ވައިގެ މަގުން ދެކުނުގެ ހަތަރު އެއާޕޯޓު ގުޅާލުމުން ދެކުނުގެ ފަތުރުވެރިކަމާއި އިގުތިސާދަށް ފަހި ފުރުސަތުތަކެއް ތަނަވަސްވެގެން ދާނޭ ކަމަށް ޓްރާންސްޕޯޓު މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.

ދެކުނުގެ ހަތަރު އަތޮޅު ކަމަށްވާ ގއ އަތޮޅު، ގދ އަތޮޅު، ފުވައްމުލަކު ސިޓީ އަދި އައްޑޫ ސިޓީ މޯލްޑިވިއަންގެ ދަތުރުތަކުން މިހާރު ގުޅާލާފައިވާއިރު، އެ ދަތުރުތައް އަންނަ މަހު ފަށަން ވަނީ ނިންމާފަ އެވެ.

ގަން އެއާޕޯޓުގައި މިއަދު ހަވީރު ބޭއްވި ރަސްމިއްޔާތުގައި މިނިސްޓަރު އަމީން ވިދާޅުވީ، މި ހިދުމަތުގެ ސަބަބުން ދެކުނުގެ އަތޮޅުތަކަށް ދިރުން އަންނާނެ ކަމަށެވެ. ޚާއްސަކޮށް ދެކުނުގެ ފަތުރުވެރިކަމަށް ދިރުން އަންނާނެ ކަމަށް އޭނާ ވިދާޅުވި އެވެ.

"ދެކުނުގެ އަތޮޅުތަކުގައި މިހާރު ހުރި ގާތްގަނޑަކަށް 3،900 ވަރަކަށް އެނދަށް ވާސިލުވާން ފަތުރުވެރިންނަށް މި ވަނީ ފަސޭހަ ފުރުސަތުތަކެއް ތަނަވަސްވެފައި،" އޭނާ ވިދާޅުވި އެވެ.

އަމީން ވިދާޅުވީ، ޑައިވްކުރުމާއި ރާޅާއެޅުން އަދި އެ ނޫން ވެސް ކަންކަމަށް ރާއްޖެ ޒިޔާރަތްކުރާ ފަތުރުވެރިންނަށް މި ހިދުމަތުގެ ސަބަބުން ގަމުން ދެކުނުގެ އެހެން އަތޮޅުތަކަށް ދަތުރުކުރަން ލުއިވާނެ ކަމަށެވެ. މިއީ އެ ފަތުރުވެރިންނަށް ވެސް ލިބޭ ރަނުގެ ފުރުސަތެއް ކަމަށް އޭނާ ވިދާޅުވި އެވެ.

މީގެ އިތުރުން ވެސް އަމީން ވަނީ އައްޑޫ ގަން އިންޓަނޭޝަނަލް އެއާޕޯޓުގެ ހާލަތު ބަދަލުކުރައްވާނެ ކަމަށް ވިދާޅުވެފަ އެވެ.

އަމީން ވިދާޅުވީ މިހާރު ވެސް މެދުއިރުމަތީގެ އެއާލައިނަކާއި ޗައިނާގެ އެއާލައިނެއް އައްޑޫ އިންޓަނޭޝަނަލް އެއާޕޯޓަށް ގެނައުމަށް ސަރުކާރުން މަސައްކަތްކުރަމުން އަންނަ ކަމަށާއި ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް ގޭން އިންޓަނޭޝަނަލް އެއާޕޯޓަށް ގެންނަން އެބަޖެހޭކަމަށް އޭނާ ވިދާޅުވިއެވެ.

މިނިސްޓަރު ވިދާޅުވީ، އަމާޒަކީ ގަން އިންޓަނޭޝަނަލް އެއާޕޯޓަކީ ދެކުނުގެ ވައިގެ ދަތުރުފަތުރުގެ ހަބަކަށް ހެދުން ކަމަށެވެ. އެ ގޮތުން، މިއަދު ރަސްމީކޮށް އިފުތިތާހުކުރި ދެކުނުގެ ހަތަރު އަތޮޅު ގުޅާލާ މަޝްރޫއުގެ މައި މަރުކަޒަކީ ވެސް އެ އެއާޕޯޓުކަން އޭނާ ފާހަގަކުރެއްވި އެވެ.

ވައިގެ މަގުން ދެކުނުގެ ހަތަރު އެއާޕޯޓު މިއަދު ގުޅާލާފައިވާއިރު، މޯލްޑިވިއަންއިން ބުނީ މިހާރު އެ ދަތުރުތަކުގެ ބުކިންއަށް ހުޅުވާލާފައިވާ ކަމަށެވެ.

މި ހިދުމަތަށް ބޭނުންކުރާނީ ޑީއެޗްސީ-6-300 ޓްވިން އޮޓާ ބޯޓެވެ. މި ބޯޓުތަކުގައި ގާތްގަނޑަކަށް 15 ވަރަކަށް މީހުންނަށް ދަތުރުކުރެވޭނެ އެވެ.

މި ޚިދުމަތުގެ ބޭނުމަކީ ދެކުނުގެ އަތޮޅުތައް ގުޅާލައި، ސަރަހައްދީ ދަތުރުފަތުރު ހަރުދަނާކުރުމެވެ.