާ އަޙްމަދު

ޕީޖީ އޮފީހުން ނެރުނު ބަޔާނުގައި ބަނީ އެ މައްސަލާގައި ކުރެވެނީ މައިގަނޑު ދެ ތުހުމަތެއް ކަމަށެވެ. އެއީ ގާނޫނުލްއުގޫބާތުގެ 720 ވަނަ މާއްދާގެ ދަށުން، ކުށް ކުރާ ޖަމާއަތެއްގައި ބައިވެރިވުމުގެ ކުށާއި މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން މަނީ ލޯންޑްރިންގެ ކުށް ކަމަށް އެ އޮފީހުން ބުންޏެވެ.

މައްސަލަ ތަހުގީގުކުރުމަށް ޤާނޫނުގައި ކަނޑައެޅިފައިވާ މުއްދަތު ހަމަވުމާހަމައަށް ލިބިފައިވާ ހެކި ގަރީނާ ވަޒަންކޮށް ބެލިއިރު، މި މައްސަލާގައި ތުހުމަތުކުރެވޭ މީހުން، ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑަރކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ގަރީނާ ލިބިފައި ނުވާ ކަމަށް އެ ބަޔާނުގައިވެ އެވެ.

ޕީޖީ އޮފީހުން ބުނީ މި މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން އިތުރުކޮށްދީފައިވާ ކަމަށެވެ. ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަކުރެވި، ދަޢުވާކުރެވޭ މިންވަރަށް ހެކި ގަރީނާ ހޯދިފައި ނުވާ ކަމަށް އެ ބަޔާނުގައިވެ އެވެ.

" ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ކ) ގައި، ތަހުގީގުކުރުމަށް ކަނޑައެޅިފައިވާ މުއްދަތުގެ ތެރޭގައި ދައުވާކުރެވޭ މިންވަރަށް ހެކި ލިބިފައިނުވާނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަންވާނެކަމަށް ބަޔާންކޮށްފައިވެއެވެ. އެހެންކަމުން، މި ނިންމުމާއެކު މައްސަލާގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ދިވެހި ފުލުހުންގެ ޚިދުމަތަށް ލަފާދީފައިވާނެއެވެ،" އެ ބަޔާނުގައިވެ އެވެ.

މި މައްސަލާގައި ދައުވާކުރެވޭ މިންވަރަށް މިވަގުތަށް ހެކި ޤަރީނާ ލިބިފައި ނުވާތީ މައްސަލަ ޑިކްލައިންކުރިނަމަވެސް، އާ ހެކި ލިބިއްޖެ ހާލަތެއްގައި، ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ވ) ގެ ދަށުން އަލުން ދައުވާކުރުމަށް އެދި ހުށަހެޅުމަށް ދިވެހި ފުލުހުންގެ ޚިދުމަތަށް ލަފާދީފައިވާނެ ކަމަށް ވެސް އެ ބަޔާނުގައިވެ އެވެ.