މިދިޔަ ހަފްތާ ތެރޭގައި ބޮލީވުޑްގެ ހަބަރުތަކުގެ އެންމެ ފަލަ ސުރުހީގައި އޮތީ މަޝްހޫރު އެކްޓަރު ގޯވިންދާއާއި އޭނާގެ އަންހެނުން ސުނީތާ އަހޫޖާ ވަރިވާން އުޅޭ ކަމުގެ ހަބަރެވެ.

މި އަޑުތައް މީޑިއާގައި ގަދަވެފައި ވަނިކޮށް އެންމެ ފަހުން ސުނީތާ މިވަނީ އެ ހަބަރުތައް ދޮގުކޮށް ފެތުރެމުން އަންނަ އަޑުތަކަށް ނިމުމެއް ގެނެސްފަ އެވެ.

މިފަހުން އިންޑިއާގައި ފާހަގަ ކުރެވުނު މުނާސަބަތެއްގެ ތެރެއިން މީޑިއާއަށް ދިން އިންޓަވިއުއެއްގައި ސުނީތާ ބުނީ އެއްވެސް މީހަކަށް އޭނާއާއި ގޯވިންދާ ވަކި ނުކުރެވޭނެ ކަމަށެވެ.

"އަހަރުމެންގެ މެދުގައި ނުތަނަވަސް ކަމެއް އޮތްނަމަ މިހާ ގާތްކޮށެއް ނޫޅުނީސް. ދުރުކަމެއް ހުންނާނެ." ގޯވިންދާއާއެކު އެ މުނާސަބަތު ފާހަގަ ކުރުމުގައި ބައިވެރިވި ސުނީތާ ބުންޏެވެ.

ގޯވިންދާއާއި ސުނީތާގެ ކައިވެނި ނިމުމަކަށް އަންނަން އުޅޭ ކަމަށް އެންމެ ފުރަތަމަ އަޑު ފެތުރުނީ މިދިޔަ އަހަރުގެ ފަހުކޮޅު އެވެ. ބުނެވޭ ގޮތުގައި އޭރު ސުނީތާ ވަރިއަށް އެދުނީ ގޯވިންދާގެ ފަރާތުން ގެވެށި އަނިޔާ ލިބޭތީ އެވެ.

ގޯވިންދާއާއި ސުނީތާގެ ކައިވެންޏަށް 38 އަހަރު ވެފައިވާއިރު އެ ކައިވެންޏަށް ތިން ދަރިން ލިބިފައިވެ އެވެ. އޭގެ ތެރެއިން ހަގު ދަރިފުޅު ތުއްތު އުމުރުގައި މަރުވިއިރު ދޮށީ ދެބެއިން ވަނީ ބޮލީވުޑްއާ ގުޅިފަ އެވެ.