ތުރުކީއަކީ މުޅި ދުނިޔޭގައި ވެސް އެންމެ މުއްސަނދި އަދި އެންމެ ދިގު ތާރީހެއް އޮތް އެއް ގައުމުގެ ގޮތުގައި ގަބޫލު ކުރެވިފައިވާ ގައުމެކެވެ.
ތުރުކީގެ އެކި ސަރަހައްދުތަކުގައި އެ ގައުމުގެ މުއްސަނދި ތާރީހުގެ އުސްއަލިތައް ފެންނަން ހުރިއިރު ތުރުކީއާއި ސީރިއާ ގުޅޭ ބޯޑަރު ކައިރީގައިވާ މިދްޔުތު ސަރަހައްދުން ބިމުއަޑީގެ އާސާރީ އަވަށެއް މިދިޔަ އަހަރު ފެނިފައިވެ އެވެ.
ރިޕޯޓުތައް ބުނާ ގޮތުގައި 900،000 އަކަ މީޓަރުގެ ބޮޑު ސަރަހައްދަކަށް ފެތުރިފައިވާ އެ އަވަށަކީ އީސާގެފާނު ދުނިޔެއަށް ފޮނުއްވުމުގެ ވެސް މާ ކުރިއަށް ތާރީހު ކުރެވިފައިވާ އަވަށެކެވެ.
ދިގު ހޮހޮޅައެއްގެ ގޮތުގައި އެ އަވަށް ބިނާ ކުރެވިފައިވާއިރު ހޮހޮޅައިގެ ފާރުތަކުގައި އޭރުގެ ދިރިއުޅުން ދައްކުވައިދޭ ކުރެހުންތައް ވެސް ހުރި ކަމަށް ހަބަރުތައް ބުނެ އެވެ.
މި އަވަށުގެ ބޮޑުކަމާއެކު އެއީ ތުރުކީގެ އިތުރުން މުޅި ދުނިޔޭގައި ވެސް މިހާތަނަށް ހޯދިފައިވާ އެންމެ ބޮޑު ބިމުއަޑީގެ "ސިވިލައިޒޭޝަން" އަށްވުން އެކަށީގެންވެ އެވެ.
ތުރުކީގެ ތާރީހު ދިރާސާކުރާ ފަރާތެއް ކަމަށްވާ މެރްވަން ޔުވިޒް ބުނި ގޮތުގައި އެ ހޮހޮޅައަކީ އޭރުގެ މީހުން ދުޝްމިނުންނާއި ޝިކާރަވެރިންގެ އިތުރުން ނުރައްކާތެރި ބަލިތަކުން ސަލާމަތްވުމަށް ބޭނުންކުރި ހޮހޮޅައެއް ކަމަށް ބެލެވެ އެވެ.
ތުރުކީއަށް އަރަބިން އައުމުގެ ކުރިން އެ ގައުމަކީ ރޯމަނުންނާއި ފާރިސީންގެ އިތުރުން އަސޭރިން ވެސް ފަތަހަ ކުރަން މަސައްކަތްކުރި ގައުމެކެވެ.
މި ބޮޑު ޕްރޮޖެކްޓަށް ފައިސާ ހަރަދުކުރާ މިދްޔުތުގެ މުނިސިޕަލްޓީއިން ބުނީ އެ ހޮހޮޅަ ރަނގަޅަށް ދިރާސާކޮށް އާއްމުންނަށް ހުޅުވާލެވެންދެން މަސައްކަތް ކުރިއަށްދާނެ ކަމަށެވެ.
