އީރާނަށް އެމެރިކާއާއި އިޒްރޭލުން ދެމުންދާ އުދުވާނީ ހަމަލާތައް ކުށްވެރި ނުކުރައްވާ، އީރާނުން ރައްދުގައި އަރަބި ގައުމުތަކަށް ދެމުންދާ ހަމަލާތަކާ ރާއްޖެ ދެކޮޅުކަމަށް ރައީސް މުހައްމަދު މުއިއްޒު ހާމަކުރައްވައިފި އެވެ.

އަހަރަކަށް ވުރެ ގިނަ ދުވަސް ފަހުން މިއަދު ބޭއްވެވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ އީރާނުން ދެމުންދާ ހަމަލާތަކާ ގުޅިގެން އަރަބި އިސްލާމީ ގައުމުތަކުގެ ވެރިންނަށް ގުޅުއްވައި އެ ގައުމުތަކާއެކު ރާއްޖެއިން އޮތްކަން ހާމަކުރުމުގެ މަސައްކަތް ކުރައްވަމުން ގެންދަވާ ކަމަށެވެ.

ރައީސް މުއިއްޒު ވިދާޅުވީ ޔޫއޭއީގެ ރައީސަށް ރޭ ފޯނުން ގުޅުއްވައި ރާއްޖެއިން އެ ގައުމާއެކު އޮތްކަން ހާމަކުރައްވާފައިވާ ކަމަށާއި އިރާނުން ދޭ ހަމަލާތަކުގައި ބޮޑެތި ގެއްލުންތަކެއް ލިބެމުންދާ ކަމަށެވެ.

ރައީސް ވަނީ ޔޫއޭއީއަށް އީރާނުން ހަމަލާ ދިނުމުން ގެއްލުންތައް ވާކަން ފާހަގަކުރައްވާފަ އެވެ. ނަމަވެސް އީރާންއަށް އެމެރިކާއިން ދޭ ހަމަލާތަކުގައި މިހާތަނަށް 200 އަށްވުރެ ގިނަ މީހުން މަރުވެ، އެ ގައުމުގެ އިސްލާޑަރު އަލީ ހާމަނާއީ އަވަހާރަކޮށްލާފައިވާއިރު، ރައީސް އެކަމާއި ގުޅޭގޮތުން އެއްވެސް ބަހެއް ވިދާޅެއް ނުވެ އެވެ.

މީގެއިތުރުން މިއަދު ސައުދީ އަރަބިއްޔާ އާއި ބަހުރައިން އާއި އޮމާން އަދި ގަތަރުގެ ވެރިންނަށް މިއަދު ގުޅައި އެ ގައުމުތަކާއެކު ވެސް ތިއްބެވިކަން ހާމަކުރައްވާނެ ކަމަށް މުއިއްޒު ވިދާޅުވި އެވެ.

ފާހަގަކޮށްލެވޭ ގޮތުގައި އީރާނުން ހަމަލާތައް އަމާޒު ކުރަމުންދަނީ މެދުއިރުމަތީ ގައުމުތަކުގައި ހުރި އެމެރިކާގެ އަސްކަރީ މަރުކަޒު ތަކަށެވެ. ނަމަވެސް އެމެރިކާއާއި އިޒްރޭލުން ހަމަލާ އަމާޒުކުރީ އީރާންގެ އިސްވެރިންނާއި އާއްމުންނަށެވެ. އިޒްރޭލުން އީރާންގެ އަންހެން ކުދިން ކިޔަވާ ސުކޫލަކަށް ހަމަލާދީ 148 ކުދިން މަރާލާފައި ވެއެވެ.

މިހާތަނަށް އީރާންގެ އިސްލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާއި ގުޅޭގޮތުން ރާއްޖެއިން އެއްވެސް އެއްޗެއް ބުނެފައި ނުވެ އެވެ. އެކަމާއި ގުޅިގެން އާއްމުން ދަނީ ނުރުހުން ފާޅު ކުރަމުންނެވެ.