ހިޔާނާތުގެ ތުހުމަތު ކުރާ މީހުންނަށް އެމްޑީޕީގައި ވާދަ ނުކުރެވޭނެ ގޮތް ހަދައިފި

އެމްއެމްޕީއާރްސީގެ ޚިޔާނާތުގެ މައްސަލައިގެ ތަހުގީގު ރިޕޯޓްގައި ނަން އޮތް ފަރާތަކަށް އެމްޑީޕީގެ ގައުމީ މަޖިލީހުގެ އިންތިޚާބުގައި ވާދަނުކުރެވޭނެ ކަމަށް އެ ޕާޓީގެ ހިންގާ ކޮމެޓީން މިރޭ ފާސްކޮށްފި އެވެ.

މިރޭ ބޭއްވި ހިންގާ ކޮމެޓީގެ ބައްދަލުވުމަށް އެ ގަރާރު ހުށަހެޅުއްވީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) އެވެ.

އޭނާ ހުށަހެޅުއްވި ގަރާރުގައި ވަނީ މީހުން މެރުމާއި ރޭޕްކުރުމާއި ކުޑަކުދިންނަށް ޖިންސީ ގޯނާ ކުރުމުގެ ކުށެއްގެ ތުހުމަތުގައި ދައުވާ ކުރަން ފޮނުވާފައިވާ ފަރާތްތަކަށް މި މަހުގެ 29 ވަނަ ދުވަހު ބާއްވާ ގައުމީ މަޖިލީހުގެ އިންތިޚާބުގައި ވާދަ ނުކުރެއްވޭނެ ކަމަށެވެ.

މީގެއިތުރުން ކޮރަޕްޝަންގެ މައްސަލަތައް ބެލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އުފެއްދެވި އެސެޓް ރިކަވަރީ ކޮމިޝަނާއި މަރުގެ މައްސަލަތައް ބެލުމަށް އުފެއްދެވި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ބަޔާންކޮށްފައިވާ މީހަކަށް ވެސް އެ އިންތިޚާބުގައި ވާދަ ނުކުރެވޭނެ ކަމަށް އެ ގަރާރުގައިވެ އެވެ.

ހަމައެހެންމެ އެމްއެމްޕީއާރްސީގެ ޚިޔާނާތާ ގުޅިގެން އެންޓި ކޮރަޕްޝަން ކޮމިޝަނުން ތައްޔާރުކޮށްފައިވާ ރިޕޯޓެއްގައި ފިޔަވަޅު އެޅުމަށް އެދި މުއައްސަސާއަކަށް ނަން ފޮނުވާފައިވާ ފަރާތްތަކަށް ވެސް އެ އިންތިޚާބުގައި ވާދަ ނުކުރެވޭނެ ކަމަށް މިރޭ ފާސްކުރި ގަރާރުގައިވެ އެވެ.

އެމްއެމްޕީއާރްސީގެ ޚިޔާނާތާ ގުޅިގެން އެންޓި ކޮރަޕްޝަން ކޮމިޝަނުން ނެރުނު ރިޕޯޓްގައި ހައުސިން މިނިސްޓްރީގެ ސްޓޭޓް މިނިސްޓަރު އަދި އެމްޑީޕީގެ މިހާރުގެ މާލޭ ދާއިރާގެ ރައީސް އަކުރަމް ކަމާލުއްދީނުގެ ނަން އޮތެވެ. އެގޮތުން އަކުރަމް ކަމާލުއްދީނުގެ އެކައުންޓަށް އެސްއޯއެފްގެ އެކައުންޓުން 30،000 ޑޮލަރު ޖަމާކޮށްފައިވާ ކަމަށް އެ ރިޕޯޓުގައިވެ އެވެ.

އެހެންކަމުން މިފަހަރުގެ އިންތިޚާބުގައި މާލޭ ދައިރާއަށް ވާދަކުރައްވާފައިވާ އަކްރަމް ކަމާލުއްދީނަށް އެ ފުރުސަތު މިވަނީ ގެއްލިފަ އެވެ.

މިރޭ މިފަދަ ގަރާރެއް ފާސްކޮށްފައިވާއިރު، އެމްޑީޕީގެ ރައީސް މުހައްމަދު ނަޝީދުގޭ ފޭކް ޓްވިޓާ އެކައުންޓުން އިއްޔެ ވަނީ އަކްރަމް ކަމާލުއްދީނަށް އަމާޒުކޮށް ވަރުގަދަ ޓްވީޓެއް ކުރައްވާފަ އެވެ.

އެލެކްސް އަހްމަދުގެ ނަމުގައި އެމަނިކުފާނު ހިންގަވާ ފޭކް ޓްވިޓާ އެކައުންޓުން ކުރެއްވި ޓުވީޓެއްގައި ވަނީ އަކުރަމް ކަމާލުއްދީން، އެމްޑީޕީގެ މާލެ ދާއިރާގެ ރައީސްކަމުގައި ހުންނަވައިގެން ކުރެއްވިހާވެސް ކަމަކީ އެޕާޓީ ބައިބައި ކުރުމާއި ފިތުނަ އުފެއްދުން ކަމަށެވެ.

"އެމްޑީޕީ ބައިބައި ކުރީ. ދޭތެރެ ޖެއްސީ. ފިތުނަ އުފެއްދީ. އެއީ ވަރަށް އެހެން ކަހަލަ ހުނަރެއް،" ރައީސް ނަޝީދުގެ ފޭކް އެކައުންޓް އެލެކްސް އަހުމަދުގެ ޓުވީޓުގައިވެއެވެ.

މީގެއިތުރުން އެމްޑީޕީގެ އެތެރޭގެ އިންތިޚާބުތަކުގެ ކަންކަން ބެލުމަށް ޚާއްސަ ކޮމިޓީއެއްވެސް މިރޭ ވަނީ އެކުލަވާލައިފަ އެވެ. އެ ކޮމިޓީގައި ހިމެނިވަޑައިގަންނަވަނީ އެމްޑީޕީގެ ޗެއާޕާސަން ހަސަން ލަތީފު، ހެލްތު މިނިސްޓަރު އަހުމަދު ނަސީމް، ދާންދޫ ދާއިރާގެ މެމްބަރު ޔައުގޫބް އަބްދުﷲ، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް، ރައީސް ނަޝީދުގެ ކޮއްކޯފުޅު އަދި ގާނޫނީ ވަކީލް އަހްމަދު ނާޒިމް އަބްދުއް ސައްތާރު، ފޮނަދޫ ދާއިރާގެ މެމްބަރު މޫސާ ސިރާޖު، މަޖިލީހުގެ ނައިބު ރައީސް އީވާ އަބްދުﷲ ފިރިކަލުން އަހުމަދު ޝާހިދު (ސާބެ)، ބާރަށު ދާއިރާގެ މެމްބަރު އަހުމަދު އަބްދުﷲ އަދި އެޑިއުކޭޝަން މިނިސްޓަރު ޑރ. އައިޝަތު އަލީ އެވެ.