އަންނަ ހޮނިހިރު ދުވަހު ބާއްވާ ލޯކަލް ކައުންސިލް އިންތިޚާބުގައި މާލޭ ސިޓީގެ މޭޔަރު ކަމަށް އެމްޑީޕީގެ ކެންޑިޑޭޓް އަނަސް އަބްދުއްސައްތާރަށް ވޯޓު ނުދޭން ނިންމައިގެން ތިބި އެ ޕާޓީގެ މެމްބަރުން ވިސްނުން ބަދަލު ކުރުމަށް އެމްޑީޕީގެ ރައީސް މުހައްމަދު ނަޝީދު ގޮވާލައްވައިފި އެވެ.

ރައީސް މިކަމަށް ގޮވާލެއްވީ އިއްޔެ ކުރިއަށް ގެންދިޔަ "ރަށްވެހި ފަތިސް" ގަލޮޅު ކެމްޕޭން ހަރަކާތުގައި ވާހަކަދައްކަވަމުންނެވެ.

ރައީސް ނަޝީދު ވިދާޅުވީ އަނަސް މޭޔަރު ކަމަށް ހޮވުމަކީ އެމްޑީޕީއަށް މަޖުބޫރު ކަމެއް ކަމަށެވެ.

އެމަނިކުފާނު އެމްޑީޕީ ވެރިކަމަށް ގެންނަން ވޯޓު ދީގެންނާއި މަޖިލިސްގެ މެޖޯރިޓީ އެމްޑީޕީއަށް ހޯދުމަށް ވޯޓުދީގެން ވީ މާބޮޑު ކަމެއް ނެތްކަމަށް ރައްޔިތުން ބުނަމުން އަންނަ ކަމަށެވެ. ރައްޔިތުން އެގޮތަށް ދެކުނަސް އެމަނިކުފާނު މިހާރު ދައްކާ ވާހަކަ އަޑުއެހުމަށް ރައީސް ނަޝީދު ވަނީ އެދިވަޑައިގެންފަ އެވެ.

ރައްޔިތުން ބޮޑަށް ބޭނުންވެގެން މި އުޅެނީ ދަތުރުފަތުރު ކޮށްގެން ސިޓީގެ ސެންޓަރަށް ފަސޭހައިން އާދެވި، ސިޓީގެ ސެންޓަރުން ފަސޭހައިން ރީތި ތަނަކަށް ނިދަން ދެވޭނެ ގޮތެއް ކަމަށް އެމަނިކުފާނު ވިދާޅުވި އެވެ.

އެކަންކުރުމަށް އެމްޑީޕީއަށް ވުރެ ތަޖުރިބާ ހުރި ބަޔަކު ނުތިބޭނެ ކަމަށް ވެސް ރައީސް ނަޝީދު ވިދާޅުވި އެވެ.