އއ. ހިމަންދޫ ފަޅުގައި އޮތް ބޮޑު ލޯންޗެއްގައި ރޯވެ، އަނދައި ހުލިވެ އަޑިއަށް ހިނގައްޖެ އެވެ.

މި ހާދިސާގައި ރޯވެފައިވަނީ އެ ރަށު ބަނދަރު ބޭރުގައި އަޅާފައި އޮތް "ކައެލް ވިންގް" ނަމަކަށް ކިޔާ 40 މީހުންގެ ލޯންޗުގަ އެވެ.

މި ލޯންޗަކީ އެ އަތޮޅު ފެރިދޫ، މާޅޮސް އަދި ހިމަންދޫ އާއި މާލެ އާ ދެމެދު ދަތުރުކުރާ ފެރީ ލޯންޗެކެވެ.

އެ ރަށުން "ހުރިހާ" އާ ވާހަކަ ދެއްކި މީހަކު ބުނީ މި ހާދިސާ ހިނގީ ރޭ ފަތިހު ކަމަށެވެ. އަދި އއ. އަތޮޅުގެ ބައެއް ރަށްތަކާއި މާލެއާ ދެމެދު ދަތުރުކުރަން ބޭނުންކުރާ އެ ލޯންޗުގައި ރޯވެފައި ވަނީ ބާރުގަދަ ގޮވުމަކާއެކު ކަމަށް ވެސް އޭނާ ބުންޏެވެ.

ލޯންޗުގައި ރޯވީ މާލެއަށް ފުރަން ތައްޔާރުވަމުން ދިޔަ ވަގުތެއްގައި ކަމަށް އެ ރަށުން ވާހަކަދެއްކި މީހާ ބުންޏެވެ. އަދި އެވަގުތު ލޯންޗުގައި ކައްޕި އާއި ފަޅުވެރިއެއްގެ އިތުރުން ކުޑަކުއްޖަކު ވެސް ހުރި ކަމަށް ވެސް އޭނާ ބުންޏެވެ.

މި ހާދިސާއާ ގުޅިގެން ފުލުހުން ބުނީ ހާދިސާ ރިޕޯޓްކޮށްފައި ވަނީ 5:50 ގައި ކަމަށެވެ. އަދި ލޯންޗުގައި ރޯވި އަލިފާން ނިވާލީ އާންމުންނާއި ފުލުހުން އަދި ރަށު ކައުންސިލް ގުޅިގެން ކުރި މަސައްކަތުން ކަމަށް ފުލުހުން ބުނެ އެވެ.

މި ހާދިސާ ހިނގި ވަގުތު ލޯންޗުގައި ކެޕްޓަންއާއި ދެ ކްރޫގެ އިތުރުން ކުޑަކުއްޖަކު ހުރި ކަމަށް ފުލުހުން ވިދާޅުވި އެވެ. ނަމަވެސް މިއިން އެއްވެސް މީހަކަށް ބޮޑު އަނިޔާއެއް ނުވާކަމަށް ފުލުހުން ބުނެ އެވެ.

ލޯންޗުގައި ރޯވެ ވަރަށް ބޮޑަށް އަނދަމުންދާ މަންޒަރު ފެންނަ ވީޑިއޯތަކާއި ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ.

މި ހާދިސާގައި ލޯންޗުގައި ފުރަތަމަ އަލިފާންގަނޑު ހިފާފައި ވަނީ ލޯންޗުގެ އިންޖީނާ ދިމާލުން ކަމަށް ވީޑިއޯތަކުން ފެނެ އެވެ. އަދި އަލިފާން ހިފި ވަގުތު ލޯންޗުގެ ފަހަތުން ތަންގަނޑެއް ފަޅައިގެން ގޮސް ހުއްޓާ ފެނެ އެވެ.

ލޯންޗުގައި ރޯވެ ވަރަށް ބޮޑަށް އަނދަމުންދާ މަންޒަރު ފެންނަ ވީޑިއޯތަކާއި ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ. ލޯންޗު މިހާރު ވަނީ ފަޅުތެރެއަށް އަޑިއަށް ގޮސްފަ އެވެ.

މި ހާދިސާ ހިނގާފައި މިވަނީ، ލ. އަތޮޅުގައި ދަތުރުކުރަމުން ދިޔަ "ހޮޅުދޫ ބޯޓު" ގައި ރޯވެ އަޑިއަށް ދިޔަ ހާދިސާ ހިނގިތާ އެއް ދުވަސް ފަހުންނެވެ. އެ ހާދިސާގައި ބޯޓުން ދަތުރުކުރި 25 އަހަރުގެ ޒުވާނަކު ގެއްލިގެން ދަނީ ހޯދަމުންނެވެ.