ރާއްޖޭގައި ސިނގިރޭޓާއި ވޭޕް މަނާކޮށްފައި އޮތްކަން ރާއްޖެ އަންނަ ޓޫރިސްޓުންނަށް އެނގޭނެތޯ، ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ސުވާލުކުރައްވައިފި އެވެ.

އެކްސްގައި ކުރެއްވި ޕޯސްޓެއްގައި މޫސަ ވަނީ އިނގިރޭސިވިލާތާ ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރާއިރު، ރާއްޖޭގައި ސިނގިރޭޓާއި ވޭޕް މަނާކޮށްފައި އޮތްކަން އިޝްތިހާރުތަކުން ބޭރު ގައުމުތަކުގެ މީހުންނަށް އެނގޭނެތޯ ސުވާލު ކުރައްވާފަ އެވެ.

އޭނާ މިހެންސުވާލު ކުރައްވާފައި ވަނީ، ރާއްޖޭގައި ވަކި ޖީލަކަށް، ދުންފަތުގެ އިސްތިއުމާލު މަނާކުރުމަށް ރައީސް މުހައްމަދު މުއިއްޒު ނިންމަވާފައި ވަނިކޮށެވެ.

އެގޮތުން ރީކޯ ވަނީ، ރާއްޖޭގެ ޑިއުޓީ ފްރީތަކުން ދުންފަތުގެ ބާވަތްތައް އުނިކޮށްފައިވޭތޯ ސުވާލު އުފައްދާފަ އެވެ. އަދި ޑިއުޓީ ފްރީ ވިޔަފާރިކުރާ އެމްއޭސީއެލްއިން މުޒާހަރާތަކަށް ޚަރަދުކުރޭތޯ އާއި އެ ކުންފުނީގެ ވިޔަފާރީގައި ތިބީ މި ސަރުކާރާ އިދިކޮޅު މީހުންތޯ ވެސް އޭނާ ސުވާލު ކުރައްވާފައިވެ އެވެ.

ދުންފަތުގެ ނޭދެވޭ އަސަރުތަކުން ޒުވާނުންނާއި އަންނަން އޮތް ޖީލުތައް ސަލާމަތްކުރުމަކީ ސަރުކާރުގެ އިސް އަމާޒެއް ކަމުގައި ރައީސް މުޢިއްޒު ފާހަގަކުރައްވާފައިވާއިރު، އެމަނިކުފާނު ވަނީ ދުންފަތުގެ އިސްތިއުމާލު ކުރުން މަނާ ކުރަން އެކަށީގެންވާ އުމުރުފުރާއަކާ މެދު ރައްޔިތުންގެ ޚިޔާލު ހޯދުމަށް ދައުވަތު ދީފަ އެވެ.