އެމެރިކާ އާއި އިޒްރޭލުން އީރާނަށް ދެމުންދާ ވަރުގަދަ ހަމަލާތަކާ ގުޅިގެން ދުނިޔޭގެ އިގްތިސާދަށް ބޮޑެތި ލޮޅުންތަކެއް އަރާފާނެ ކަމުގެ ބިރު ބޮޑުވެ، ތެލުގެ އަގު އުފުލިއްޖެ އެވެ.

ދުނިޔޭގެ ވިޔަފާރީގެ މުހިންމު މަގަކަށްވާ ހޯމުޒް ކަނޑުއޮޅި ބަންދުވުމުގެ ސަބަބުން ބްރެންޓް ކްރޫޑްގެ އަގު މިއަދު ވަނީ 13 އިންސައްތަ މައްޗަށް ގޮސް، ފީފާއެއްގެ އަގު 82 ޑޮލަރަށް އަރާފަ އެވެ. މިއީ ފާއިތުވި 14 މަސްދުވަހުގެ ތެރޭގައި ތެލުގެ އަގު މިހާ މައްޗަށް ދިޔަ ފުރަތަމަ ފަހަރެވެ.

މި ހަމަނުޖެހުންތަކާ ގުޅިގެން ދުނިޔޭގެ ހިއްސާގެ ބާޒާރުތަކަށް ވެސް ވަނީ ނޭދެވޭ އަސަރުތަކެއް ކޮށްފަ އެވެ. އެގޮތުން ޓޯކިޔޯގެ ނިކޭ 225 އިންޑެކްސް 2.4 އިންސައްތަ ދަށަށް ގޮސްފައިވާއިރު، ޝަންހާއީ އާއި ސިޑްނީގެ ބާޒާރުތަކުން ވެސް ވަނީ ދަށަށް ދިއުމުގެ ނިޝާންތައް ފެނިފަ އެވެ. ނަމަވެސް، ނުތަނަވަސްކަމުގެ ވަގުތުތަކުގައި އިންވެސްޓަރުން އެންމެ އިތުބާރުކުރާ ރަނުގެ އަގު ވަނީ 2.8 އިންސައްތަ މައްޗަށް ގޮސް، އައުންސެއްގެ އަގު 5,397.10 ޑޮލަރަށް އުފުލިފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ މި ހަނގުރާމަ ކުރިއަށް އޮތް ހަތަރު ހަފުތާއަށް ދެމިގެން ހިނގައިދާނެ ކަމަށާއި، އެމެރިކާގެ މަގްސަދުތައް ހާސިލްވަންދެން ހަމަލާތައް ކުރިއަށްދާނެ ކަމަށެވެ. މި ހަމަނުޖެހުންތަކުގެ ތެރޭގައި އީރާނުން ވަނީ ހޯމުޒް ކަނޑުއޮޅިން އެއްވެސް އުޅަނދަކަށް ދަތުރު ނުކުރެވޭނެ ކަމުގެ އިންޒާރު ދީފަ އެވެ. ޔޫކޭ މެރިޓައިމް ޓްރޭޑް އޮޕަރޭޝަންސް އިން ރިޕޯޓްކޮށްފައިވާ ގޮތުގައި އޮމާން އާއި ޔޫއޭއީ ކައިރިން ދަތުރުކުރި ދެ އުޅަނދަކަށް މިހާރު ވެސް ވަނީ ހަމަލާދީފަ އެވެ.

ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރާ މި މުހިންމު ކަނޑުއޮޅި ބަންދުވުމާ ގުޅިގެން، ބައިނަލްއަގުވާމީ މެރިޓައިމް އޯގަނައިޒޭޝަން އިން ވަނީ އުޅަނދުތައް އެ ސަރަހައްދުން ދަތުރު ނުކުރުމަށް އިލްތިމާސްކޮށްފަ އެވެ.

އެ ޖަމްއިއްޔާގެ ސެކްރެޓަރީ ޖެނެރަލް އާސެނިއޯ ޑޮމިންގޭޒް ވިދާޅުވީ، ކަނޑު ދަތުރުފަތުރުކުރާ ފަރާތްތަކަށް ބޮޑެތި ގެއްކުންތަކެއް ލިބެމުންދާ ކަމުގެ ރިޕޯޓްތަކާ މެދު ކަންބޮޑުވާ ކަމަށާއި، ހާލަތު ރަނގަޅުވަންދެން އެ ސަރަހައްދުން ދަތުރު ނުކުރުމަށް އެދޭ ކަމަށެވެ.

ދުނިޔޭގެ ބޮޑު ޝިޕިން ކުންފުނި މާސްކް އިން ވެސް ވަނީ ސަލާމަތީ ސަބަބުތަކަށްޓަކައި ހޯމުޒް ކަނޑުއޮޅި އާއި ސުއޭޒް ކެނަލް މެދުވެރިކޮށް ކުރާ ދަތުރުތައް މެދުކަނޑާލާފަ އެވެ. އިގްތިސާދީ މާހިރުން ލަފާކުރާ ގޮތުގައި، ހޯމުޒް ކަނޑުއޮޅި އަވަސް މުއްދަތެއްގެ ތެރޭގައި ހުޅުވައިނުލެވިއްޖެނަމަ، ތެލުގެ އަގު ފީފާއެއް 100 ޑޮލަރަށް ވުރެ މައްޗަށް ދިއުމަކީ އެކަށީގެންވާ ކަމެކެވެ.

އޯޕެކް ޕްލަސް އިން ތެޔޮ އުފައްދާ މިންވަރު އިތުރުކުރުމަށް ނިންމާފައިވީ ނަމަވެސް، އީރާނަކީ ދުނިޔޭގެ ތެލުގެ 4.5 އިންސައްތަ އުފައްދާ ގައުމަކަށް ވުމާއެކު، މި ހަމަނުޖެހުންތަކުގެ ސަބަބުން ދުނިޔޭގެ ބާޒާރަށް ތެޔޮ ސަޕްލައި ކުރުމުގައި ބޮޑެތި ގޮންޖެހުންތަކެއް ކުރިމަތިވާނެ ކަމަށް ބެލެވެ އެވެ.