އެމެރިކާ އާއި އިޒްރޭލުން ގުޅިގެން އާދީއްތަ ދުވަހު ހިންގި އަސްކަރީ އޮޕަރޭޝަންތަކެއްގައި އީރާނުގެ ނަޓާންޒްގައި ހުންނަ އެ ގައުމުގެ އެންމެ ބޮޑު ނިއުކްލިއާ ފެސިލިޓީއަށް ހަމަލާދީފައިވާ ކަމަށް އީރާނުން އދ. ގެ ނިއުކްލިއާ ވޮޗްޑޮގަށް ކަނޑައަޅާފައި ހުންނަ ސަފީރު ރެޒާ ނަޖަފީ ވިދާޅުވެއްޖެ އެވެ.

އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ)ގެ 35 ގައުމުގެ ބޯޑް އޮފް ގަވަރުނަރުންގެ ބައްދަލުވުމެއްގައި ނޫސްވެރިންނާ ވާހަކަދައްކަވަމުން ނަޖަފީ ވިދާޅުވީ، އިއްޔެ އަނެއްކާ ވެސް އެ މީހުން ވަނީ އީރާނުގެ ސުލްހަވެރި، އަދި ރައްކާތެރި ކުރެވިފައިވާ ނިއުކްލިއާ މަރުކަޒުތަކަށް ހަމަލާދީފައި ކަމަށެވެ.

ރޮއިޓާސް ނިއުސް އެޖެންސީން ހަމަލާ އަމާޒުވީ ކޮން މަރުކަޒުތަކަކަށްތޯ ސުވާލު ކުރުމުން، ނަޖަފީ ވަނީ ސީދާ "ނަޓާންޒް" އަށް ހަމަލާދީފައިވާ ކަމަށް ވިދާޅުވެފަ އެވެ. ނަޓާންޒް އަކީ އީރާނުގެ ޔުރޭނިއަމް މުއްސަނދިކުރުމުގެ މަސައްކަތް އެންމެ ފުޅާދާއިރާއެއްގައި ކުރިއަށްގެންދާ މަރުކަޒެވެ.

މި ހަމަލާއާ ގުޅޭގޮތުން އެމެރިކާ ނުވަތަ އިޒްރޭލުން މިހާތަނަށް ރަސްމީކޮށް އެއްޗެއް ބުނެފައެއް ނުވެ އެވެ. ނަމަވެސް، މިއީ އީރާނުގެ ނިއުކްލިއާ ޕްރޮގްރާމަށް ހުރަސް އެޅުމުގެ ގޮތުން ދީފައިވާ ހަމަލާއެއް ކަމަށް ބެލެވެ އެވެ.