"ހުރިހާ"އިން މި ރޯދަ މަހު ގެނެސްދޭ ރޯދައިގެ ސުވާލާއި ޖަވާބު ސެގްމެންޓަކީ ރަމަޟާން މަހުގެ އަޅުކަމާ ގުޅުވައިގެން އުފެދޭ ބައެއް އާއްމު ސުވާލުތަކަށް ޖަވާބު ހޯދައިދިނުމެވެ. މި ސެގްމެންޓްގައި ގެނެސްދޭ ސުވާލުތަކާއި އޭގެ ޖަވާބުތަކަކީ ދީނީ އިލްމުވެރިއެއް ކަމަށްވާ އާސިމް އަލް ހަކީމް ގެ ދީނީ ދަރުސްތަކުންނާއި ވީޑިއޯތަކުން ނަގާފައިވާ މައުލޫމާތެވެ.

ސާފުތާހިރުކަމަކީ އަހަރުމެންގެ އިސްލާމް ދީނުގައި ވެސް ބާރު އަޅުއްވާފައިވާ ކަމަކަށްވާއިރު އަމިއްލަ ސާފުތާހިރުކަމަށް ކުރެވޭ އެންމެ މުހިއްމު އެއް ކަންތައް ކަމަށްވާ ދަތް އުނގުޅުމާ ބެހޭގޮތުން އަހަރުމެންގެ ހިތުގައި ބައެއް ސުވާލުތައް އުފެދެ އެވެ.

ސުވާލު: ރޯދައަށްހުރެ ދަތް އުނގުޅުމުން ރޯދަ ގެއްލޭނެތަ؟

ޖަވާބު: ދަތް އުނގުޅުމަކީ ކީރިތި ރަސޫލާ މުހައްމަދުއް ސައްލަﷲ އަލައިހި ވަސައްލަމްގެ މަތިވެރި ވެގެންވާ ސުންނަތްތަކުގެ ތެރެއިން ސުންނަތެކެވެ. އެހެނީ ޚުދު އެކަލޭގެފާނު ވެސް ދުވާލު އެކި ފަހަރު މަތިން މިސްވަކް ބޭނުން ކުރައްވަ އެވެ.

https://youtube.com/shorts/M02WStF-QoI?si=whsDhp9IXqQYOvNw

އެއާއެކު ރަސޫލާގެ ސަހާބީން ވަނީ ރަމަޟާން މަހު ރޯދައަށް ހުންނަވައިގެން ވެސް ކީރިތި ރަސޫލާ މިސްވަކް ބޭނުން ކުރެއްވި ކަމަށް ރިވާ ކުރައްވާފަ އެވެ. އެކަމުން އެނގިގެންދަނީ ދަތް އުނގުޅުމަކީ ރޯދަ ގެއްލޭ ކަމެއް ނޫން ކަމެވެ.

ދަތް އުނގުޅުމުގައި ދަތް އުނގުޅާ ބޭސް ބޭނުން ކުރުމާމެދު އިލްމުވެރިންގެ މެދުގައި އިޚްތިލާފުތަކެއް އުފެދިފައިވީ ނަމަވެސް ދަތް އުނގުޅާ ބޭސް ނުދިރުވޭ ވަރަށް އުނގުޅައި ފެނުން އަނގަ ދޮވެ ބޭރު ކުރުމުން ރޯދައެއް ނުގެއްލޭނެ އެވެ.

ޖަވާބު ދެއްވީ: ޝެއިޚް އައްސީމް އަލް ޙަކީމް