ހުޅުމާލޭގެ ސެންޓްރަލް ޕާކާއި ގޮނޑުދޮށުގައި ޕިކްނިކް ހެދުމަށް އެޗްޑީސީގެ ހުއްދަ ހޯދަންޖެހޭ ކަމަށް ބުނާ ޝަކުވާތަކެއް ސޯޝަލް މީޑިއާގައި އާންމުވާން ފަށައިފި އެވެ.

ފާއިތުވި ދެ ދުވަހުގެ ތެރޭގައި މި ޝަކުވާތައް ދައުރުވެފައިވާއިރު، ސެންޓްރަލް ޕާކުގައި ޕިކްނިކް ހަދަން ދިޔަ ބަޔަކަށް އެޗްޑީސީގެ މުވައްޒަފުން ހުރަސްއެޅި ކަމަށް ބުނެ އެވެ. ހުއްދަ ނެތި އެ ސަރަހައްދުގައި ޕިކްނިކް ނުހެދޭނެ ކަމަށް އަންގާފައިވާ ވާހަކަ ސޯޝަލް މީޑިއާގައި ޕިކްނިކްގެ ބައިވެރިން ހިއްސާކޮށްފައިވެ އެވެ.

އޭގެ އިތުރުން، ޕިކްނިކް ހެދޭނީ ކުރިއާލާ އެޗްޑީސީއަށް މެއިލްކޮށް ހުއްދަ ލިބިގެން ކަމަށް ވެސް ބުނެފައިވާ ކަމަށް އެ ބައިވެރިން ބުނެފައިވެ އެވެ.

ނަމަވެސް މިކަމާ ގުޅޭ އެއްވެސް އުސޫލެއް އެޗްޑީސީން މިހާތަނަށް އާންމުކޮށްފައެއް ނުވެ އެވެ. މިކަމާ ގުޅިގެން އެޗްޑީސީގެ ބަހެއް ލިބިފައެއް ނުވެ އެވެ.

ހުޅުމާލޭގެ ތުނޑިއާ، ޕާކުތައް އަދި ދެވަނަ ފިޔަވައްސާއި ފުރަތަމަ ފިޔަވައްސާ ދެމެދު ކަނޑާފައި އޮންނަ ކޯރުގެ ދެ ފަރާތުގައި ފޮތިގަނޑު އަޅައިގެން ޕިކްނިކް ހެދުމަކީ އާންމު ކަމެކެވެ. ނިމިދިޔަ ރޯދަ މަހު ވެސް ގިނަ ބަޔަކު އެ ސަރަހައްދުގައި ރޯދަ ވީއްލުމަށް ހާއްސަކޮށްގެން ޕިކްނިކް ހަދާފައިވެ އެވެ.