ބްރެޒިލްގެ ރިއޯޑި ޖެނީރޯގައި ފުލުހުންނާއި ސިފައިން ގުޅިގެން ޑްރަގް ވިޔަފާރިކުރާ ގޭންގުތަކާ ދެކޮޅަށް ހިންގި ބޮޑު އޮޕަރޭޝަނެއްގައި 132 މީހުން މަރުވެއްޖެ އެވެ.

ރިއޯ ޑި ޖެނީރޯގެ ސްޓޭޓް ޕަބްލިކް ޑިފެންޑަރުގެ އޮފީހުން ބުނެފައިވާ ގޮތުގައި މި ހާދިސާގައި މަރުވި މީހުންގެ އަދަދު 132 އަށް އަރާފައިވާއިރު، މިއީ އެ ގައުމުގެ ތާރީހުގައި މިފަދަ އޮޕަރޭޝަނެއްގައި އެންމެ ގިނަ ބަޔަކު މަރުވި ހާދިސާ އެވެ.

މި އޮޕަރޭޝަނުގައި މަރުވި މީހުންގެ ތެރޭގައި ހިމެނެނީ 4 ފުލުހުންނާއި، 128 އާންމު ރައްޔިތުން ނުވަތަ ކުށްވެރިންނަށް ޝައްކުކުރެވޭ މީހުންނެވެ.

މި އޮޕަރޭޝަން ހިންގާފައިވަނީ ރިއޯގެ އުތުރުގައިވާ އަލެމާއޯ އަދި ޕެންހާ ފަވެލާ (ކުދި އަވަށްތައް) ގަ އެވެ. މި އޮޕަރޭޝަން ފަށާފައި ވަނީ މިދިޔަ އަންގާރަ ދުވަހުގެ ފަތިހު، ބްރެޒިލްގެ އެންމެ ބާރުގަދަ ކުށްވެރި ޖަމާއަތްތަކުގެ ތެރޭގައި ހިމެނޭ ކޮމާންޑޯ ވެރްމެލޯ (ރެޑް ކޮމާންޑް) އާ ދެކޮޅަށެވެ. ފުލުހުން ބުނެފައިވާ ގޮތުގައި މި އޮޕަރޭޝަންގެ މަގްސަދަކީ ގޭންގުތަކުގެ ލީޑަރުން ހައްޔަރުކުރުމާއި، އެ ޖަމާއަތުގެ ބާރު ފުޅާވިޔަ ނުދިނުމެވެ.

މި އޮޕަރޭޝަންގައި ޖުމްލަ 2,500 ފުލުހުންނާއި ސިފައިން ބައިވެރިވެފައިވާއިރު، އަސްކަރީ ވެހިކަލްތަކާއި، ހެލިކޮޕްޓަރުތަކާއި، ޑްރޯންތައް ވެސް ބޭނުންކޮށްފައިވެ އެވެ. ރިއޯ ސްޓޭޓްގެ ގަވަރުނަރު ކްލޯޑިއޯ ކާސްޓްރޯ ވިދާޅުވީ، މިއީ ސްޓޭޓްގެ ތާރީހުގައި ހިންގުނު އެންމެ ބޮޑު އޮޕަރޭޝަން ކަމަށެވެ.

ރިއޯ ސްޓޭޓްގެ ގަވަރުނަރު ކްލޯޑިއޯ ކާސްޓްރޯ ވިދާޅުވީ މި އޮޕަރޭޝަނުގައި މަރުވީ ހަމައެކަނި ހަތަރު ފުލުހުން ކަމަށާއި، އެހެން ނަމަވެސް އެހެން ކަންކަމަށް ބަލާއިރު އޮޕަރޭޝަން ކާމިޔާބު ކަމަށެވެ.

އެހެން ނަމަވެސް، ފަވެލާގެ ރައްޔިތުންނާއި، ސަރުކާރާ އިދިކޮޅު ފަރާތްތަކުން ވަނީ މި އޮޕަރޭޝަނަށް ވަރަށް ބޮޑަށް ފާޑުކިޔާފައިވާއިރު، ރައްޔިތުން ބުނެފައިވާ ގޮތުގައި، 12 ގަޑިއިރަށް ވުރެ ގިނައިރު ބަޑީގެ އަޑު އިވުނުއިރު، އެމީހުންނަށް ގޭތެރެއިން ބޭރަށް ނުކުތުމަށް ދަތިތަކާ ކުރިމަތިވި އެވެ. އަދި އޮޕަރޭޝަން ނިމުމަށްފަހު، މަރުވެފައިވާ މީހުންގެ ހަށިގަނޑުތައް އެއްކޮށް، އާންމު މައިދާނެއްގައި ބޭއްވި މަންޒަރުތައް ބްރެޒިލްގެ މީޑިއާތަކުން ދައްކާފައިވެ އެވެ.

ބްރެޒިލްގެ ފެޑެރަލް ޖަސްޓިސް މިނިސްޓަރު ރިކާޑޯ ލެވަންޑޯވްސްކީ ވިދާޅުވީ، މި އޮޕަރޭޝަނަކީ އިންތިހާއަށް އަނިޔާވެރި އޮޕަރޭޝަނެއް ކަމަށާއި، ކުށްތަކާ ދެކޮޅަށް މަސައްކަތްކުރުމަށް ރަނގަޅު ޕްލޭނެއް ބޭނުންވާ ކަމަށެވެ. މީގެ ކުރިން 2021 ވަނަ އަހަރު ހިންގި ޖަކަރެޒީނޯގެ ގަތުލުއާންމުގައި 28 މީހުން މަރުވެފައިވާއިރު، މިފަހަރުގެ މަރުގެ އަދަދު ވަނީ އެ އަދަދުގެ ހަތަރު ގުނައަށް ވުރެ އިތުރުވެފަ އެވެ.

މި ހާދިސާއާ ގުޅިގެން ބައިނަލްއަގްވާމީ ޖަމާއަތްތަކުން ވެސް ވަނީ ކަންބޮޑުވުން ފާޅުކޮށްފަ އެވެ. ރިއޯ ޑި ޖެނީރޯގެ ޕަބްލިކް ޑިފެންޑަރުގެ އޮފީހުން ވަނީ މި ހާދިސާގެ ތަހްގީގު ހިންގުމަށް އެދިފަ އެވެ.

ބްރެޒިލްގެ ރިއޯ ޑި ޖެނެއިރޯގެ ފަވެލާތަކަކީ، ގިނަ ފަހަރަށް މަސްތުވާތަކެތީގެ ވިޔަފާރީގެ ޖަމާއަތްތަކުގެ ބާރުގެ ދަށުގައިވާ ސަރަޙައްދުތަކެކެވެ. މި ސަރަޙައްދުތަކުގައި ފުލުހުންގެ ބޮޑެތި އޮޕަރޭޝަންތައް ހިންގުމަކީ އާދައިގެ ކަމެކެވެ. މި އޮޕަރޭޝަންތަކުގެ މައިގަނޑު މަގްސަދަކީ ކޮމާންޑޯ ވެރްމެލޯ (ރެޑް ކޮމާންޑް) ފަދަ ބާރުގަދަ ކުށްވެރި ޖަމާއަތްތަކާ ދެކޮޅަށް މަސައްކަތްކުރުމާއި، އެ ޖަމާއަތްތަކުގެ ބާރު ފުޅާވިޔަ ނުދިނުމެވެ. އެހެންނަމަވެސް، މިފަދަ އޮޕަރޭޝަންތަކުގެ ސަބަބުން ގިނަ އަދަދެއްގެ މީހުން މަރުވާ ހާދިސާތައް ތަކުރާރުވަމުންދާކަން ފާހަގަކުރެވެ އެވެ.