"މިކަން ކޮށް ދެއްވުން އެދި މަނިކުފާނުގެ އަރިހުގައި އަދަބު އިހުތިރާމާ އެކު އާދޭސް ދަންނަވަމެވެ."

މަތީގައިވާ ޖުމުލައަކީ އެއްޒަމާނެއްގައި ރާއްޖޭގެ ރައީސުލްޖުމުހޫރިއަޔާގެ އަރިއަހަށް މީސްމީހުން ފޮނުއްވަވާ ސިޓީތައް ނިންމާފައި ހުންނަ ގޮތެވެ. އަޅުގަނޑަށް ފެނުނީ ރައީސް މައުމޫން އަބްދުލްގައްޔޫމްގެ ޒަމާނެވެ. އޭރު ރައީސަށް ފޮނުވާ ސިޓީ ލިޔަން މޮޅު މީސްމީހުން ތިބެ އެވެ. އެފަދަ ބައެއް މީހުން ލިޔެފައިވާ ސިޓީތައް ކިޔުމުގެ ފުރުސަތު ލިބުނެވެ. އޭގައި އެ ހުންނަ އާދޭސް ދެންނެވުމުގެ ބަސްމަގަކީ އޭރު ވެސް އަމިއްލަ ޒަމީރު ބަލައިގަންނަ ކަމެއް ކަމަށް ނުވި އެވެ. އެހެން ނަމަވެސް އެއީ އަންޒަމާނުއްސުރެ ރާއްޖޭގައި އެކަން އޮތް ގޮތެވެ.

ރައީސް މައުމޫނުގެ ވެރިކަން ނިމުނީ ރާއްޖޭގެ ސިޔާސީ މަސްރަހަށް ބޮޑު ބަދަލެއް އައިސްގެންނެވެ. ރައްޔިތުންނަށް ލިބުނީ އާދަޔާ ޚިލާފު ބޮޑު މިނިވަންކަމެކެވެ. އެ މިނިވަންކަމާއެކު ރައީސުންނަށް ފާޑުކިއުމާއި ސަރުކާރުން ހިންގާ ގޯސްތަކުގެ ވާހަކަ ދެއްކުމަކީ ރައްޔިތުންނަށް ނަމެއްގައި އޮތް ހައްގެއްގެ ގޮތުގައި އޮތް އޮތުން ބަދަލުވެ، ކަންކަމާމެދު އަޑު އުފުލައި ޑިމާންޑުކުރުމަށް ރައްޔިތުން ތެދުވި އެވެ. ނަތީޖާއެއްގެ ގޮތުން ރައްޔިތުންގެ ދިރިއުޅުމުގެ ފެންވަރު ބަދަލުވި އެވެ. ކޮންމެ ރަށެއްގައި ނަރުދަމާ އަޅައި، ކުޑަ ރަށެއް ބޮޑު ރަށެއް ބެލުމެއް ނެތި އަސާސީ ޚިދުމަތް ދިނުމަށް ސަރުކާރުތަކަށް މަޖުބޫރުވި އެވެ.

ރައްޔިތުންގެ މަޖިލީހުގައި ހޫނު ބަހުސްތައް ހިނގަން ފަށައި، ނޫސްތަކުގައި ކަންކަމާމެދު ފާޑުކިޔާފައި ލިޔަން ފެށި އެވެ. އެހެނަސް އެ ހުރިހާ ކަމެއް އެ ގޮތަށް އޮތީ މިހާރު ހިނގަމުން މިދާ ސަރުކާރު ވެރިކަމަށް އަންނަން ދެނެވެ.

ރައީސް މުހައްމަދު މުއިއްޒު ވެރިކަމަށް ވަޑައިގެންނެވީ އޭގެ ކުރިން ވެރިކަމަށް އަންނަން ކެމްޕޭން ކުރި އެއްވެސް ކެންޑިޑޭޓަކު ތިރި ނުވާ ވަރަށް ރައްޔިތުންގެ ކުރިމަތީގައި ހަމަބިމަށް ތިރިވެ، ދެންނެވި އާދޭސްތަކަކަށް ފަހު އެވެ. ރިޔާސީ ކެންޑިޑޭޓްކަން ލިބިވަޑައިގެންނެވީ ކިހިނެއްކަން ހަނދުމަފުޅު ނެތިވަޑައި ނުގަންނަވާނެކަމަށާއި ރައްޔިތުން އެދޭ ހުރިހާ ކަމެއް ކޮށްދެއްވާނެ ކަމަށް ވައުދުވެވަޑައިގަންނަވަމުން އެމަނިކުފާނު ވިދާޅުވީ އެމަނިކުފާނަކީ ސީދާ ރައްޔިތުންގެ ޚާދިމެއް ކަމަށެވެ.

ޚާދިމެއްކަމުގައި ވިދާޅުވެ ވެރިކަމަށް ވަޑައިގެންނެވުމާއެކު ރައީސް މުއިއްޒުގެ ސިފަފުޅު ރާއްޖޭގެ ފަހުގެ ތާރީޚެއްގައި ވެރިކަންކުރެއްވި އެންމެ ޚުދުމުޚުތާރު ވެރިޔާގެ ސިފައަށް ބަދަލުވި އެވެ. ވެރިކަމުގެ ބާރުތައް މުށުތެރެއަށް ލެއްވުމަށް ދައުލަތުގެ މުދާ ނަހަމަ ގޮތުގައި ބައްސަވަން ފެށްޓެވި އެވެ. ހުރިހާ ބާރެއް އަތް ދަށުލެއްވުމަށް ފަހު ފެށްޓެވީ އެމަނިކުފާނު ބޭނުންފުޅުވެ ވަޑައިގަންނަވާ ބަޔަކު "ސައިޒު" ކުރެއްވުމަށެވެ. ފެއްޓެވީ ރައީސް އަބްދުﷲ ޔާމީނާ ހަމައިންނެވެ. "އުޑުގައި ޖެހިފައި ބިމުގައި ޖެހިފަ" ދެން ދިމާ ކޮށްލެއްވީ މަހުޖަނުންނާއި ވިޔަފާރި ވެރިންނާ އެވެ. އެ މީހުނަށް އަޑުފުޅަށް ލެއްވުނުހާ ބާރެއް ލައްވާފައި "ޑޮލަރު ޖެހޭނީ މާރުކުރަން" ކަމަށް ވިދާޅުވުމުން މަހުޖަނުން ހަތިޔާރު ބެހެއްޓި އެވެ. އެންމެ ފަހުން އެ މީހުން ގޮވާލަނީ ރައީސްގެ ވެރިކަން 15 ވަރަކަށް އަހަރަށް ދަންމާލާށެވެ.

މަހުޖަނުންނާއި ވިޔަފާރިތަކަށް ފަހު ރައީސް މުއިއްޒުގެ ހަރުކަށިކަން އަމާޒުވީ ކައުންސިލްތަކާއި ނޫސްވެރިންނަށެވެ. ކައުންސިލުގެ ބާރުތައް ހަނިކުރައްވައި ނޫސްވެރިންގެ ވަރަ ކޮށާލަން ރައީސް މުއިއްޒު އުޅުއްވާ އުޅުއްވުމާ ގިނަ ބަޔަކު ދެކޮޅެވެ. އެކަން އެ މަގުން ނުކުރެއްވުމަށް އެދި އެތައް ބަޔަކު އިލްތިމާސް ވެސް ކޮށްފި އެވެ. އޭގެ ތެރެއިން އެއް ވީޑިއޯ ކްލިޕެއްގައި ކައުންސިލް މެންބަރަކު ރައީސުލްޖުމުހޫރިއްޔާއަށް އާދެސް ދަންނަވާ މަންޒަރު ފެނެ އެވެ. އެ ބޭފުޅާ އެދިވަޑައިގެންނެވީ ކައުންސިލްތަކުގެ ބާރު ހިފެހެއްޓުމަށް ފަރުމާ ކޮށްފައިވާ ބިލުގެ މަސައްކަތް ކުރިޔަށް ނުގެންދެވުމަށެވެ. އެކަމަށްޓަކައި ރައީސަށް އާދޭސް ކުރައްވަ އެވެ.

ރައީސަކީ ބިލު ހުށަހަޅުއްވައި، ބިލު ފާސްކުރައްވައި، ގަވައިދުތައް ހައްދަވަން ވެރިކަމަށް ވަޑައިގަންނަވާ ބޭފުޅެއް ނޫނެވެ. އެ މަނިކުފާނުގެ ވާޖިބަކީ ހެދިފައި ހުންނަ ގާނޫނުތަކަށް ބޯ ލަނބައިގެން އެ ގާނޫނުތަކާއި ގަވާއިދުތަކާ އެއްގޮތަށް ވެރިކަން ހިންގެވުމެވެ. އެހެން ނަމަވެސް ގާނޫނު ހަދާ ބާރާއި ތަންފީޒީ ބާރާއި ދެން ވެސް އޮތްހާ ބާރެއް ރައީސްގެ އަމިއްލަ މުށު ތެރެއަށް ލެއްވީމާ ރައްޔިތުންނަށް ޖެހޭނީ އެ މީހުންގެ ބޭނުންތައް ފުއްދުމަށް އިއްޒަތްތެރި ރައީސްގެ އަރިއަހަށް ސަލާން ޖަހާށެވެ. ރައީސް މުއިއްޒު ރައްޔިތުންނަށް އެނޫން ގޮތެއް ނުދައްކަވަ އެވެ.